EZEQUIEL 37

1O nna'ye tipumal Kman, ex in etz k'i'ne tu'n T-xew; in cub tk'o'n tuj jun chk'ajlaj jatum attok nim cybakil cyimni. 2Ex inx ti'n tuj tcyakil chk'ajlaj lu, nojnitok tuj tu'n cybakil cyimni, nimxix wen ex jumajx tzkij ke. 3Tmatzun Kman weye: ¿Jacupe che jaw ank'in juntl maj ke bak lu? Atzun weye xi ntzak'we'ne: Nman, o'cx aya ba'n tu'n. 4Tmatzun Kman weye: Txi yolina cye ke bak lu te nxele, ex k'manxa cye: Akeye tzkij bak, cybintze aju tyol Kman: 5Chi Kman cyeye cyja': C'oquex nk'o'ne juntl maj cyxewe cyuje tu'ntzun cyjaw ank'ine juntl maj. 6C'oquel nk'o'ne juntl maj cybotx'ile, ex c'oquel nk'o'ne cychibjale; c'oquel nk'o'ne cytz'umale ex ctel juntl maj cyxewe wu'ne tu'ntzun cyjaw ank'ine. Atzun c'elel cynic'e ti'j, akine Dios, chi Kman, chicuya cye. 7O chin yoline cye ic tza'nx tzaj tma'n Kman weye. Tej matok in chin yoline cyuc'il, o nbiye jun tk'ajk'ajel; in che swoc'in ke bak wen tej toc cychmon cyib jun tuc'il juntl. 8Ex o wile otok tz'oc cybotx'il ex cychibjal tuc'ix cytz'umal, pero minti'tok cyxew. 9Tmatzun Kman weye cyja': Yolina te nxele teju xewbaj, ex k'manxa te: Chitzun Kman cyja': Aya xewbaj, tzaja max cyuj ke cyaje pac' ttxa'n tx'otx', ex xupinxa cyi'j ke cyimni lu tu'n cyjaw ank'in, chi Kman weye. 10In yoline te t-xel Kman ic tza'nx tzaj tma'n weye, ex ocx ju xewbaj cyuj ke cyimni ex e jaw ank'in. E jaw we' nimxix cyajlal wen. 11Tmatzun Kman weye: Ic cyten aj Israel ic tza'n ke bak lu. In cyma'n cyja': Ke kbakil ma che tzkij ex minti' jatum ba'n tu'n toc ke' kc'u'j, ma ko naj, che chi. 12Tu'ntzun jlu, yolina cyuc'il te nxele ex k'manxa cye cyja': Atzun jlu in tma'n Kman: Akeye xjal etzan wu'ne ic cytene ic tza'n ke cyimni otok che cu'x maku'n, pero che jaketel ke cymukbile wu'ne, che eletz wi'ne cyuj, ex che pol wi'ne juntl maj tuj cytx'otx' aj Israel. 13Akeye xjal etzan wu'ne, oc cyjaket ke cymukbile wu'ne, ex oc cyetz wi'ne cyuj, c'elel cynic'e ti'j, akine Dios. 14C'oquex nk'o'ne Nxewe cyuje, ex che jawil ank'ine; che pol wi'ne tuj cytx'otx'e. C'eleltzun cynic'e ti'j ka akine o txi nma'ne jlu, ex wu'ne o bant. Akine in chin k'mante jlu. 15Tzajtzun yolin Kman wuc'ile ex tma cyja': 16K'intza jun piẍ tze' ex tz'iban oca ke yol lu ti'j: Aju tnam Judá cyuc'ix ke mastl aj Israel ate' tuc'il. K'intza juntl piẍ tze' ex tz'iban oca ke yol lu ti'j: Efraín aju tiyjil José, cyuc'ix ke mastl aj Israel ate' tuc'il. 17Te tibajxi, mojban oca tuj tk'aba cywi' ke cabe tze', tu'ntzun cyoc te junx. 18Octzun cymante ke t-xjalila teya: Chic'bantza keye ti t-xilen jlu, ka che chi, 19k'manxa cye cyja': Atzun jlu in tma'n Kman: Ctzajel ntzyu'ne ju tze' toc tbi José ti'j ex toc cybi mastl c'loj cyiyjil aj Israel ti'j, aju tzyu'n tu'n Efraín, tu'n toc nmojba'ne twi' tuc'il ju tze' toc tbi Judá ti'j, ex che oquel te junx tuj nk'abe. 20Ax tzyun cuba tuj tk'aba keju cabe tze' otok tz'oc ttz'ibana cywitz, tu'n toc cyque'yin xjal, 21ex k'manxa cye cyja': Atzun jlu in tma'n Kman: Che tzajel wi'ne ke aj Israel cyuj ke nasyon jatum ma che pon baj, che ajetz nchmo'ne tuj tcyakil part ex che ul wi'ne juntl maj tuj cytx'otx'. 22Che oquel te junx nasyon wu'ne tuj ju cytx'otx' aju tiwitz tx'otx' cye aj Israel. Junx cyrey ctel. Mlay che octl juntl maj te cabe nasyon ex mya partchak cawbil cyxol. 23Mlay che c'ulun juntl maj cywitz ke tilbilal tu'n cybinchante aju mya ba'n, ex mlay cybincha tcyakil txcaj il. Che cletel wu'ne te tcyakil mya ba'n o cybincha tej tel cypa'n cyib ti'j nleye. Che tx'jetel wu'ne tuj ju cyil. Che oquel te weye ex chin oquele te Cydios. 24Aju nmajene David c'oquel te cyrey ex o'cx te cpastoril cye. Cxel cybi'n nyole ex che japunel ke nleye ex ke nxnak'tzbile cyu'n. 25Che najal tuj ju tx'otx' xi nk'o'ne te nmajene Jacob, jatum e ten ke cyxe'chel. Axtzun che najal cyuc'ix ke cyc'wa'l ex cycyakil ke cyiyjil che ul itz'j te tibajxi. Aju nmajene David cucx ctel te nejenel cye. 26Cyjel bant ti'j jun nyole cyuc'il tu'n cyank'in tuj txubtxaj. Aju nyole cyjel bant ti'j cyuc'il cucx cyjel ten te jumajx. Cchmetel cyajlal wu'ne ex cucx ctel cyxol aju njaye xjan. 27Chin najale cyuc'il, akine chin oquel te Cydios ex atzun cye che oquel te weye. 28Octzun tten njaye xjan cyxol te jumajx, c'elel cynic' mastl nasyon ti'j ka akine in jaw sc'onte cye aj Israel tu'n cyoc te jun wetzbile xjan.

will be added

X\