EZEQUIEL 36

1Aya xjal, yolina cye ke witz ate' tuj cytx'otx' aj Israel ex k'manxa cye aju yol cxel nma'ne teya cyja': Akeye witz ate'ye tuj cytx'otx' aj Israel, cybintze, 2atzun jlu in tma'n Kman: O cyma ke aj k'oj cyi'je, akeye aj Israel: Ma ko oc cyajwil ke ojtxi witz, che chi. 3Cyja'tzun, k'manxa cye aju yol cxel nma'ne teya, ex k'manxa cye cyja': Atzun jlu in tma'n Kman: Tuj tcyakil part e tzaj ke aj k'oj, e oc tzokpaj cyi'je ex e naje cyu'n, tu'n cyoque te cyetzbil ke mastl nasyon, ex ma che oque te cyxmaybil xjal ex ma che el ic'une cyu'n. 4Cyja'tzun akeye witz ate'ye tuj cytx'otx' aj Israel, cybintze aju yol in tma'n Kman cye ke nmak witz, cye ke tal witz, cye ke tk'ab xak, cye ke chk'ajlaj ate' cyxol witz ex cye ke tnam cye aj Israel o che cub xitj ex minti' xjal cyuj, akeju o tz'ex elk'a'n cyuj cyu'n ke tnam cyvesin cyib cyuc'il ex o che oc te cyxmaybil. 5Atzun jlu in tma'n Kman: Ma chin jaw cyakpaje ex ma tzaj nimxix nk'oje cyi'j mastl nasyon, ex cyi'j cycyakil aj Edom, porque nim e jaw tzalaj tej cyoc te tajwil ju tx'otx' etzan wu'ne ex tuc'il nim ic'bil ma tz'el cyelk'a'n tcyakilju at tuj cojbil. 6Cyja'tzun k'manxa aju yol in xi nma'ne teya ti'j cytx'otx' aj Israel, ex k'manxa cyja': Atzun jlu in tma'n Kman cye ke nmak witz, cye ke tal witz, cye ke tk'ab xak ex cye ke chk'ajlaj ate' cyxol witz: Ma tzaj ntx'u'jile ex nk'oje tu'n tlaj ju yasbil ma tzic'x cyu'ne cyu'n ke xjal cyuj mastl nasyon. 7Cyja'tzun akine Dios in xi nma'ne jun yol axix toc: Ke nasyon cyvesin cyib cyuc'ile ctzajel cych'ixwi. 8Atzun cyeye, akeye nmak witz tuj cytx'otx' aj Israel, che ch'iyil ke tze' cywi'ye, akeju ba'n tlo'njtz cywitz, ex c'oquel nim cywitz tu'n tajben te cylo' ke xjal etzan wu'ne akeju aj Israel. Porque nikayin ta' tk'ijlalil tu'n cyajtz meltz'aj. 9Akine chin oquel cwentin te cyeye, che bajel ch'oquine ex cbelex awet awal cywi'ye. 10Wu'ne cchmetel cybaj aj Israel cywi'ye. Cchmetel nimxix xjal cyuj tnam, ex che jawil bincha'n juntl maj ke tnam o che cub xitj. 11Wu'ne cchmetel nimxix xjal cywi'ye, ax icx ke alumaj cchmetel nimxix cybaj. Che tel nimcu xjal ic tza'n tej cyten ojtxi ex che ank'il mas ba'n ic tza'n ojtxi. C'eleltzun cynic'e ti'j, akine Dios. 12Che tzajel wi'ne ke aj Israel, akeju etzan wu'ne, tu'n cynajan cywi'ye, che oquel te cyajwile, ex mlay che cyaj tentl minti' cyc'wa'l cyu'ne. 13Akine Dios in xi nma'ne jlu: Akeye witz in k'manjtz cyi'je cyja': Ba'n che chyo'ne xjal, ex in cyaj cyk'o'ne cytanmiye minti' c'wa'l tuj. 14Atzun ja'lo mlay txi cychyo'ntle ke xjal, ex mlay cyaj cyk'o'ntle cytanmiye minti' c'wa'l tuj. Akine Dios in chin k'mante jlu. 15Mlay txi nk'o'ntle ambil tu'n cybinteye juntl maj ke yasbil cyu'n ke xjal cyuj mastl nasyon; ex mlay che xmayintl mastl tnam cyi'je, ex mlay cyaj cyk'o'ntle cytanmiye minti' c'wa'l tuj. Akine Dios in chin k'mante jlu. 16Tzaj yolin Kman wuc'ile ex tma cyja': 17Aya xjal, tej ate'xtok aj Israel tuj cytx'otx', baj cytz'ilsa'n tu'nju cybinchben mya ba'n. Puro tz'il oc cybinchben nwitze, ic tza'n nno'c jun xu'j oc tc'ulul ẍwo'j ti'j. 18Tzajtzun nimxix nk'oje cyi'j tu'nju cub cybyo'n nimcu xjal tuj cytanmi, ex baj cytz'ilsa'n tu'nju e c'ulun cywitz ke tilbilal. 19Cub nk'o'ne cycastiw tu'n tlaj ju cybinchben mya ba'n, ex e baj nsputune cyxol mastl tnam ex cyxol mastl nasyon. 20Cyuj cycyakil tnam jatum e pon, e yolin xjal mya ba'n ti'j nbiye xjan tu'n cylaj, ex cyma xjal cyi'j cyja': Atzun ke xjal lu etzan ke tu'n Dios, ¿tza'ntzun tten ma che etz tlajo'n tuj ttx'otx'? 21Tzajtzun ta'w tuj wanmiye tej nlonteye, tu'n cylaj aj Israel e yolin xjal mya ba'n ti'j nbiye cyuj ke nasyon jatum e pon k'i'n. 22Tu'ntzun jlu, k'manxa cye aj Israel: Atzun jlu in tma'n Kman: Aju cbantel wu'ne mya nok tu'n cylaje, akeye aj Israel, nok o'cx tu'n tjaw nimsa'n nbiye xjan, aju ma tz'oc cyk'o'ne te minti' tajben cyxol ke nasyon jatum ma che pone. 23C'oquel nk'o'ne nbiye xjan te ma'xix toclen, aju ma tz'oc cyk'o'ne te minti' tajben cyxol ke nasyon. Octzun tbant jlu wu'ne, c'eleltzun cynic' wi'je, akine Dios. Akine Dios in chin k'mante jlu. 24Che eletz wi'ne cyuj cycyakil ke nasyon lu ex cyuj ke tnam; che oquel nchmo'ne, ex che ul meltz'aje juntl maj wu'ne tuj cytanmiye. 25C'oquel nchitune a' sak cyi'je, ex che tx'jetele wu'ne te tcyakil mya ba'n. Che tx'jetele wu'ne tu'nju baj cytz'ilsan cyibe tej cyc'ulune cywitz ke tilbilal. 26C'oquel cyanmiye ex cynable te ac'aj wu'ne. Porque ja'lo ic tten cyanmiye ic tza'n jun abj puro cyuw, pero cch'expetel wu'ne tu'n toc te k'uyin ex ba'n niman. 27Ctel Nxewe tuj cyanmiye, ex chin onile cyeye tu'n cyjapun ke nleye ex ke nxnak'tzbile cyu'ne. 28Che najale tuj ju tx'otx' xi nk'o'ne cye cyxe'chele, che oquele te weye, ex atzun weye chin oquele te Cydiose. 29Che cletele wu'ne tu'n mi'n cybinchantle mya ba'n aju in che tz'ilixe tu'n. Ctzajel nk'o'ne nim triw ex mlay tzaj nsama'ntle juntl maj we'yaj cyi'je. 30Ax icx ctzajel nk'o'ne nim cywitz tze' ex nim twitz awal tuj cojbil, tu'ntzun mi'n tcub juntl maj cych'ixwiye cywitz ke mastl nasyon tu'n tlaj we'yaj. 31Oc ttzaj cyna'ne aju cymodiye mya ba'n ex ju cybinchbene mya ba'n, ctzajeltzun cych'ixwiye tu'n tlaj cyile ex cybinchbene mya ba'n ic'unxix wu'ne. 32Akine Dios in chin k'mante jlu: Tz'elx cynic'e ti'j, akeye aj Israel, mya tu'nju ba'n keye cbantel jlu wu'ne; tzajx cych'ixwiye ex najx cynable tu'n tlaj cybinchbene mya ba'n. 33Akine Dios in chin k'mante jlu: Oc cybaj tx'jete wu'ne te tcyakilju cyile, che najale juntl maj tuj cytanmiye ex cjawil cybincha'ne juntl maj ke ja o che cub xitj. 34Aju tx'otx' otok cyaj colin ex otok tz'oc cyque'yin cycyakil xjal e ic' bet ttxlaj, che ak'nal xjal juntl maj ti'j tu'n ttzaj tawal. 35Ex oc cyma xjal cyja': Aju tx'otx' otok cyaj colin ma tz'oc ic tza'n tkan awal tuj Edén puro tbanil; ke tnam otok che cub xitj ex otok che cyaj colin ex otok che baj naj, ja'lo ma che jaw bincha'n ke nmak ja cyuj ex at xjal najl cyuj. 36Atzun ke nasyon cyvesin cyib cyuc'ile ex otok che cyaj ank'in, c'elel cynic' ti'j, akine in jaw nbincha'ne juntl maj aju otok cub xitj, ex in cu'x wawa'ne juntl maj aju otok naj. Akine in chin k'mante jlu, ex cbantel wu'ne. 37Akine Dios in chin k'mante jlu: Ax icx cxel nk'o'ne cye aj Israel aju ctzajel cykanin weye tu'n tbant wu'ne. Cchmetel cybaj wu'ne ic tza'n cybaj txkan ẍne'l. 38Ke tnam cubni xitj cchmetel nim xjal cyuj, ic c'oquel cyajlal xjal cyuj ic tza'n cyajlal ke ẍne'l in che'x k'i'n tuj tnam Jerusalén tu'n cycub byet te jun chojbil cyuj nink'ij ma' cyoclen. Atzun c'elel cynic' ti'j, akine Dios.

will be added

X\