EZEQUIEL 35

1Tzaj yolin Kman wuc'ile ex tma cyja': 2Que'yinxa tumlal ju witz Seir ex k'manxa yol ti'j, aju cxel nma'ne teya. 3K'manxa cyja': Atzun jlu in tma'n Kman: Ma chin oque aj k'oj ti'ja, aya witz Seir, ex cbel tcastiwoya wu'ne, cbel xitja ex c'oquela te tzkij tx'otx'. 4Che bajel nxitune ke tnam ate' tuj tcwenta, atzun teya c'oquela te tzkij tx'otx'. C'eleltzun tnic'a ti'j, akine Dios. 5Atxix ojtxi ax icx ja'lo cucx cyk'ojine cyi'j aj Israel, e oc tzokpaje k'ojlel cyi'j tej tcub aju mancbil cycastiw tu'n tlaj cyil. 6Pero akine Dios in xi nma'ne jun yol axix toc; che xel nk'o'ne tu'n cycyime, at cyile tu'nju ma che cub xjal cyu'ne, cyja'tzun ax icx cyeye che bel byo'ne. 7Aya tiwitz tx'otx' Seir c'oquela wu'ne te tzkij tx'otx' minti' xjal cnajal tuj, ex mi jun xjal cbetel tuj. 8Ke nmak witz ex ke tal witz, cyuc'ix ke chk'ajlaj cyxol witz, cyuc'ix ke tk'ab xak ate' tuj tcwenta, che nojel wu'ne tu'n cyximlal cyimni che cymel tuj k'oj. 9Te jumajx c'oquela wu'ne te tzkij tx'otx', ex mi jun xjal cnajal cyuj ke tnam ate' tuj tcwenta. C'eleltzun cynic'e ti'j, akine Dios. 10Tu'nju xi tma'na cyja': Ke cabe nasyon Israel ex Judá tuc'ix cytx'otx' che oquel te weye; akine chin oquel te cyajwil masque najl Kman tuj, chiya, 11cyja'tzun akine Dios in xi nma'ne jun yol axix toc: Ic tza'n teya o tzaj tk'oja ex tlo'ch tc'u'ja cyi'j aj Israel ex o che el tic'una, icxtzun oc nbincha'ye ti'ja. Oc tcub tcastiwoya wu'ne, c'elel cynic' aj Israel wi'je. 12C'eleltzun tnic'a ti'j, akine Dios otok nbiye tcyakil tyasbila tzaj tma'na cyi'j ke witz te Israel. Tmaya cyja': Ma che najx ke, ma che tzaj k'o'n te ncanbe, chiya. 13Nim jaw tniman tiba nwitze ex o yasuna wi'je. O nbiye jlu, chi Kman. 14Atzun jlu in xi nma'ne, akine Dios: Cycyakil xjal tuj tcyakil twitz tx'otx' che jawil tzalaj oc tnaja wu'ne. 15O jaw tzalaja tej tnaj tx'otx' aju cyc'am aj Israel te cyetzbil, ax icxtzun cbajel ti'ja: C'oquela te tzkij tx'otx', aya witz Seir, tuc'ix tcyakil tx'otx' cye aj Edom. C'eleltzun cynic' ti'j, akine Dios.

will be added

X\