EZEQUIEL 34

1Tzajtzun yolin Kman wuc'ile ex tma cyja': 2Aya xjal, yolina te nxele cyuc'il ke pastor cye aj Israel ex k'manxa cye cyja': Chi Kman: Bec'bil cywitz ke pastor cye aj Israel, porque o'cx cye nno'c cycwentin cyib. ¿Myapetzun ake ẍne'l ex ke chip tu'n cyoc cycwentin? 3In che c'ane ti'j cylech chip, in baj cybincha'ne cytzmal ẍne'l te cyxbalune, in cub cybyo'ne ke ẍne'l mas ulni cynabl te cychi'ye, pero minti' in che oc cycwentine ke. 4Minti' in che onine cyi'j ke ẍne'l ocni cyi'j, minti' in che oc tene k'anal cyi'j ke yab, minti' nno'c cypotzine ti'j cykan otok tokj, minti' in che ajtz cyi'ne keju otok che'x najchak tuj c'ul, ex minti' in che oc tene jyol cye keju otok che cyaj tzpet, nok o'cx cyuw in che'xe cyi'j ex in tzaj cytx'u'jile cyi'j. 5Ma che baj sputj ke nẍne'le tu'n tlaj mi a'l pastor cyi'j ex ma che'x chyo'n cyu'n txcup te tjak' chc'ul. 6Ma baj cysputun cyib cywi' cycyakil witz, ex cywi' ke nmak witz, ma che'x tzpet tuj tcyakil twitz tx'otx', ex mi a'l jun ma tzaj tbis cyi'j ex mi a'l jun ma txi' jyolte cye. 7Cyja'tzun akeye pastor, cyk'ontzxix cywi'ye ti'j nyole. 8Akine Dios in xi nma'ne jun nyole axix toc: Cycyakil txcaj txcup te tjak' c'ul ma che'x cyelk'a'n ke nẍne'le ex ma che'x cychyo'n tu'nju mi a'l pastor cyi'j. Ke pastor minti' in che'x jyol cye ke ẍne'l. Ax ke nno'c cycwentin cyib ex mya cyi'j ke ẍne'l in che cwentin. 9Cyja'tzun akeye pastor cybintze ke yol 10in xi nma'ne cyeye, akine Dios: Akeye pastor, in xi nma'ne cyeye: Ma chin oque te aj k'oj cyi'je, ex che xel nkanine ke nẍne'le cyeye; c'elel wi'ne cyak'une te pastor tu'ntzun mya cucx tu'n toc cycwentin cyibe; ex che colpetel ke nẍne'le wu'ne, tu'ntzun mya cucx tu'n cycub cybyo'ne te cychi'ye. 11Akine Dios in chin k'mante jlu: Ax kine chin xe'le jyolte cye ke nẍne'le ex che oquel ncwentine. 12Ic tza'n nno'c tcwentin jun pastor ke tẍne'l oc tbaj cysputun cyib, icxtzun weye che oquel ncwentine ke nẍne'le; che ajetz ncolpi'ne cyuj ke lugar jatum ma che pon sputj tuj jun k'ij klolj ex k'ek muj. 13Che eletz wi'ne cyuj ke tnam najchak ate', che oquel nchmo'ne ex che ul wi'ne juntl maj tujx cytx'otx'. Che xel wi'ne tu'n cywa'n cywi' ke witz tuj cytx'otx', ex cyuj ke tk'ab xak, ex cyuj cycyakil lugar jatum najl ke xjal. 14Che xel wi'ne tu'n cywa'n ti'j tbanil c'ul cywi' ke nmak witz tuj cytx'otx'. Atzun jacu che ojlan ex jacu che wa'n ti'j tbanil c'ul. 15Ax kine chin oquel pastor cyi'j ke nẍne'le, ex ax kine chin xel k'inte cye tu'n cyojlan. Akine Dios in chin k'mante jlu. 16Chin oquel tene jyol cye ke ẍne'l otok che'x tzpet, che ajetz wi'ne keju otok che elnaj ti'j cybe, c'oquel npotzine ti'j cykan otok tokj, chin onile cyi'j keju minti' cyipun, atzun keju ulni cynabl ex at nim cyipun che najel wu'ne. Tuj tumelxix che oquel npastorine ke nẍne'le. 17Akine Dios in chin k'mante jlu: Cybintze akeye nẍne'le: Che oquel ke ẍne'l cyuc'ix ke chip tuj xjel wu'ne ti'j cybinchben. 18Minti' in ke' cyc'u'je ti'j ex in che wa'ne tbanil c'ul, in baj cywabane aju c'ul in cyaj ten; in xi cyc'a'ne aju a' sak, atzun mastl in baj cyẍwo'jine tu'n cykane. 19Atzun ke nẍne'le ilx ti'j tu'n t-xi cywa'n aju c'ul otok baj cywabane ex tu'n t-xi cyc'a'n aju a' otok baj cyẍwo'jine twitz. 20Tu'ntzun jlu akine Dios in xi nma'ne jlu cyeye: Cxel nbincha'ne cyi'j ke ẍne'l ocni cyi'j ex ke ẍne'l ulni cynabl. 21Akeye ẍne'l ulni cynable, ma che ex cylak'ba'ne keju minti' cyipun, ma che ex cylamo'ne ke ex ma che oc tzokpaje cyi'j tu'n cyjaw cyẍu'yine, tu'ntzun jlu ma che el ok. 22Pero chin oquel tene colil cyi'j ke nẍne'le. Mlay wak'tle ambil tu'n cucx cyyajlanjtz. Teyle junjun ẍne'l c'oquel tuj xjel wu'ne ti'j alcye ma tbincha ti'j juntl tuc'il. 23Tzul wi'ne jun pastor, ex tjunal te cpastoril cyi'j; atzun nmajene David c'oquel nk'o'ne te pastor, ex a c'oquel cwentin cye ẍne'l. 24Akine Cyman chin oquele te Cydios, atzunte nmajene David c'oquel te nejenel cye. Akine Dios in chin k'mante jlu. 25Cyjel bant ti'j jun nyole cyuc'il tu'n cyten tuj txubtxaj. Che bel naj ke txcup wu'ne tuj cytanmi tu'ntzun cyank'in ke nẍne'le tuj txubtxaj tuj cojbil, ex tu'n mi'n cyxob oc cytan tjak' c'ul. 26Che bel ncy'iwla'ne ke, ax icx ke lugar ti'jele aju witz etzan wu'ne; ctzajel nk'o'ne jbal te xtalbil cyibaj tujxix tk'ijlalil. 27Ke tze' tuj cojbil oc cyk'a' cywitz, aju tx'otx' oc tk'a' twitz tawal, ex ke ẍne'l che tel tuj txubtxaj tuj cyex cytanmi. Oc cycolpet ke xjal etzan wu'ne tuj cyk'ab keju in che yajlan cyi'j, atzun c'elel cynic' ti'j, akine Dios. 28Mlay tz'el cyi'n ke mastl nasyon tcyakilju at cye, ex mlay che cub cyu'n ke txcup tu'n cyxi cychyo'n. Che tel tuj txubtxaj ex mi a'l jun c'oquel sec'punte cye. 29Cxel nk'o'ne cytx'otx' tbanilxix yolbil te tu'nju nim twitz awal in tzaj tuj, ex mlay che cyaj ten tuj we'yaj; mlay che xmayin juntl maj ke mastl nasyon cyi'j. 30Atzun c'elel cynic' ti'j, atine cyuc'il, akine Cyman ex Cydios, ex c'elel cynic' aj Israel ti'j ka etzan ke wu'ne. Akine Dios in chin k'mante jlu. 31Akeye nẍne'le, pastorin keye wu'ne, xjal ke'ye ex akine Cydiose. Akine Dios in chin k'mante jlu.

will be added

X\