EZEQUIEL 3

1Tmatzun weye: Aya xjal, wa'nxa ju u'j tz'iban yol twitz, aju ma tzaj yec'un teya, ex txi'ya yolil cyuc'il aj Israel. 2Xitzun nc'abine tuj ntzi'ye, tzaj tma'n weye tu'n t-xi nwa'ne ju u'j tz'iban yol twitz, 3ex tma cyja': Balk'unxtzuna ja'lo aju u'j ma txi nk'o'ne teya, aju tz'iban yol twitz, ex e tnoj tc'u'ja tu'n, chi tzaj tma'n weye. Xitzun nwa'ne, ex o nna'ye puro chi' wen ic tza'n ta'l cab. 4Ex tmatl weye cyja': Txi'ya, ex k'manxa cye aj Israel aju yol cxel nma'ne cye. 5Minti' in xi nsama'na tuj jun tnam jatum junxitl yol in che yolin xjal ti'j ex cyuw tu'n tel tnic'a ti'j, ax cyxol aj Israel cxel nsama'na. 6Minti' in xi nsama'na cyuj txkantl nasyon, akeju junxitl txcaj yol in che yolin ti'j, ex ka cyuw te teya tu'n tel tnic'a ti'j. Nokwit a xi nsama'na cyuj ke tnam lu, jacu txi bi'n tyola cyu'n. 7Atzun cye aj Israel, baka cxel cybi'n tyola, porque mi cyaj tu'n t-xi cybi'n aju weye nyol. Cycyakil aj Israel cyuw cywi' ex cyuw cyanmi. 8Pero ax icx teya c'oquela cyuw wen wu'ne ic tza'n cye. 9C'oquela cyuw wen wu'ne, ic tza'n jun tbanil abj diamante tbi mas cyuw cywitz ke mastl abj. Mi'n xoba cywitz, ex mi'n jaw sec'paja cywitz masque jumajx miban che bi'n. 10Ex tmatl weye cyja': K'ontzxix twi'ya ti'j ju yol cxel nma'ne teya, ex bi'x k'on cyaja tuj tnabla. 11Txi'ya que'yil cye ke t-xjalila o che ul k'i'n tzalu, ka xi bi'n tyola cyu'n ex ka mi'n, pero k'manxa cye cyja': Atzun jlu in tma'n Kman, chicuya, chi tzaj tma'n weye. 12In jawtzun k'i'ne tu'n tipumal Dios, ex o nbiye jun tk'ajk'ajel ma wi'jxiye in jululun wen ex in tma'n cyja': Nimanxwit tajwalil Kman tujx tlugar. 13Aju tk'ajk'ajel o nbiye, atzun tk'ajk'ajel cyxic' ke jil oc in pon jukl te jun ti'j te juntl, ax icx cyk'ajk'ajel ke rwed junx ate' cyuc'il; aju tk'ajk'ajel in jululun wen. 14In jawtzun k'i'ne tu'n tipumal Dios ex in etz k'i'ne tuj lugar lu, cubtzun be wu'ne, tzaj ta'w tuj wanmiye, ex tzaj tlo'ch nc'u'je tu'nju tzyu'n kine cyuw wen tu'n tk'ab Kman. 15Ex in pone tuj tnam Tel Abib ttzi nima Quebar, jatum najl ke aj Israel otok che pon k'i'n tuj Babilonia, in cub ke'ye cyxol, ex wuk k'ij in tene cyuc'il minti' ba'n wu'ne alcye tu'n tbant, ex alcye yol tu'n t-xi nma'ne cye. 16Tbajlenxi wuk k'ij lu tzaj yolin Kman wuc'ile ex tma cyja': 17Aya xjal, ma tz'oc nk'o'ne te xk'ukil cye aj Israel. Oc t-xi nma'ne jun yol teya, il ti'j tu'n t-xi tma'na cye xjal te nxele, tu'n cybinte alcye ctzajel cyi'j. 18Ka ma txi nma'ne tu'n tcub t-sentens jun xjal binchal mya ba'n tu'n tcyim; ex ka ma mi'n yolina tuc'il, ex ka mi'n ma txi tma'na tu'n tcyaj tcolin tmod mya ba'n tu'ntzun cucx tank'in, ax toc cymel xjal lu tu'n tlaj til, atzun teya oc tk'a'ya tajlal weye ti'j tcamic xjal. 19Katzun ma txi tma'na teju xjal binchal mya ba'n, ex ka ax te xjal minti' ma txi tcolin tu'n tbinchante mya ba'n ex minti' ma ch'expet tmod mya ba'n, ax toc cymel te xjal lu tu'n tlaj til, atzun teya mlay cyima, porque minti' tila tu'n tlaj jlu. 20Ax icx jun xjal tz'aklxix, ka ma cyaj tcolin tu'n tbinchante ju tzak'lxix nok tu'n tbinchante ju mya ba'n, ex ka ma cub nk'o'ne jun tolsabl twitz, ka mi'n ma txi tma'na te, cymel, mlayx tzaj nna'ne aju ba'n otok tbincha ex cymel tu'n tlaj tex til, atzun teya oc tk'a'ya tajlal weye ti'j tcamic xjal lu. 21Katzun ma txi tma'na teju xjal tz'aklxix tu'n mi'n tbinchan il, ex ka mi'n ma binchan il, cucx c'ank'il porque otok txi tbi'n aju otok txi tma'na te, atzun teya mlay cyima, tu'nju otok txi tma'na te. 22Ax tujx lugar lu, o nna'ye tipumal Kman, ex tma weye cyja': We'ctza ex texa tuj chk'ajlaj, porque atzun chin yolile tuc'ila. 23In jawtzun we'ye, ex in ex bete tuj chk'ajlaj, ex atzun o wile tajwalil Kman ic tza'nx otok wile nej ttzi nima Quebar. In cub ẍmeje'ye ex pon tacl tibaj nwitze max twitz tx'otx'. 24Ex o nc'ame tipumal Dios ex in jaw wabane tu'n. Tzajtzun yolin Kman wuc'ile ex tma cyja': Txi'ya ex lamo'n ocx tiba tuj tjaya. 25Bintza, cbel c'alo'na tu'n sakbak cyu'n xjal, tu'ntzun mi'n tetza ex tu'n mi'n ttena cyxol. 26Ax icx c'oquel tlac'on tib tak'a twitz tc'o'na wu'ne, tu'ntzun mi tbant tyolina. Mlayx bant tu'n cyoc tmayo'na, porque ke xjal lu jumajx miban che bin. 27Porque nok alcye k'ij waje tu'n t-xi nma'ne jun nyole teya, cbantel tyolina juntl maj, cxeltzun tma'na cye cyja': Atzun jlu in tma'n Kman. Alcye jun taj tu'n tbin, ba'n tu'n tbinte, ex alcye jun mi'n taj tu'n tbin, ba'n tu'n mi'n tbinte, porque ke xjal lu jumajx miban che bin.

will be added

X\