EZEQUIEL 26

1Tuj tnejel k'ij te xjaw te tjunlajin abk'i, tzaj yolin Kman wuc'ile ex tma cyja': 2Ke xjal te tnam Tiro o cyma ti'j tnam Jerusalén cyja': Aju tpwertil ja te c'aybil cyxol ke nasyon ma baj buchj. Atzun weye ma chin cambane ja'lo. Ctel nimxix nk'inumable, atzunte tnam Jerusalén ma cub xitj, che chi. 3Cyja'tzun akine Dios in xi nma'ne jlu: Akeye aj Tiro, chin oquele aj k'oj cyi'je. Che tzajel wi'ne nimcu nasyon tu'n cyk'ojin cyi'je, ic tza'n in jaw xtulk'in mar, 4cbel cyxitun ke muro toc ti'jele cytanmiye, ax icx ke ja ma' cywa'l te cycolbil cyibe. Tuc'ixpe tx'otx' cbajel ntz'iso'ne, ex junx te pic cyjel ten minti' tx'otx' tibaj. 5Tuj tmijil mar c'oquel te tzkijsabl cye xyub tzuybil cyiẍ. Akine Dios in chin k'mante jlu. C'elex cyelk'a'n ke nasyon tcyakilju at tuj tnam Tiro. 6Ke xjal najlke cyuj ke aldey te tnam Tiro che bel byo'n tu'n spad. C'eleltzun cynic' ti'j, akine Dios. 7Akine Dios in xi nma'ne jlu: Ctzajel nsama'ne Nabucodonosor aju rey te tnam Babilonia, at tuj tx'otx' tuj tbank'ab k'ij, aju rey at nimxix tipun cywitz cycyakil rey, c'oqueltzun tzokpaj ti'j tnam Tiro. Tzul cyuc'il chej cyuc'ix carwaj, cyuc'ix ke xjal k'ojlel cyjax cyibaj chej, ex cyuc'il nim soldad. 8Che bel byo'n tu'n spad ke xjal najlke tuj aldey te tnam Tiro; cjawil tbincha'n rey jun muro ti'jele tnam, cjawil tbincha'n t-xwe'tzbil tu'n toc tzokpaj ti'j ex che oquel tzokpaj ke soldad ti'j, banin cyten tuc'il cymakbil. 9Che oquel tzokpaj ti'j tnam tuc'il máquina in ajben te xitbil muro, ex tu'n barret cbel cyxitun ke ja ma' cywa'l te cycolbil cyib. 10Octzun tocx rey te Babilonia ttzi tpwertil tnam, c'oquex ic tza'n in che ocx ke xjal tuj jun tnam otok cub ti'j, che oquextzun nim chej, ex cbajel noj tuj tnam tu'n kuk oc tjaw tu'n cykan; che tzajel lu'lun ke muro tu'n cyk'ajk'ajel ke carwaj ex tk'ajk'ajel cykan chej cyjax ke k'ojlel cyibaj. 11Cbajel cywaban ke chej cyuj cycyakil cay. Cbel tbyo'n rey cycyakil ke xjal tu'n spad, ex che ic'el tz'ak ke tkan ja, akeju cyuwxix cyten. 12C'elel k'i'n cyk'inumable cyu'n, cxel cyelk'a'n cyc'a'ẍe, cbel cyxitun ke muro toc ti'jele tnam; ax icx ke ja tbanilxix che que'yin, ke viga, ke abj, ke ttx'akan tze' ex ke ttx'akan ja otok che cub xitj che xel cyxo'n tuj mar. 13Cyja'tzun bi'x cwebel tk'ajk'ajel cybitze wu'ne, ex mlay binjtz juntl maj tk'ajk'ajel twi' cychinbe arpa. 14C'oquel cytanmiye wu'ne te jun pic minti' tx'otx' tibaj, c'oquel te tzkijsabl cye xyub tzuybil cyiẍ, ex mlayx jaw bincha'n juntl maj. Akine Dios in chin k'mante jlu. 15Akine Dios in xi nma'ne jlu ti'j ju tnam Tiro: Ke tnam ate' ttzi'yile mar che tzajel lu'lun oc cybinte tk'ajk'ajel oc tcub xitj tnam Tiro, oc cyjaw ayayan keju otok che c'ixbi ex oc cybyet ke xjal najlke tuj. 16Cycyakil ke rey in che cawin cyuj ke tnam ate' ttzi'yile mar che beletz tuj cyk'ukbil, c'elel cyi'n cyẍjo'w, icx cyxbalun tbanilxix que'yin; ex tu'n cyxobil che bel ke' twitz tx'otx' ex che tzajel lu'lun tcyakil or tu'n cyxobil oc cylonte aju otok baj ti'j tnam Tiro. 17Cxeltzun cybitzan ju bitz lu te bis ti'j tnam Tiro: Tza'n tten ma cub xitja, aya tnam najlke xjal tuja, akeju in che ak'nan tuj mar, aya tnam tbanilxix yolbil teya. Aya, cyuc'ix ke xjal najlke tuja e oque nimxix cyipune cywitz ke mastl tnam ate' ttzi'yile mar, ex ke mastl tnam tzaj cyxobil cyu'ne. 18Atzun ja'lo, tu'nju ma cub xitja in che lu'lun tu'n cyxobil ke tnam ate' ttzi'yile mar. Ja'lo tu'nju ma cub naja, ma che jaw sec'paj ke tnam ate' ttzi'yile mar. 19Atzun jlu in xi nma'ne, akine Dios: Bi'x cbel xitja wu'ne ic tza'n ke tnam jatum mi jun xjal najl tuj. Ex cyjel mulk'aja wu'ne tjak' mar ma' t-xe; 20max cpola tuj cynajbil cyimni, jatum ate' ke xjal e ank'in tuj tk'ijlalil ojtxi. Cbelex nxo'ne max t-xe'pun tx'otx' jatum ate' ke tnam o che cub xitj te jumajx, ex cnajala cyxol keju o che cyim. Mlayx che najan juntl maj ke xjal tuja, ex mlayx jaw bincha'na juntl maj cyxol ke xjal itz'x ke twitz tx'otx'. 21Oc cylonte xjal jlu bi'x che jawil sec'paj ti'ja ex bi'x cnajela. Che jyol ke xjal ti'ja ex mlay cneta cyu'n. Akine Dios in chin k'mante jlu.

will be added

X\