EZEQUIEL 25

1Tzaj yolin Kman wuc'ile ex tma cyja': 2Aya xjal, que'yinxa tumlal cytanmi aj Amón ex k'manxa cye aju mya ba'n oc cybincha. 3K'manxa cye tu'n cybinte aju yol in xi nma'ne cye cyja': E jaw sch'ine tu'n tzalajbil tej cylonteye otok cub xitj njaye, ex otok baj xitj cytanmi aj Israel ex keju najlke tuj Judá otok che'x k'i'n pres tuj juntl tnam najchak. 4Cyja'tzun che xel nk'o'ne tu'n cycyaj tene tjak' cycawbil ke tnam te tumlal tjawitz k'ij, c'elel cyetzan cytx'otx'e, ex cbel cyk'o'n cyja xbalun cyxole jatum tu'n cycub ten. Atzun ke che xel nic'bente twitz cyawale ex cxel cyc'a'n cyc'aye lech. 5Aju tnam Rabá c'oquel wu'ne te cywabl chej camey, atzunte tnam Amón c'oquel wu'ne te cywabl ẍne'l. C'eleltzun cynic'e ti'j, akine Dios. 6Akine Dios cxel nma'ne jlu: Akeye aj Amón o jaw txak'an cyk'abe, o che jaw t'icpaje tu'n tzalajbil, ex o tz'el cyic'une cytanmi aj Israel. 7Cyja'tzun cbel cycastiwoye wu'ne ex che xel nk'o'ne cye ke nasyon tu'n tel cyi'n tcyakilju at cyeye. Che najele wu'ne cyxol mastl tnam, che bel naje wu'ne cyxol ke nasyon, bi'x che najele cycyakile. C'eleltzun cynic'e ti'j, akine Dios. 8Akine Dios in xi nma'ne jlu: Ke aj Moab ex ke aj Seir in cyma'n: Aju tnam Judá junx ta' ic tza'n ke txkantl nasyon. 9Cyja'tzun che tzajel wi'ne ke aj k'oj tu'n cyoc tzokpaj cyi'j ke tnam ate' ttxa'nile tx'otx' Moab, ex che bel nxitune cycyakil tnam ate' tuj tx'otx' Moab, cyuc'ixpe ke tnam Bet-jesimot, Baal-meón ex Quiriataim, akeju mas tbanilxix ke. 10Cxel nk'o'ne cytx'otx' aj Moab tuc'ix cytx'otx' aj Amón cye ke xjal najlke tuj tjawitz k'ij, cyja'tzun cyxol ke nasyon mi jun xjal tzul na'nte ju tnam Amón. 11Cbel cysentens aj Moab wu'ne ex c'eleltzun cynic' ti'j, akine Dios. 12Akine Dios in xi nma'ne jlu: Ke aj Edom o xelin cyu'n cyi'j ke aj Judá, ex tu'n jlu at cyil. 13Tu'ntzun jlu akine Dios in xi nma'ne jlu: Cbel cycastiw aj Edom wu'ne, che najel ke xjal ex ke alumaj, ex bi'x cbajel xitj tcyakil wu'ne. Che cymel ke xjal tu'n spad, ctzajelx ke' tuj tnam Temán cpol baj tuj tnam Dedán. 14Cxelil wu'ne cyi'j aj Edom cyu'n aj Israel; cbel cyk'o'n nim cycastiw aj Edom tu'nju at nim ntx'u'jile cyi'j. Cyja'tzun c'elel cynic' ti'j oc t-xelin wu'ne. Akine Dios in chin k'mante jlu. 15Akine Dios in xi nma'ne jlu: Ke aj Filistey ma xelin cyu'n, tuc'il cyanmi nojni tu'n ic'bil; atxix ojtxi aj k'oj ke cyi'j aj Israel, ex oc tilil cyu'n tu'n cynaj. 16Tu'ntzun jlu akine Dios in xi nma'ne jlu: Cbel cycastiw aj Filistey wu'ne; che bajel naj ke aj Ceretey wu'ne, ax icx che najel wu'ne keju najlke ttzi mar. 17Cxelil wu'ne cyi'j tuj jun tumel xobajilxix; cbel cycastiw wu'ne tuc'il ntx'u'jile. Oc tbant jlu, c'eleltzun cynic' ti'j, akine Dios.

will be added

X\