EZEQUIEL 24

1Tuj tlajin k'ij te tlajin xjaw te tbelajin abk'i, tzaj yolin Kman wuc'ile ex tma cyja': 2Tz'iban cu'xa aju tajlal xjaw te k'ij ja'lo, porque ja'lo ma tz'oc tzokpaj rey te Babilonia k'ojlel ti'j tnam Jerusalén. 3Ex k'manxa jun techal cye xjal cyc'i' che bin, tu'n tajben te jun yec'bil te cye. K'manxa cye aju yol cxel nma'ne teya: K'on jaxa jun c'il tibaj k'ak' ex k'on cu'xa a' tuj; 4K'on cu'xa ela' piẍ twitz chibj tbanilxix tuj, aju nne'l ti'j tcux ẍne'l ex ti'j ttzal ti'j, ax icx k'on cu'xa ke bak tbanilxix. 5K'intza jun ẍne'l tbanilxix ex k'on ocxa nim si' tjak', tu'ntzun tloklon wen ocxi cytzk'aj ke bak. 6Porque in tma'n Kman cyja': Ay bec'bil twitz tnam nim byol xjal at tuj. Ic tten ic tza'n jun c'il ma tzaj jlet lan tuj, ex aju lan mlayx jaw twitz c'il. K'in jatza ke twitz chibj, junjun tjatz tu'na, ocxi minti'tl tcyaj ten tuj c'il. 7Nojni tuj tnam tu'n cychc'el xjal e cub byo'n; ex mya twitz tx'otx' tcub chic', nokwit tcub twitz tx'otx' jacwitlo cub naj tu'n kuk, pero jlu tcub tibaj pic minti' tx'otx' tibaj. 8Ax cyjel nk'o'ne chic' tibaj pic minti' tx'otx' tibaj, cyja'tzun mlayx bant tmakset tibaj, tu'ntzun ttzaj nimxix nk'oje cyi'j ex tu'n tcub cycastiw wu'ne, chi Dios. 9Porque in tma'n Kman cyja': Ay bec'bil twitz tnam at nim byol xjal tuj. Ax kine chin oquel chmonte si' ti'j. 10Chmo'n oca nim si' tjak' c'il ex e tc'ant-xix k'ak' tjak' wen ex e cytzk'aj ke twitz chibj, ocxi taj tzkij ta'l ex ocxi cybaj tz'e'y ke bak; 11Bix jax tk'o'na c'il juntl maj tibaj k'ak' aju minti' tuj, ocxi toc ju c'il scolin tu'n k'ak' ex ocxi t-sakix minti'tl tz'il ti'j; ex ocxi tcub naj aju lan otok tzaj jlet tuj. 12Masque bant icju pero atx lan tuj, minti' ma sakix mi tu'n k'ak'. 13Tz'ilxix cybinchbene mya ba'n, akeye aj Jerusalén, o wajbeye tu'n cysakixe wu'ne tuj cytz'ilile, pero minti' ma che sakixe. Maxi che sakixtele ocxi tcub nk'o'ne nim cycastiwoye. 14Akine Dios ma chin k'mante jlu ex cbantel wu'ne icju. Ax kine chin binchalte ex mlayx tzic'x ti'j; mlay tzaj tz'e'y nc'u'je cyi'je ex mlay ch'expet nximbetze ti'j ju cbantel cyi'je wu'ne. Cbel cycastiwoye wu'ne tu'n tlaj cybinchbene mya ba'n. Akine Dios in chin k'mante jlu. 15Tzaj yolin Kman wuc'ile ex tma cyja': 16Jurat naj c'elel wi'ne ttxlaja aju t-xu'jila aju nimxix in tc'ujla'na. Pero mi'n wuyina, mi'n ok'a ex mi'n tz'etz ta'l twitza ti'j. 17Mi'n xjik'bana cyuw ex mi'n tbinchaya ic tza'n in bant cyu'n xjal oc tcyim jun cyuc'il. Mi'n tz'el ti'na c'albil twi'ya ex mi'n beta minti' t-xajbiya toc; mi'n tz'oc tmaksi'na twitza te techal tbisa ex mi'n txi twa'na aju wabj in bant cyu'n xjal oc tcyim jun cyuc'il. 18Te prim in yoline cyuc'il xjal, ex te kale atzun tcyim nxu'jile; te prim te juntl k'ij nbinchaye aju otok tzaj tma'n Kman weye. 19Tzajtzun cyma'n xjal weye cyja': Chic'bantza keye ti t-xilen aju in tbincha'na. 20Xitzun nma'ne cye: Tzaj yolin Kman wuc'ile ex tzaj tma'n cyja': 21K'manxa cye aj Israel cyja': Atzun jlu in tma'n Kman: Cbajel nxitune njaye, aju k'uklxix cyc'u'je ti'j ka cyuwxix tten, aju nimxix cyganiye tu'n cyque'yine ti'j, ex aju nim in che tzalaje ti'j; ke cycy'ajale ex ke cyme'jele ma che cyaj ten tuj Jerusalén che bel byo'n tu'n spad. 22Ex k'manxe cye cyja': Cbantel cyu'ne ic tza'nx weye ma nbincha, mlay tz'oc cymaksi'ne cywitze te techal cybise, ex mlay txi cywa'ne aju wabj in bant cyu'n xjal oc tcyim jun cyuc'il. 23Mlay tz'el cyi'ne c'albil cywi'ye ex mlay che bete minti' cyxajbiye toc. Mlay che wuyine ex mlay che jaw ok'e. Che cyjel tene minti' cyipune tu'n tlaj ju cybinchbene mya ba'n, ex che jawil ok'e cyxolxe, chicuya cye. 24Ate Ezequiel jun yec'bil te cyeye, ex tcyakilju ma tbincha oc cbantel cyu'ne. Octzun tpon tk'ijlalil tu'n ttzaj jlu, c'elel cynic'e ti'j, akine Dios. 25Aya xjal, cbel nxitune njaye at cyxol, aju k'uklxix cyc'u'j ti'j ka cyuwxix tten, aju in che tzalaj ti'j tu'nju tbanilxix ex nim cygan tu'n toc cyque'yin. Ax icx che elel wi'ne ke cycy'ajal ex cyme'jel. 26Tuj k'ij lu, tzul jun xjal k'olte tkanil teya, aju otok tzokpaj. 27Tujtzun k'ij lu cjaketel ttzi'ya, ex cbantel tyolina tuc'il ju xjal otok tzokpaj, ex mlay tentla te men. Cyja'tzun tten c'oquela te jun techal cye tnam xjal, ex atzun cye c'elel cynic' ti'j, akine Dios.

will be added

X\