EZEQUIEL 21

1Tzaj yolin Kman wuc'ile ex tma cyja': 2Aya xjal, que'yinxa tumlal tnam Jerusalén ex k'manxa tyola cyi'j ke lugar jatum in che c'ulun xjal. K'manxa aju yol cxel nma'ne teya ti'j tx'otx' Israel, 3ex k'manxa cyja': Atzun jlu in tma'n Kman: Ma chin oque aj k'oj cyi'je. Cjawitz wi'ne nspadiye tuj tjayil ex che bel nbyo'ne ke xjal tz'aklxix ex ke aj il. 4Ax toc cjawitz wi'ne nspadiye tuj tjayil tu'n cycub nbyo'ne cycyakil xjal tz'aklxix ex cycyakil aj il, cxelx ke' wu'ne tuj tx'otx' tuj tbank'ab k'ij ex cpol baj wu'ne tuj tx'otx' tuj tnayaj k'ij. 5C'elel cynic' cycyakil xjal ti'j, akine Dios otok chin jatz k'inte nspadiye tuj tjayil, ex mlayx txi nc'u'ntle. 6Aya xjal, tjaw ayayana cyuwxix tu'n ta'w bis, tjaw ayayana cywitz ke xjal. 7Katzun ma tzaj cykanin teya: ¿Tiku'n in ayayana? ka che chi, k'manxa cye cyja': In chin ayayane tu'n tlaj tkanil ti'j jun ch'ix tul canun, ex cycyakil xjal che cyjel ten minti' cyipun ex che elel bakchaj cyk'ab; mi jun ctel tipun, cycyakil ctzajel lu'lun cykan tu'n cyxobil. Ch'ix tul canun jlu, chicuya cye. Akine Dios in chin k'mante jlu. 8Tzaj yolin Kman wuc'ile ex tma cyja': 9Aya xjal, k'manxa aju yol cxel nma'ne teya, atzun jlu in tma'n Kman chicuya cye xjal: Banimaj ttzi spad ex jakumaj ti'j. 10Banimaj ttzi' tu'n cybyet xjal tu'n, ex jakumaj ti'j tu'n tkoptz'aj. Mlay ko tzalaj ti'j jlu porque ma tz'el ic'un tvar ncy'ajale mer ic tza'n nok alcyex jun tze'; 11baj jaku'n ti'j tu'n ttzyet tu'n k'abaj. Banimaj ttzi' ex jakumaj ti'j tu'n tocx k'ot tuj tk'ab byol xjal. 12Atzun teya xjal, tjaw sch'ina ex tjaw ok'a, porque aju spad banin tten tu'n cycub byo'n ke xjal etzan wu'ne, cyuc'ix cycyakil keju in che cawin cyxol aj Israel. Banimaj cysentens tu'n cycyim junx cyuc'il ke xjal etzan wu'ne; cyja'tzun k'ajtza'n oca ttzi t-xu'ca tu'n bis. 13Ax toc che oquel xjal tuj malbil. Yajtzun ka ma tz'el ic'un tvar ncy'ajale ex ka mi'n xcyaj ten, ¿titzun c'oquel? Akine Dios in chin k'mante jlu. 14Aya xjal, k'manxa cye aju yol cxel nma'ne teya; yucunxa t-spadiye ela' maj tuc'il nim tk'oja. Atzun tajben spad lu tu'n cybyet xjal tu'n, puro xobajilxix oc tbiyan, ex nno'c t-xobtza'n xjal tuj tcyakil part. 15Tu'n spad lu ctzajel cyxobil xjal ex che cymel nim xjal tu'n tuj tcyakil ja. Cpol ju spad wu'ne tu'n cycyim xjal tu'n. Aju spad jakumaj ti'j tu'n tkoptz'aj ti'j ex banimaj ttzi' tu'n cybyet xjal tu'n. 16Aya spad, byoncuya ke xjal ate' tuj bank'abaj ex tuj nayaj ex cyuj cycyakil pac'. 17Ax icx weye cxel nyucune ju spad ocxi tjatz baj nk'oje. Akine Dios in chin k'mante jlu. 18Tzaj yolin Kman wuc'ile ex tma cyja': 19K'oncuya techal cabe be, tu'ntzun tbet ju rey te Babilonia tuj, tuc'ix t-spad. Cycabil be il ti'j tu'n cyex jlet tuj junx tnam, ex jatum in xi ke' junjun be, cbel tk'o'na jun techal tu'n tk'mante alcye tnam in pon ju be. 20Ba'n tu'n tcub tk'o'na techal be jatum tu'n t-xi bet rey tuc'il t-spad. Jun techal cbel tk'o'na ti'j ju be in xi' tuj tnam Rabá cye aj Amón, atzun juntl techal cbel tk'o'na ti'j ju be in xi' tuj tnam Jerusalén, aju tnam toc muro ti'j tuj tx'otx' Judá. 21Aju rey te Babilonia cbel ten k'il swert jatum in che tzaj ke' ke cabe be: che bajel tyucun ke plech, c'oquel ten kanil xjel cye ke tilbilal, ex cbajel tque'yin tuj cyc'u'j ke alumaj, aju cytx'otx' tbi. 22Tuj tbank'ab c'oquex ten aju plech in tyec'un ti'j tnam Jerusalén, ex atzun t-xilen jlu: Il ti'j tu'n toc tzokpaj ti'j cyuc'il ke macbil te k'ojbil, ex tu'n t-xi tk'o'n orden tu'n cybyet xjal, tu'n cyjaw sch'in oc toc k'oj, tu'n cyoc tzokpaj cyi'j ke tlamel tnam, tu'n tjaw cybincha'n cyxwe'tzbil ti'j ex tu'n tbaj cytxolban cyib ti'jele. 23Tuj cywitz ke xjal najlke tuj Jerusalén mya ax toc aju tkanil lu, tu'nju otok bant ti'j jun cyyol tuc'il rey te Babilonia. Atzunte rey ctzajel tna'n aju cybinchben mya ba'n, ex che tzyetel tu'n. 24Cyja'tzun akine Dios in xi nma'ne jlu: Ke cybinchbene mya ba'n ex plojxix ma che el tuj k'ancha'l; ma tz'el tuj k'ancha'l aju il in bant cyu'ne tuj tcyakilju in cybincha'ne. Cyja'tzun che tzyetele tu'n cyxi k'i'ne pres. 25Atzun teya nejenel cye aj Israel, jumajx tk'on tiba tu'n tbinchanteya mya ba'n, lu in lak'ex ttzaj tk'ijlalil tu'n tc'monteya aju castiw cyuwxix. 26Akine Dios in xi nma'ne jlu: C'elel k'i'n c'albil twi'ya, cbeletz k'i'n coron tjax tuj twi'ya, ex tcyakil cch'expetel; keju ch'in cyoclen che oquel te ma' cyoclen ex atzun keju ma' cyoclen che oquel te minti' cyoclen. 27Tcyakil bi'x cbel xitj ex mlay jaw bincha'n juntl maj; maxi cjawil bincha'n juntl maj ocxi tul aju xinak at toclen tu'n tjaw tbincha'n. Ex tetzun cxel nk'o'ne oclenj. 28Aya xjal, k'manxa cye aj Amón aju yol cxel nma'ne teya: Tu'nju in che xmayin cyi'j aj Israel, lu spad ma jatz tuj tjayil banin tten tu'n cybyet xjal tu'n ex jakumaj ti'j tu'n tkoptz'aj ex tu'n cynaj xjal tu'n. 29Mya ax toc aju in tzaj yec'un cye ic tza'n tuj witzic', ex aju tkanil in cyma'n ti'j ju tzul puro nic'aj yol. Tu'n spad c'elel tamtz'u'n cywi' ke xjal akeju jumajx cyk'on cyib tuj mya ba'n. Ch'ix tul lak'e' tk'ijlalil tu'n tcub cycastiw. 30Cyk'on cu'xe cyspadiye tuj tjayil. Che najelxe wu'ne twitz ju tx'otx' jatum e itz'je ax tuj cytanmiye, 31ctzajel nk'oje cyibaje ic tza'n jun k'ak' xobajilxix; ex che xel nk'o'ne tuj cyk'ab ke xjal tx'u'j cywi' ex byol xjal ke. 32C'oquel tk'ak'al cytanmiye ex cbel xitun, c'elel bet cychc'ele tuj tcyakil tx'otx', ex mi jun tzul na'nte cyeye. Akine Dios ma chin k'mante jlu.

will be added

X\