EZEQUIEL 20

1Tuj tlajin k'ij te tjwe'yin xjaw te twukin abk'i, e ul junjun cytijil aj Israel kanil jun cyxjel te Kman, ex e cub ke' nwitze. 2Tzaj yolin Kman wuc'ile ex tma cyja': 3Aya xjal, yolina cyuc'il ke cytijil xjal aj Israel ex k'manxa cye cyja': Atzun jlu in tma'n Kman: ¿Mape che tzaje kanil cyxjele weye? Akine Dios in nma'ne jun yol axix toc, mlayx txi ntzak'we'ne cyxjele. 4Aya xjal, cawinxa ke ex k'manxa ju cyil ex k'manxa cye aju mya ba'n ic'unxix wu'ne o cybincha ktzan cyman. 5K'manxa cye cyja': Atzun jlu in tma'n Kman: Tej cyjaw nsc'o'ne ke aj Israel, akeju ax tiyjil Jacob, xi nma'ne jun yol axix toc cye ex xi nyec'un wibe cye tuj tx'otx' Ejipt. Xi nma'ne jun yol axix toc cyja': Akine Cymane ex Cydiose. 6Tuj k'ij tej nyoline cyuc'il xi ntziyane cye tu'n cyetz wi'ne tuj Ejipt ex tu'n cyxi wi'ne tuj jun tx'otx' otok tzaj njyo'ne te cye, aju tx'otx' lu k'inun tx'otx' ex tbanilxix, aju tx'otx' lu mas tbanilxix cywitz cycyakil mastl tx'otx'. 7Xitzun nma'ne cye cycyakil: Cycolin cyaje tu'n cyc'ulune cywitz ke tilbilal ic'bilxix ke ex mi'n baj cytz'ilsan cyibe cyu'n ke tilbilal ate' tuj Ejipt, porque akine Cymane ex Cydiose. 8Atzun cye jaw cyi'n cyib wi'je, ex minti' cyajbe tu'n t-xi cybi'n nyole; ex minti' cyaj cycolin ke tilbilal nno'c cydiosin, akeju ic'bilxix, ex minti' cyaj cycolin ke tilbilal ate' tuj Ejipt. Cub nximane tu'n ttzaj nk'oje cyi'j, ex tu'n tcub cycastiw wu'ne tuj Ejipt ocxi tjatz baj nk'oje. 9Pero minti' o nbinchaye icju tu'ntzun mi tyolinjtz mya ba'n wi'je cyu'n ke nasyon jatum najlke'tok, porque cywitz ke nasyon lu o txi nyec'un wibe cye ex o txi ntziyane cye tu'n cyetz wi'ne tuj Ejipt. 10E je'tz wi'ne tuj Ejipt ex e je'x wi'ne tuj tzkij tx'otx'. 11Atzun xi nk'o'ne ke nleye cye cyuc'ix ke nmandamyente; in cyk'o'n jlu cychwinklal xjal ka ma che japun cyu'n. 12Ax icx xi nma'ne cye tu'n cyojlan tuj k'ij te ojlabl, a jlu tu'n tajben te jun techal ti'j ju yol otok cyaj bant ti'j wu'ne cyuc'il, tu'ntzun ttzaj cyna'n akine Dios o chin el pa'nte cye tu'n cyoc te weye. 13Jawtzun cyi'n cyib wi'je tuj tzkij tx'otx', ex minti' xi cyniman ke nleye; el cyic'un ke nmandamyente, akeju otok txi nk'o'ne cye tu'n tten cychwinklal ka ma che japun cyu'n, ex oc cyk'o'n te minti' tajben aju k'ij te ojlabl. Cubtzun nximane tu'n tjatz baj nk'oje cyi'j ex tu'n cynaj wu'ne te jumajx tuj tzkij tx'otx'. 14Pero minti' nbinchaye icju tu'ntzun mi'n tyolinjtz mya ba'n wi'je cyu'n ke nasyon, akeju otok cyil tza'n tten otok che etz wi'ne ke aj Israel tuj Ejipt. 15Ax icx xi nma'ne cye jun yol axix toc tuj tzkij tx'otx', tu'n mi'n cyocx tuj tx'otx' otok txi ntziyane cye, aju tx'otx' lu k'inun tx'otx' ex tbanilxix, ex mas tbanil cywitz mastl tx'otx', 16xi nma'ne cye icju tu'nju el cyic'un ke nmandamyente, minti' xi cyniman ke nleye ex oc cyk'o'n te minti' tajben aju k'ij te ojlabl, ex o'cx oc ten cyc'u'j cyi'j ke tilbilal nno'c cydiosin. 17Masque icju pero tzaj k'ak'an nc'u'je cyi'j ex minti' e naj wu'ne tuj tzkij tx'otx'. 18Tuj tzkij tx'otx' xi nma'ne cye cyc'wa'l tu'n mi'n tel cycano'n ti'j ju in cybincha'n cyman ex tu'n mi'n t-xi cyniman aju ctzajel cyma'n cyman, ex tu'n mi'n tbaj cytz'ilsan cyib cyu'n ke tilbilal nno'c cydiosin cyman. 19Xi nma'ne cye cyja': Akine Cymane aju Cydiose. Japunx ke nleye ex ke nmandamyente cyu'ne, 20cynimanxe ke k'ij te ojlabl tu'n tajben te jun techal ti'j yol cyaj bant ti'j wu'ne cyuc'ile; cyja'tzun c'elel cynic'e ti'j, akine Cymane aju Cydiose, nchiye cye. 21Pero ax icx ke cyc'wa'l jaw cyi'n cyib wi'je. Minti' xi cyniman ke nleye ex minti' e japun ke nmandamyente cyu'n, aju in tk'o'n cychwinklal ka ma japun cyu'n, ex oc cyk'o'n te minti' cyajben ke k'ij te ojlabl. Cubtzun nximane tu'n ttzaj nk'oje cyi'j ex tu'n cynaj te jumajx wu'ne tuj tzkij tx'otx' tu'ntzun tjatz baj nk'oje. 22Pero minti' o nbinchaye icju tu'ntzun mi'n tyolinjtz mya ba'n wi'je cyu'n ke nasyon akeju otok cyil tej cyetz wi'ne tuj Ejipt. 23Tuj tzkij tx'otx' xi nma'ne jun yol axix toc cye: Oc che bajel nsputune tuj tcyakil nasyon twitz tx'otx', 24tu'nju minti' e japun ke nmandamyente cyu'n, el cyic'un ke nleye, oc cyk'o'n te minti' tajben ke k'ij te ojlabl ex o'cx e c'ulun cywitz ke tilbilal akeju in che c'ulun cyman cywitz. 25Cyja'tzun e je'x nk'o'ne ke ley mya ba'n cye ex ke mandamyent minti' cyank'ibl cyu'n. 26Xi nk'o'ne ambil cye tu'n tbaj cytz'ilsan cyib, tej t-xi cyi'n cyoyaj cywitz ke tilbilal ex cub cypatun tnejel cycy'ajal te chojbil. O nbinchaye jlu tu'n ttzaj tchi cyi'j ex tu'n tel cynic' ti'j, akine Dios. 27Atzun teya xjal, k'manxa cye aj Israel: Atzun jlu in tma'n Kman: Ax icx ti'j jlu ke ktzan cymane o tz'el cypa'n cyib wi'je ex minti' o japun nyole cyu'n. 28Tej cypon wi'ne tuj tx'otx' otok txi ntziyane cye, nok oc tcyil jun tal witz ex ka jun tze' nim t-xak, atzun xi cyk'o'n chojbil tuc'ix cyoyaj aju nimxix in tzaj nk'oje tu'n, ax icx atzun cub cyko'n perjum at tc'oc'jal ex cub cyk'o'n cyoyaj ta'l twitz uva. 29Xitzun nkanine cye: ¿Ti t-xilen ju tal witz jatum in che'x aje c'ulul? Nchiye cye. Ex oc k'o'n tbi lugar lu, Lugar jatum in che c'ulun ke xjal mya ocslal, ex ax tbi toc ja'lo. 30K'manxa cye aj Israel cyja': Atzun jlu in tma'n Kman: ¿Tiku'n ma baj cytz'ilsan cyibe ic tza'n o cybincha ktzan cyxe'chele? ¿Tiku'n minti' ma chinx cynimane ex ma che oc tene c'ulul cywitz ke tilbilal ic'unxix wu'ne? 31Oc in xi cyk'o'ne cyoyaje ex oc nno'cx cypatune cyc'wa'le tuj k'ak' te chojbil, tu'n jlu cucx tbaj cytz'ilsan cyibe cyu'n ke tilbilal. ¿Jacupe txi ntzak'we'ne cyxjele tu'nju cytene icju, akeye aj Israel? Akine Dios in xi nma'ne jun yol axix toc, mlay txi ntzak'we'ne cyxjele. 32Mlay japun cyximbetze tu'n cyoque ic tza'n ke mastl nasyon twitz tx'otx', akeju in che c'ulun twitz tze' ex twitz abj. 33Akine Dios cxel nma'ne jun yol axix toc: Tuc'il nim wipumale ex tuc'il nim ntx'u'jile chin cawile cyibaje. 34Che ajetz wi'ne cyxol ke nasyon jatum cysputun cyibe ex che oquel nchmo'ne tuc'il nim wipumale ex tuc'il nim ntx'u'jile. 35Che xel wi'ne tuj tzkij tx'otx' cye tnam, ex atzun cbel cycastiwoye wu'ne, 36ic tza'n tej tcub cycastiw ktzan cyxe'chele wu'ne ojtxi tuj tzkij tx'otx' Ejipt. Akine Dios in chin k'mante jlu. 37Cheba che bajel wajla'ne ic tza'n jun pastor in baj tajla'n ke t-ẍne'l, ex cbantel wu'ne tu'n t-xi cynimane ju yol cyjel bant ti'j wu'ne cyuc'ile. 38Che elel npa'ne cyi'je keju in jaw cyi'n cyib wi'je, ex keju o tz'el cypa'n cyib wi'je che eletz wi'ne tuj cytx'otx' stranjer xjal jatum najlke ja'lo; atzun cye mlay che ocx tuj cytx'otx' aj Israel. C'eleltzun cynic'e ti'j, akine Dios. 39Akeye aj Israel, atzun jlu in tma'n Kman: Ka cyc'i'ye tu'n cynimane weye, cyxi'ye c'ulul cywitz ke tilbilal akeju nno'c cydiosine, pero te tibajxi che nimale weye, ex mlay tz'oc cyk'o'ntle nbiye xjan te minti' tajben tu'nju oyaj in bant cyu'ne, ex tu'nju in che c'ulune cywitz ke tilbilal. 40Cycyakil aj Israel che c'ulul weye twi witz xjansa'maj wu'ne, twi witz ma' twa'l at cyxol aj Israel, aju tcub tuj tx'otx' etzan wu'ne. Akine Dios in chin k'mante jlu: Atzun che c'metel wu'ne tuc'il tzalajbil; atzun cxel nkanine cye tu'n ttzaj cyi'n oyaj weye, ex tu'n ttzaj cyi'n aju tnejel twitz cyawal in jaw ex cycyakil cyoyaj cbajel cyxjansa'n tu'n toc te weye. 41Octzun cyajtz wi'ne cyxol ke tnam ex cyxol ke nasyon jatum cysputun cyib ja'lo, ex oc cyoc nchmo'ne juntl maj, che c'meteltzun wu'ne ic tza'n jun oyaj at tc'oc'jal, ex cywitz cycyakil nasyon cxel nyec'un wibe ka xjan kine. 42Octzun cypon wi'ne tuj tx'otx' Israel, aju tx'otx' otok txi ntziyane tu'n t-xi nk'o'ne cye ktzan cyxe'chele, c'eleltzun cynic'e ti'j, akine Dios. 43Atzun tzul ti'j cyc'u'je tcyakilju cybinchbene mya ba'n aju otok baj cytz'ilsan cyibe tu'n, ex ctzajel cych'ixwiye cyi'jxe tu'n tlaj nimcu mya ba'n otok cybinchaye. 44Akeye aj Israel, oc nbincha'ye xtalbil cyeye tu'n tjaw nimsa'n nbiye, ex mlay cub cycastiwoye wu'ne ic tza'n cybinchbene mya ba'n ex plojxix, c'eleltzun cynic'e ti'j, akine Dios, chi Kman Dios. 45Tzaj yolin Kman wuc'ile ex tma cyja': 46Aya xjal, que'yinxa tumlal tx'otx' tuj tnayaj k'ij, k'manxa tyola ti'j, k'manxa aju yol cxel nma'ne teya ti'j chc'ul at tuj tnayaj k'ij, 47ex k'manxa cyja': Atzun jlu in tma'n Kman: Akine chin oquel koptz'inte k'ak' ti'ja ex che bajel tz'e'y cycyakil ke tze' cha'x ex tzkij tu'n; cc'antel k'ak' ex mlayx yupj, ex cbajel tz'e'y cywitz cycyakil xjal tu'n, cxel ke' tuj tx'otx' tuj tbank'ab k'ij, max cpol baj tuj tx'otx' tuj tnayaj k'ij. 48Ex oc cyila' cycyakil xjal, akine Dios otok chin oc k'onte k'ak' ti'j, ex aju k'ak' lu mlayx yupj, chi Dios. 49Xi ntzak'we'ne: Ay Nman, ke xjal lu in cyma'n wi'je cyja': Aju yol in tma'n xjal lu, mi jun nne'l tnic' ti'j, che chi.

will be added

X\