EZEQUIEL 2

1in tma'n we'ye cyja': Aya xjal, we'ctza, porque chin yolile tuc'ila. 2Tej matok in yolin wuc'ile o nc'ame tipumal Dios ex in jaw wabane tu'n. Ex o nbiye tk'ajk'ajel wibaj in yolin wuc'ile, 3ex tma juntl maj weye: Aya xjal, cxel nsama'ne cyxol aj Israel miban che bin ex ma jaw cyi'n cyib tu'n cyk'ojin wi'je. Ma jaw cyi'n cyib tu'n cyk'ojin wi'je ic tza'n o bant cyu'n cyxe'chel, ex cucx cyk'ojin ja'lo. 4Ke xjal lu cyuw cywi' ex cyuw cyanmi. Cxel nsama'ne cyuc'il tu'n t-xi tma'na cye cyja': Atzun jlu in tma'n Kman. 5Ka xi bi'na cyu'n ex ka mi'n, pero c'elel cynic' ti'j, at jun t-sanjel Dios cyxol, porque ke xjal lu jumajx miban che bin. 6Aya xjal, mi'n tzaj t-xobila cywitz ex mi ti'j ju oc cyma' teya, masque oc tna'ya mer ic tza'n tocxa tuj txkan ch'i'x, ex mer ic tza'n najla cyxol txkan si'nin. Mi'n tzaj t-xobila tu'n cyyol oc cyma' teya, ex mi'n jaw sec'paja cywitz, masque jumajx miban che bin. 7K'manxa nyole cye ka xi bi'na cyu'n ex ka mi'n, porque ke xjal lu jumajx miban che bin. 8K'ontz twi'ya ti'j nyole cxel nma'ne teya, ex mi'n tz'oca miban bina ic tza'n cye. C'abinx tuj ttzi'ya ex wa'nxa aju cxel nk'o'ne teya, chi Kman, tzaj tma'n weye. 9O wile jun k'abaj nukpi'n ti'j ulni wuc'ile, k'i'n jun u'j tu'n balk'i'n tten ex tz'ibamaj txkan yol twitz. 10Eltzun tlic'pun nwitze. Tz'ibamaj cycabil pac'; ex in yolin ti'j tu'n cywuyin xjal ex tu'n cy-ayayan, ex ti'j jun yol cyuw wen te xobtzabl.

will be added

X\