EZEQUIEL 19

1Atzun teya xjal, bitzanxa ju bitz lu te bis cyi'j ke rey cye aj Israel: 2Aju cytxu'ye ic tten ic tza'n jun ttxu balun najltok cyxol ke tman balun. Cub bune' cyxol ke tal balun ex atzun e ch'iy ke tal. 3Junx tal masxix cub tch'isan tejxi tch'iy wen. Aju tal lu bant tu'n tu'n tbaj ttzakin tcanb, ex ba'ntok chyo'n xjal. 4O cybi ke nasyon tkanil ti'j tal balun lu; tzyet cyu'n tuj jun c'obil, ex tu'n jun ganch xi cyjawo'n tejxi tpon cyu'n tuj Ejipt. 5Tejtzun tlonte ttxu balun mintz'inintok tul meltz'aj tal, ex otok tz'ayon nim k'ij, tzaj ti'n juntl tal, cub tch'isan ex o ch'iyxix tu'n. 6Tej toc te jun balun matijxix, o bet cyxol ke mastl balun, ex bant tu'n tu'n tbaj ttzakin tcanb, ex ba'ntok chyo'n xjal. 7Baj t-xitun cyja rey ex e baj xitj ke tnam tu'n; e tzaj lu'lun cycyakil xjal tu'n tk'ajk'ajel twi' tej ttzanun. 8E tzajtzun ke xjal cyuj ke nasyon ate' ti'jele, e oc ten k'ojlel ti'j; cub cyk'o'n c'obil ti'j ex tzyettzun cyu'n tuj jun jul. 9Ocx cyk'o'n jun ganch twi ttxa'n ex ocx cylamo'n tuj jun tja ex xi cyi'n twitz rey te Babilonia; atzun ocx presin, tu'ntzun mi jun tu'n tbinte juntl maj tk'ajk'ajel twi' cywi' ke witz te tnam Israel. 10Ic tten cytxu'ye ic tza'n jun tkan uva awa'n nikayin ttxlaj jun a', oc nim twitz ex tzaj nim t-xak tu'nju nim a' t-xe'. 11E oc ke tk'ab cyuwxix wen ex e ajben te cyvar rey, ch'iy nimxix wen ex ic' nej twa'l cywitz mastl tze'. Tu'nju ma' twa'l ex nimxix t-xak, o ilwaj cyu'n cycyakil xjal. 12Pero jatz cybako'n xjal tu'n cyk'oj ex cub cyxo'n twitz tx'otx'. Bi'x o tzkij tu'n cyk'ik' in tzaj tuj tjawitz k'ij, e el tz'ak ke twitz; e tzkij ke tk'ab cyuwxix ex ocx cyk'o'n tuj k'ak'. 13Atzun ja'lo awa'n tuj tzkij tx'otx', tuj jun tx'otx' tzkij ex minti' a' tuj. 14Nne'l jun k'ak' cyi'j ke tk'ab ex in che baj tz'e'y ke t-xul ex ke twitz tu'n. Ex minti' tk'ab cyuwxix ma cyaj ten tu'n toc te cyvar rey. Atzun jun bitz te bis lu, ex c'ajbel te bitz te bis.

will be added

X\