EZEQUIEL 18

1Tzaj yolin Kman wuc'ile ex tma cyja': 2Akeye aj Israel, ¿Tiku'n cucx cymanteye ju twitz yol lu: Ke mambaj o che lo'n uva tx'am ex ke c'wa'l bi'x in tzaj ta'w twitz cye' tu'n ttx'amil, che chiye? 3Akine Dios in xi nma'ne jun nyole axix toc, mi jun majtl ctzajel cyna'ne aju yol lu. 4Weye cycyakil ke xjal, tza'nx ke mambaj icx ke c'wa'lbaj. Aju in binchan il, atzunju cymel. 5Aju xjal tz'aklxix in tbincha'n aju tz'aklxix ex tuj tumel in bet: 6Minti' in wa'n ti'j ju nintz wa'n in cub ic'sa'n cywi' ke tal witz tu'n cyc'ulun cywitz ke tilbilal; minti' nno'c ke' tc'u'j cyi'j ke tilbilal cydios aj Israel; minti' nne'l t-xc'ayin t-xu'jil tuc'il, ex minti' nno'c tmojban tib tuc'il t-xu'jil oc tul ẍwo'j ti'j; 7minti' in yajlan cyi'j xjal ex in aj tk'o'n aju prent otok tc'am te jun tuc'il; minti' in elk'an ti'j tuc'il, in xi tk'o'n twa ju xjal at we'yaj ti'j, ex in xi tk'o'n t-xbalun xjal minti' t-xbalun; 8minti' in xi tk'o'n tpwak te ch'ex nok tu'n tcamban mastl, ex minti' nne'l tkanin ta'l tpwak, minti' jun mya ba'n in tbincha'n ti'j tuc'il, ex tuj tumel in xi tbincha'n cyi'j cabe at k'oj cyxol; 9in tbincha'n ic tza'nx in tma'n nleye ex in che japun ke nmandamyente tu'n. Aju xjal lu, axix toc tz'aklxixte, cyja'tzun c'ank'il. Akine Dios in chin k'mante jlu. 10Aju xjal lu, katzun at jun tcy'ajal tx'u'j twi' ex byol xjal, ex ka in tbincha'n ke mya ba'n lu, 11aju minti' o tbincha tman: Ka in wa'n ti'j nintz wa'n, in cub ic'sa'n cywi' ke tal witz tu'n cyc'ulun cywitz ke tilbilal, ka nne'l t-xc'ayin t-xu'jil tuc'il, 12ka nno'c ten yajlal cyi'j ke meba xjal ex cyi'j ke xjal yaj, ka in elk'an cyi'j mastl xjal, ka minti' in aj tk'o'n aju prent otok tc'am te jun tuc'il, ka nno'c ke' tc'u'j cyi'j ke tilbilal mya dios, ka in tbincha'n aju mya ba'n ic'un wu'ne, 13ka in xi tk'o'n tpwak te ch'ex nok tu'n tcamban mastl ex ka nne'l tkanin ta'l tpwak, aju xjal lu mlay tz'ank'in. Tbajlenxi tbincha'n ju mya ba'n lu aju ic'un wu'ne, il ti'j tu'n tcyim porque tu'nx til cymel. 14Katzun at jun tcy'ajal xjal lu in til tcyakilju mya ba'n in tbincha'n tman, pero minti' nno'c lpe' ti'j tbinchben tman; 15minti' in wa'n ti'j nintz wa'n in cub ic'sa'n cywi' ke tal witz tu'n cyc'ulun cywitz ke tilbilal, minti' nno'c ke' tc'u'j cyi'j ke tilbilal aju cydios aj Israel, minti' nne'l t-xc'ayin t-xu'jil tuc'il, 16minti' in yajlan cyi'j xjal; minti' nne'l tkanin prent teju in kanin tch'ex te; minti' in elk'an cyi'j xjal, nok o'cx in xi tk'o'n twa ju xjal at we'yaj ti'j, ex in xi tk'o'n t-xbalun xjal minti' t-xbalun; 17minti' in tbincha'n mya ba'n cyi'j xjal, minti' nne'l tkanin nim ta'l tpwak, ex in che japun ke nleye ex nmandamyente tu'n: aju xjal lu mlay cyim tu'n tlaj til tman. Ax toc c'ank'il. 18Atzunju tman otok yajlan cyi'j xjal, otok tz'elk'an cyi'j xjal, ex otok tbincha mya ba'n cyxol t-xjalil, cymel tu'n tlaj tex til. 19Atzun cyeye oc cyma'ye: ¿Tiku'n minti' in cyim c'wa'lbaj tu'n tlaj til tman? Che chiloye. Mlay cyim porque o bet te c'wa'l tuj tumel, o tbincha ju tz'aklxix ex o che japun ke nleye tu'n; tu'ntzun jlu, axix toc c'ank'il. 20O'cx ju xjal in binchan il cymel, mlay txi tchjo'n c'wa'lbaj aju til tman, ex mi ju mambaj mlay txi tchjo'n til tc'wa'l. Aju xjal in binchan ju tz'aklxix oc tc'ma' oyaj tuj tumelxix te t-xel ju ba'n otok tbincha, atzunju xjal binchal mya ba'n oc tc'ma' jun castiw te t-xel mya ba'n otok tbincha. 21Katzun ma tz'el tpa'n tib xjal binchal mya ba'n ti'j tcyakil il otok tbincha, ka ma che japun ke nleye tu'n, ka ma bet tuj tumelxix ex ka ma tbincha ju tz'aklxix, axix toc c'ank'il ex mlay cyim. 22Mlay tzaj nna'ntle tcyakil ju mya ba'n otok tbincha, ex c'ank'il tu'nju in bet tuj tumel. 23Mi'n waje tu'n tcyim xjal binchal mya ba'n, nok o'cx waje tu'n tbaj tch'expu'n tnabl tu'ntzun tank'in. Akine Dios in chin k'mante jlu. 24Katzun ma cyaj tcolin xjal tu'n tbinchante ju tz'aklxix, ex ka ma tbincha juntl maj tcyakilju mya ba'n ex ic'bil in tbincha'n jun xjal binchal mya ba'n, ¿che chipetzune ka cucx c'ank'il ju xjal lu? Mlay tzaj nna'ne tcyakilju ba'n otok tbincha: Cymel tu'n tlaj otok tz'el tpa'n tib ti'j nleye ex tu'n tlaj til. 25Oclo cymaye ka mya tuj tumel in bant wu'ne, pero cybintze akeye aj Israel: ¿Che chipetzune ka mya tuj tumel in bant wu'ne? Tcyakil in bant tuj tumel wu'ne. ¿Myapelo akeye in che binchan mya ba'n? 26Ka ma cyaj tcolin ju xjal tz'aklxix tu'n tbinchante ba'n ex ka ma tbincha mya ba'n, cymel tu'n tlaj tbinchben mya ba'n. 27Katzun ma tz'el tpa'n tib xjal ti'j tbinchben mya ba'n, ex ka ma bet tuj tumelxix ex ka ma tbincha ju tz'aklxix, octzun cletel. 28Ka ma tz'el tnic' ti'j ex ka ma tz'el tpa'n tib ti'j tcyakilju mya ba'n otok tbincha, ax toc c'ank'il ex mlay cyim. 29Atzun cye aj Israel oc cyma' ka mya tuj tumel in bant wu'ne. ¿Axpe toc ka mya tuj tumel in nbincha'ne? ¿Myapelo ake aj Israel minti' in cybincha'n ju ba'n? 30Akeye aj Israel, teyle junjun cyeye cbel tcastiw wu'ne ic tza'nx tbinchben. Akine Dios in chin k'mante jlu. Cypa'n el cyibe ti'j tcyakil cybinchbene mya ba'n. tu'ntzun mi cynaje tu'nx cyile. 31Cypa'n el cyibe ti'j tcyakil mya ba'n o cybinchaye wi'je, ex e toc cyanmiye ex cynable te ac'aj. ¿Tiku'n cyaje tu'n cycyime, akeye aj Israel? 32Porque mi'n waje tu'n tcyim jun cyeye. Cypa'n el cyibe ti'j ju mya ba'n, tu'ntzun cyank'ine. Akine Dios in chin k'mante jlu.

will be added

X\