1 Tzaj yolin Kman wuc'ile ex tma cyja': 2 Aya xjal, k'manxa cye aj Jerusalén aju mya ba'n o cybincha puro ic'bilxix. 3 K'manxa jlu cye: Atzun jlu in tma'n Kman: Akeye aj Jerusalén, aju cyxe'chele ex cyiyjile tzajni jlet tuj tx'otx' Canaán, aj amorrey cymane ex aj Hetey cytxu'ye. 4 Tej cyul itz'je minti' el kesin tak'al cymuxe, minti' el tx'jo'n cyi'je, minti' oc su'n ta'l atz'an cyi'je, ex minti' oc c'alo'n cyc'u'je tu'n xbalun. 5 Tej cyul itz'je mi a'l jun tzaj k'ak'an tc'u'j cyi'je, ex minti' e oc cwentine tu'n toc bincha'n tcyakil jlu, nok o'cx e cyaj xo'ne tuj cojbil ex e el ic'une cyu'n xjal. 6 In ic' bete cytxlaje, ex tej cywile in xtanpaj cykane tuj cyitz'jlene, xi nma'ne tu'n cyank'ine. 7 E ch'iye wu'ne ic tza'n in ch'iy jun tal tze' tuj cojbil. E ch'iye ex e oque k'apoj, e oque ic tza'n jun xu'j tbanilxix que'yin. Ex e ch'iy ke cyime ax icx ttzmal cywi'ye. Pero jumajx minti'tok cyxbalune toc. 8 In ic' bete juntl maj cytxlaje ex e wile otok pon cyabk'iyile tu'n tcnet cychmile. Xitzun nlic'pu'ne xbalune cyibaje, aju k'i'n wu'ne, ex oc ntxa'yine cyi'je, xitzun ntziyane jun yol axix toc cyeye, bant ti'j jun nyole cyuc'ile, ex e octzune te weye. Akine Dios in chin k'mante jlu. 9 E bajtzun ntx'jo'ne, el baj chic' cyi'je wu'ne, ex oc nk'o'ne perjum cyi'je; 10 octzun nk'o'ne cyxbalune tbanilxix que'yin tilbilal, ex cyxajbiye tz'u'm; xi' nk'o'ne jun c'albil cyc'u'je sak que'yin ex jun cyxbalune tbanilxix chemben te; 11 oc nk'o'ne cyi'je ke adorn tbanilxix ex wi'yilxix, oc nk'o'ne tkul k'abaj ti'j cyk'abe, ex cub nk'o'ne jun uwj cykule; 12 oc nk'o'ne jun xmulk'abaj twi cytxa'ne, oc nk'o'ne tuj cyẍcyine, ex jax nk'o'ne tuj cywi'ye jun coron tbanilxix que'yin. 13 Baj noj cyi'je wu'ne tu'n k'an pwak ex sak pwak; aju cyxbalune sak que'yin wen tbanilxix chemben te, ex mejorxix que'yin tilbilal. E wa'ne ti'j pan tbanilxix, ex e lo'ne ti'j ta'l cab ex e chyo'ne ti'j chibj aseyt nne'l ti'j tze' olivo. E oque tbanilxix che que'yine, ex e oque mer ic tza'n t-xu'jil jun rey. 14 O binjtz tkanil tbanilxix cyi'je cyxol ke nasyon tu'nju tbanilxix che que'yine cyu'n ke adorn e oc nk'o'ne cyi'je. Akine Dios in chin k'mante jlu. 15 Pero oc ke' cyc'u'je ti'j ju que'ybil cyeye tbanilxix, ex tu'nju el tkanil cyi'je ka tbanilxix que'ybil cyeye, e oque ic tza'n ke xu'j jawni cywitz cyuc'il xinak ex xi cyk'on cyibe tu'n cyyaẍine cyuc'il ke xinak in che ic' bet. 16 Cyi'j ke cyxbalune cybinchaye ke xbalun ja cywi' ke tal witz, ex atzun e c'ulune cywitz ke tilbilal. A jlu miwt o cybinchaye ex mi'nwt cybinchaye juntl maj. 17 Tzaj cyi'ne ke adorn wi'yilxix k'an pwak ex sak pwak, aju otok txi nk'o'ne cyeye, cub cybincha'ne ke tilbilal xinak tu'ntzun cyc'ulune cywitz; 18 ex oc cyk'o'ne cyxbalune cyi'j aju mejorxix que'yin tilbilal, ex cub cyk'o'ne cywitz aju aseyt ex storac aju in ajben weye. 19 Aju pan otok txi nk'o'ne cyeye, aju banin ti'j arin tbanilxix, ex aju aseyt ex aju ta'l cab xi nk'o'ne cyeye te cynic'beble tu'n cyank'ine tu'n, xi cyo'yine cye ke tilbilal te jun oyaj tbanilxix tc'oc'jal. Akine Dios in chin k'mante jlu. 20 Ax icx ke cycy'ajale ex ke cyme'jele e ul itz'j tu'n cyoc te weye, xi cyk'o'ne te chojbil cye ke tilbilal, mer ic tza'n cywa. Nok ch'in ma tz'e'la tuj cywitze tej cyc'ulune cywitz ke tilbilal, 21 ax icx ke cyc'wa'le e ul itz'j tu'n cyoc te weye e je'x cyk'o'ne te chojbil tu'n cycub tz'e'y te jun nimbil cye ke tilbilal. 22 Tej in che binchantoke mya ba'n, ex tej in che yaẍintoke, minti' ul ti'j cyc'u'je aju tk'ijlalil tej c'wa'lxtok keye, tej minti'tok cyxbalune toc, ex tej in xtanpaj cykane tuj cyitz'jlene. 23 Akine Dios in chin k'mante jlu: Ay, bec'bil cywitze, mya nok o'cx ma cybinchaye nimcu mya ba'n, 24 ax icx jaw cybincha'ne ke altar cyuj cycyakil cay jatum tu'n cyc'ulune cywitz ke tilbilal ex jatum tu'n t-xi cyk'on cyibe tu'n cyyaẍine. 25 Cyuj cycyakil cyscyin cay jaw cybincha'ne ke altar jatum tu'n cyc'ulune cywitz ke tilbilal, ex aju que'ybil cyeye tbanilxix oc cyk'o'ne te minti' tajben, ex xi cyk'on cyibe tu'n cyyaẍine cyuc'il cycyakil xinak in che ic' bet. Nimxix e yaẍine. 26 E yaẍine cyuc'il cyvesine, cyuc'il aj Ejipt akeju nim cygan tu'n cyyaẍin, ex tzaj nk'oje cyu'ne tu'nju cucx in che yaẍine. 27 Cubtzun nk'o'ne cycastiwoye: el wi'ne ch'in cytx'otx'e, ex e je'x nk'o'ne tu'n tcub cyi'je cyu'n aj filistey, akeju in che el ic'une cyu'n ex minti' in che tzalaj ti'j cybinchbene ch'ixbajilxix. 28 Minti' o ke' cyc'u'je tej cyyaẍine cyuc'il aj Ejipt, ax icx xi cyk'on cyibe tu'n cyyaẍine cyuc'il aj Asiria; ex mi tu'n jlu minti'x ke' cyc'u'je. 29 Ex cucx t-xi cyk'on cyibe tu'n cyyaẍine cyuc'il aj Babilonia, aju cytanmi ke comersyant, ex mi tu'n jlu minti'x in ke' cyc'u'je. 30 Akine Dios in chin k'mante jlu: Mya segur ta' cyanmiye, cyja'tzun in cybincha'ne ic tza'n in bant tu'n jun xu'j jawni twitz cyuc'il xinak ex minti' tch'ixwi. 31 Cyuj cycyakil cay jaw cybincha'ne jun altar jatum tu'n cyc'ulune cywitz ke tilbilal ex jatum tu'n t-xi cyk'on cyibe tu'n cyyaẍine. Pero cyeye minti' bant cyu'ne ic tza'nx in bant cyu'n ke xu'j jawni cywitz cyuc'il xinak; porque cyeye minti' el cykanine chojbil cyeye. 32 Akeye ic cytene ic tza'n jun xu'j aj pajil, masque at tchmil pero in xi tk'on tib cye xinak minti' ojtzki'n tu'n. 33 Cycyakil ke xu'j jawni cywitz cyuc'il xinak in xi k'o'n chojbil cye; atzun cyeye, akeye e je'x k'onte oyaj cye ke xinak at cyganiye cyi'j ex axpe keye e je'x chjonte cye tu'n cytzaj tuj tcyakil part binchal il cyuc'ile. 34 Cyeye tej cyyaẍine, junxil ma tenba cyu'ne ic tza'n in cybincha'n ke txkantl xu'j jawni cywitz cyuc'il xinak; mi jun in jyonte cyeye tu'n tyaẍin cyuc'ile, ex minti' in che tzaj chjo'ne cyu'n, alpe keye in che'x chjonte cye. Cyja'tzun junxil ma tenba cyu'ne ic tza'n ke mastl xu'j. 35 Cyja'tzun, akeye xu'j jawni cywitz cyuc'il xinak cybintze nyole: 36 Akine Dios in xi nma'ne jlu cyeye: Ma tz'el cyi'ne cyxbalune ex minti' ma tzaj cych'ixwiye tu'n cyyaẍine cyuc'il ke xinak at cyganiye cyi'j, ma che c'ulune cywitz ke tilbilal ic'unxix wu'ne, ex ma che cub cybyo'ne cyc'wa'le te jun oyaj cywitz ke tilbilal. 37 Cyja'tzun, che oquel nchmo'ne cycyakil ke xinak at cyganiye cyi'j, akeju ma che achine cyuc'il, cyuc'ix cycyakil keju e tzalaje cyuc'il, ex cyuc'ix cycyakil keju e je'l cyic'une; che oquel nchmo'ne cyi'jeleye, ex cywitztzun ke jlu c'elel wi'ne cyxbalune tu'ntzun cyilwaje cyu'n minti' cyxbalune toc. 38 Cbel cysentense wu'ne ic tza'n cysentens xu'j aj pajil ex byol xjal, ex tu'n ntx'u'jile che cymele. 39 Che xel nk'o'ne tuj cyk'ab ke jlu tu'ntzun tcub cyxitun ke lugar jatum in che yaẍine ex jatum in che c'ulune cywitz ke tilbilal. C'elel cyi'n cyxbalune toc cyi'je cyuc'ix ke adorn tbanilxix che que'yin, ex che cyjel tene jumajx minti' cyxbalune. 40 Tzul cyi'n nim xjal k'ojlel cyi'je, che oquel xo'ne tu'n abj ex che bel byo'ne tu'n spad cyu'n. 41 C'oquel cykoptz'i'n k'ak' ti'j cyjaye ex cbel cysentense cyu'n cywitz nimcu xu'j. Mi'n cybinchatle aj pajil, ex mlay txi' cychjo'ne juntl maj ke xinak at cyganiye cyi'j. 42 Bi'xtzun cchewixtel nk'oje cyi'je; chin cbel txule'ye ex mlay chin k'ojintle. 43 Ma tzic' tna'l cyu'ne tk'ijlalil tej matok k'apojx keye, ex ma tzaj nk'oje tu'n cyyaẍbile ex cybinchbene ic'bilxix; cyja'tzun cbel cycastiwoye wu'ne tu'n tlaj ju cybinchbene lu. Akine Dios in chin k'mante jlu. 44 Atzun ja'lo, cycyakil keju in che yolin ti'j jun twitz yol axix toc che yolil cyi'je aju yol in tma'n cyja': Tza'nx te txuybaj cyja'xtzun te tal. 45 Akeye tal cytxu'ye, aju el ic'unte tchmil cyuc'ix ke tal, ax icx ke cyitz'ine el cyic'un cychmil cyuc'ix cyal. Aj Hetey cytxu'ye, ex aj Amorrey cymane. 46 Tuj tx'otx' tumlal tbank'ab k'ij ta'tok tnam Samaria cyuc'ix ke t-aldey, aju ma tz'oc tbi ic tza'n cytzique xu'j; atzun tuj tx'otx' tumlal tnayaj k'ij ta'tok tnam Sodoma cyuc'ix ke t-aldey, aju ma tz'oc tbi ic tza'n cyitz'ine xu'j. 47 Atzun cyeye ma tz'el cycano'ne cyi'j. Mya o'cx ma cybinchaye ic tza'n cye cybincha, mas pyor ma tzic' tibaj cyu'ne. 48 Akine Dios in xi nma'ne jun yol axix toc: Ke aj Sodoma cyuc'ix ke t-aldey, aju toc tbi cyitz'ine xu'j, minti'lpe cybincha ic tza'n cyeye ma cybincha ex ic tza'n ma cybincha ke cy-aldeye. 49 Atzun cyil aj Sodoma jlu, akeju toc cybi cyitz'ine xu'j: Jaw cyniman cyib cyuc'ix ke cy-aldey tu'n tlaj chmet nimxix cywa ex tu'nju ate'tok tuj txubtxaj, pero minti' e onin cyi'j ke meba xjal ex cyi'j keju atx taj cye. 50 Jaw cynima cyib ex cybincha aju mya ba'n nne'l wic'une, cyja'tzun o che cub nxitune ic tza'n o cyile. 51 Myalpe ic il o bant cyu'n aj Samaria ic tza'n cyeye ma bant cyu'n. Cyeye ma cybinchaye nimxix mya ba'n ic tza'n cye. Tu'nju nim mya ba'n ma cybinchaye, ma che oc aj Sodoma ic tza'n minti' cyil, aju toc cybi cyitz'ine xu'j. 52 Cbel cych'ixwiye oc tcub cycastiwoye, ex il ti'j tu'n tcub cyapa'ne, porque tu'nju nim il ma cybinchaye cywitz ke cyitz'ine xu'j, cye ma che oc ic tza'n minti' cyil. Cbel cych'ixwiye oc tcub cycastiwoye, ex il ti'j tu'n tcub cyapa'ne, porque tu'nju nim il ma cybinchaye, ma che oc cyermaniye xu'j mer ic tza'n minti' cyil. 53 Ke aj Sodoma ex ke aj Samaria che tel juntl maj tuj txubtxaj wu'ne, cyuc'ix cy-aldey; ax icx cyeye che tele juntl maj tuj txubtxaj wu'ne, 54 pero il ti'j tu'n tic'x cyu'ne oc ttzaj cycastiwoye, ex ctzajel cych'ixwiye ti'j aju o cybinchaye, cyja'tzun ckebel cyc'u'j keju cabe tnam toc cybi cyermaniye xu'j. 55 Ke aj Sodoma ex ke aj Samaria cyuc'ix ke cy-aldey, che tel tuj txubtxaj juntl maj, ax icx cyeye cyuc'ix ke cy-aldeye che tele juntl maj tuj txubtxaj ic tza'n nej. 56 Tej tcub cycastiw aj Sodoma, akeju toc cybi cyitz'ine xu'j, e xmayine cyi'j, ex jaw cyniman cyibe 57 tej na'nxtok tk'ancha'lin cybinchbene mya ba'n; atzun ja'lo ke aj Siria, ke aj filistey ex ke tnam cyvesin cyibe cyuc'il in che xmayin cyi'je; ex cycyakil xjal in che ic'un cyeye. 58 Atzun ja'lo il ti'j tu'n tic'x castiw cyu'ne tu'n tlaj cyyaẍbene ex cybinchbene ic'bilxix. Akine Dios in chin k'mante jlu. 59 Akine Dios cxel nma'ne jlu: Tuj tumelxix cbel nk'o'ne cycastiwoye, porque ma tz'oc cyk'o'ne te minti' tajben aju yol tzaj cytziyane, ex minti' ma japun cyu'ne aju yol cyaj bant ti'j wu'ne cyuc'ile. 60 Atzun weye ctzajel nna'ne aju yol cyaj bant ti'j wu'ne cyuc'ile tej matok k'apoj keye, ex cbantel ti'j jun nyole cyuc'ile te jumajx. 61 Tzultzun ti'j cyc'u'je aju cybinchbene ex ctzajel cych'ixwiye oc cyc'monteye ke cytzique ex ke cyitz'ine xu'j, oc cyxi nk'o'ne cyeye tu'n cyoc ic tza'n cyale, pero mya tu'nju atwit cyoclen ti'j ju yol cyaj bant ti'j wu'ne cyuc'ile. 62 Cbantel ti'j nyole juntl maj cyuc'ile, c'eleltzun cynic'e ti'j, akine Dios. 63 Oc tcub nnajsa'ne tcyakil cybinchbene mya ba'n, tzultzun ti'j cyc'u'je ex ctzajel nimxix cych'ixwiye ex mi'n che yolintle. Akine Dios in chin k'mante jlu.
