EZEQUIEL 14

1At junjun tij xjal cyxol aj Israel e ul wuc'ile ex e cub ke' nwitze. 2Tzaj yolin Kman wuc'ile ex tma cyja': 3Ke xinak lu jumajx cyk'on cyib tu'n cyc'ulun cywitz ke tilbilal, ex o'cx toc cywitz ti'j aju in xi k'inte cye tu'n cycub tz'ak tuj il, ¿cxelpetzun nk'o'ne ambil cye tu'n ttzaj cykanin jun yol weye? 4Yolina cyuc'il ex k'manxa cye cyja': Atzun jlu in tma'n Kman: Ka at jun aj Israel ma txi tk'on tib tu'n tc'ulun cywitz ke tilbilal, ex ka ma tz'oc tk'o'n twitz ti'j ju in xi k'inte te tu'n tcub tz'ak tuj il, ex ka ma tzul kanil jun yol tuc'il nsanjele, wu'nxe cxel nk'o'ne tzak'webl te ic tza'nx tbinchben, tu'nju in c'ulun cywitz nimcu tilbilal. 5Chin yolile tuj cyanmi cycyakil aj Israel tu'n cyajtz meltz'aj juntl maj wuc'ile, akeju ma tz'el cypa'n cyib wi'je tu'n cylaj ke tilbilal. 6Cyja'tzun, k'manxa cye aj Israel cyja': Atzun jlu in tma'n Kman: Tajtz ti'j cyanmiye, cypa'mil cyibe cyi'j ke tilbilal in che c'ulune cywitz, ex cycolin cyaje ke cybinchbene ic'bilxix. 7Ka at jun aj Israel ex ka jun stranjer xjal ax najl cyxol aj Israel ma tz'el tpa'n tib wi'je, ex ma txi tk'on tib tu'n tc'ulun cywitz ke tilbilal, ex ka toc twitz ti'j ju in xi k'inte te tu'n tcub tz'ak tuj il, ex ka ma tzul kanil jun yol tuc'il nsanjele, wu'nxe cxel nk'o'ne tzak'webl te. 8Ctzajel nk'oje ti'j xjal lu ex cbel nk'o'ne tcastiw te jun yec'bil cywitz mastl xjal, ex cucx ctzajel cyna'n, ex cnajel wu'ne cyxol ke xjal etzan wu'ne. C'eleltzun cynic'e ti'j, akine Dios. 9Ka at jun xjal nno'c tk'on tib te nsanjele, ex oc t-xi tma'n tkanil mya ax toc, axtzun kine otok chin cub sbu'nte te, cbel nk'o'ne tcastiw, ex cnajel wu'ne cyxol ke xjal etzan wu'ne. 10Aju xjal in kanin xjel, ax icx aju nno'c tk'on tib te nsanjele, cycabil cbel cycastiw tu'n tlaj cyil. 11Tu'ntzun mi'n tel cypa'n cyib aj Israel wi'je juntl maj, ex tu'n mi tbaj cytz'ilsan cyib tu'nju cybinchben mya ba'n. Che oqueltzun te jun tnam etzan wu'ne ex atzun weye chin oquele te Cydios. Akine Dios in chin k'mante ju yol lu. 12Tzaj yolin Kman wuc'ile ex tma cyja': 13Ka at jun nasyon ma binchan il nwitze, ex ka ma tz'el cypa'n cyib xjal wi'je, cbel cycastiw wu'ne, ex c'elel wi'ne cywa; ctzajel we'yaj cyibaj wu'ne, ex che cymel ke xjal ex ke alumaj wu'ne. 14Ex nokwit a najl Noé, Daniel tuc'ix Job tuj tx'otx' lu, o'cxwitlo ox xjal lu jacu che clet, tu'nju tz'aklxix ke. Akine Dios in chin k'mante ju yol lu. 15Ex ka ma che'x nsama'ne ke txcup te tjak' c'ul tuj jun nasyon tu'n tcub cybyo'n ke xjal najl tuj, ex tu'n toc te jun lugar minti' xjal najl tuj, jatum mi jun xjal jacu tnimari tib tu'n tic' bet tu'nju in xob tu'n cylaj ke txcup, 16nokwit a najl ke ox xinak tuj nasyon lu, mlaywitlo che clet cycy'ajal cyu'n, mi ke cyme'jel, o'cxwitlo ake jacu che clet, ex aju cytanmi jaculo cyaj ten te jun lugar minti' xjal tuj. Ax toc akine Dios in chin k'mante ju yol lu. 17Ex ka ma che tzaj nsama'ne ke xjal k'ojlel ti'j nasyon lu ex ka ma txi nma'ne tu'n cycyim ke xjal ex ke alumaj, 18nokwit a najl ke ox xinak lu tuj ju nasyon lu, mlaywitlo che clet ke cycy'ajal cyu'n, mi ke cyme'jel; o'cxwitlo ake jacu che clet tu'nju tz'aklxix ke. Ax toc akine Dios in chin k'mante jlu. 19Ex ka ma txi nsama'ne tx'u'j yabil tuj nasyon lu, ex ka ma tzaj nim ntx'u'jile ti'j tu'ntzun cycyim ke xjal ex ke alumaj, 20nokwit a najl Noé, Daniel ex Job tuj nasyon lu, mlaywitlo che clet ke cycy'ajal cyu'n mi ke cyme'jel; o'cxwitlo ake jacu che clet tu'nju tz'aklxix ke. Ax toc akine Dios in chin k'mante jlu, chi Dios. 21Atzun jlu in tma'n Kman: Pyorlo oc ttzaj nsama'ne ke cyaje castiw xobajilxix tibaj tnam Jerusalén, atzun ke jlu: K'oj, we'yaj, ke txcup te tjak' c'ul, ex tx'u'j yabil, tu'n cycyim ke xjal ex ke alumaj. 22Nic'xi junjun che cyjel ank'in ex che eletz k'i'n ti'jtze tnam cyuc'il cycy'ajal ex cyme'jel. Octzun cyul cyuc'ile, oc cyila'ye cymod ex cybinchben mya ba'n ex ckebel cyc'u'je tu'nju castiw otok cub nk'o'ne tuj tnam Jerusalén. 23Ckebel cyc'u'je oc cylonteye tza'n tten cymod ex alcye cybinchben. C'eleltzun cynic'e ti'j mya nokx gan ju castiw cub nk'o'ne tibaj tnam Jerusalén. Akine Dios in chin k'mante jlu.

will be added

X\