EZEQUIEL 12

1Tzaj yolin Kman wuc'ile ex tma cyja': 2Aya xjal najliya cyxol ke xjal miban che bin. At tbak' cywitz tu'n cyque'yin, pero minti' in cyil, at cyẍcyin tu'n cybin pero minti' in cybi'n, porque jumajx chcyin cywi' ke xjal lu. 3Cyja'tzun binchama tten tikatza, mer ic tza'n tu'n t-xi k'i'na tuj juntl tnam najchak, bincham ttena k'ijl ex cywitz cycyakil xjal, texa tuj tjaya ex txi'ya tuj juntl lugar; balo jacu tz'el ch'in cynic' xjal ti'j, porque jumajx miban che bin. 4K'i'n etza tikatza k'ijl ex cywitz cycyakil xjal, mer ic tza'n tu'n t-xi k'i'na tuj juntl tnam najchak; octzun toc kax, texa cywitz cycyakil xjal mer ic tza'n tu'n t-xi k'i'na tuj juntl tnam najchak. 5Te tibajxi, k'o'mixa jun toy' ja cywitz xjal ex texa tuj, tuc'ix tikatza. 6Octzun toc yupj twitz tx'otx', k'o'n jaxa tikatza twi t-semila, ex texa cywitz xjal. Maksi'n oc twitza tu'ntzun mi ttila twitz tx'otx'. Porque ma tz'oca te jun techal ti'j ju mya ba'n tzul cyibaj aj Israel, chi Dios tzaj tma'n weye. 7Bajtzun nbincha'ne wikatze ic tza'nx otok tzaj tma'n Kman weye, ex k'ijl in exe tuc'il wikatze, mer ic tza'n tu'n nxi k'i'ne tuj juntl tnam najchak. Te kale ex nk'o'ne jun toy' ja, tejtzun toc yupj jax nk'o'ne wikatze twi nsemile, in extzune cywitz xjal. 8Te prim te juntl k'ij tzaj yolin Kman wuc'ile ex tma cyja': 9Ax toc ma tzaj cykanin aj Israel teya, akeju miban che bin, ¿ti in baj teya? Che chi. 10Pwes k'manxa cye cyja': A jlu jun tkanil in yolin ti'j rey tuj tnam Jerusalén ex cyi'j cycyakil aj Israel akeju najlke tuj, chicuya, chi Kman. 11K'manxa cye cyja': Akine ma chin oque te jun techal ti'j mya ba'n ctzajel cyi'je, ex cbantel cyu'ne ic tza'nx weye xbant wu'ne, porque che xel k'i'ne pres tuj juntl tnam najchak. 12Aju cawil cyibaj cjawix tk'o'n tikatz twi t-semil, octzun koc yupj c'elex tuj toy' muro aju otok bant cyu'n xjal. Maksi'n twitz oc tex tu'ntzun mi'n ttil twitz tx'otx'. 13Cbel nk'o'ne jun c'obil ti'j ex ctzyetel tu'n. Cxel wi'ne tuj Babilonia, tuj cytanmi ke aj Caldey, mlay til ju tx'otx' lu ex axtzun cymel. 14Cycyakil keju ate' ttxlaj tu'n cycolin ti'j cyuc'ix cycyakil ke t-soldad, che xel nsputune tuj tcyakil pac' twitz tx'otx', chin xel lpe'ye cyi'j tu'n cynaj wu'ne tu'n spad tocxsa'n tuj nk'abe. 15Octzun cybaj nsputune cyuj txkantl tnam ex nasyon, c'elel cynic' ti'j, akine Dios. 16Pero at junjun che cletel wu'ne, mi'n che cyim tuj k'oj, mi tu'n we'yaj ex mi tu'n tx'u'j yabil, tu'ntzun t-xi cytx'olba'n ti'j cybinchben mya ba'n cye ke nasyon jatum che pol, ex tu'n tel cynic' ti'j, akine Dios, chi Dios tzaj tma'n weye. 17Tzaj yolin Kman juntl maj wuc'ile ex tma cyja': 18Aya xjal, oc twa'na ax icx oc tc'ana, bix jaw lu'luna tu'n t-xobila ex tu'nju in baj tc'u'ja tu'n tbisa. 19Ex k'manxa cye cycyakil aj Israel: Atzun jlu in tma'n Kman cyi'j ke xjal najl tuj tnam Jerusalén, ex cyi'j cycyakil aj Israel: Che wa'l tuc'il sec'pajle'n, ex cxel cyc'a'n cyc'a tuc'il cyxobil; che bel xitj ke tnam tuj Israel, minti'tl xjal cyjel ten najal cyuj, tu'n tlaj nimcu mya ba'n in cybincha'n xjal cyi'j cyuc'il. 20Cycyakil tnam jatum najl ke xjal cyuj, che cbel xitj; mi jun xjal cyjel ten najal cyuj. C'eleltzun cynic' ti'j, akine Dios, chi Dios. 21Tzaj yolin Kman wuc'ile ex tma cyja': 22¿Ti t-xilen ju cyyol aj Israel in cyma'n cyja': Cucx tel k'ij, ex aju yol in tma'n t-sanjel Dios minti' in japun? Che chi. 23K'manxa cye cyja': Atzun jlu in tma'n Kman: Oc nbincha'ye tu'n mi'n t-xi cyma'n aj Israel juntl maj ju yol lu. Ax icx k'manxa cye, nikayin ta' k'ij tu'n tjapun tcyakil aju o k'manjtz tu'n nsanjele. 24Porque cyxol aj Israel mlay che tentl keju nno'c cyk'on cyib te nsanjele, ex mi keju ba'n che k'ijin tu'n cysbun. 25Porque akine Dios oc chin yolile, ex aju cxel nma'ne, jurat naj cjapunel ex ax keye che que'yilte, akeye xjal miban che bine; akine chin yolil, ex cjapunel wu'ne aju cxel nma'ne. Akine Dios in chin k'mante jlu, chi Dios. 26Tzaj yolin Kman wuc'ile ex tma cyja': 27Ke aj Israel in cyma'n cyja': Aju o tzaj yec'un te Ezequiel ic tza'n tuj witzic' cjapunel, pero yajxi wen che chi, 28cyja'tzun k'manxa cye cyja': Atzun jlu in tma'n Kman: Ke nyole mya atxcu taj tu'n cyjapun; aju o txi nma'ne cjapunel naj. Akine Dios in chin k'mante ju yol lu, chi Dios tzaj tma'n weye.

will be added

X\