EZEQUIEL 11

1Aju T-xew Kman jaw k'inte weye, ex inx k'i'ne tu'n max ttzi tja, aju xi'yni twitz tumlal tjawitz k'ij. Ttzi' ju ja lu ate'tok 25 xinak. Cyxol ke jlu el nnic'e ti'j Jaazanías aju tcy'ajal Azur, ex Pelatías aju tcy'ajal Benaías; ake jlu nejenel ke tuj tnam. 2Ex tzaj tma'n Kman weye cyja': Atzun ke jlu in baj cyximan tu'n cybinchante mya ba'n, ex in cyk'o'n consej mya ba'n tuj tnam lu. 3In cyma'n cyja': Mya ba'n tu'n tjaw kbincha'n kja tuj tk'ijlalil ja'lo. Ic kten tuj tnam ic tza'n chibj tuj jun c'il, che chi. 4Cyja'tzun, k'manxa cye aju cxel nma'ne teya ti'j cycastiw tu'n tcub, chi Kman weye. 5Cub ten T-xew Kman wibaje ex tzaj tma'n weye tu'n t-xi nma'ne cye cyja': Atzun jlu in tma'n Kman: Atzun jlu in che ximane ti'j, akeye aj Israel. Ba'n wu'ne alcye cyximbetze. 6Nimcu xjal ma cub cybyo'ne tuj tnam lu ex ma noj cyuj cay cyu'ne cyu'n cyximlal cyimni. 7Cyja'tzun, akine Dios cxel ncyuwsa'ne jlu cyeye: Aju tnam Jerusalén c'oquel ic tza'n jun c'il, pero mya akeye che oquel te chibj, nok o'cx che oquel te chibj cyximlal cyimni akeju ma che cub cybyo'ne, atzun cyeye che eletz wi'ne tuj tnam. 8¿Tzinpe in che xobe te k'oj? Ctzajel k'oj cyi'je wu'ne. Akine Dios ma chin k'mante ju yol lu. 9Cbel cycastiwoye wu'ne: Che elex wi'ne tzalu, ex che xel nk'o'ne tu'n cytene tjak' cycawbil ke stranjer xjal. 10Che cymele tu'n spad. Cbel cysentense wu'ne tuj tmojonil cytanmiye, c'eleltzun cynic'e ti'j, akine Dios. 11Aju tnam mlay tz'ajben cyeye ic tza'n jun c'il, ex mi akeye che oquel ic tza'n chibj, wu'ne cbel cysentense tuj tmojonil cytanmiye, akeye aj Israel. 12C'eleltzun cynic'e ti'j, akine Dios. Minti' in che bete ic tza'nx o txi nma'ne cyeye, ex minti' in che japun ke nleye cyu'ne. Nok o'cx ma che'x lpe'ye ti'j cybinchben ke nasyon ate' cyi'jeleye, chicuya cye, chi Kman weye. 13Tej matok in xi nma'ne cye aju otok tzaj tma'n Kman, bi'x cyim Pelatías aju tcy'ajal Benaías. In cubtzun moc'e'ye tejxi tpon tacl tibaj nwitze twitz tx'otx', ex in jaw sch'ine cyuwxix wen, ex xi nma'ne cyja': Ay Nman. ¿Maj che bajel naj tu'na ke ch'intl aj Israel ate'x? 14Tzaj yolin Kman wuc'ile ex tma cyja': 15Ke xjal ma che cyaj ten tuj Jerusalén in che yolin cyi'j ke aj Israel ate' tuc'ila, akeju t-xjalila ex termaniya, ex in cyma'n cyja': Ke aj Israel o che'x k'i'n tuj Babilonia najchak ate' ti'j Kman. Mya ic tza'n ke ma tzaj tk'o'n Kman ju tx'otx' te ke tu'n koc te tajwil, che chi. 16Cyja'tzun k'manxa cye: Atzun jlu in tma'n Kman: Akine inx samante cye tuj juntl tx'otx' najchak ex e baj nsputune cyxol ke nasyon, cyxol ke tnam minti' ojtzki'n cyu'n, pero nok te nic'xi k'ij. Atzun ja'lo ax kine chin tele cyuc'il cyuj ke tnam jatum o che pon k'i'n. 17Ax icx k'manxa cye cyja': Atzun jlu in tma'n Kman. Akine chin ajetz k'inte cye cyuj ke tx'otx' ex cyuj ke nasyon jatum o che baj nsputune, che oquel nchmo'ne ex cxel nk'o'ne cytx'otx' juntl maj tu'n cyoc te tajwil. 18Che pol meltz'aj juntl maj tuj cytx'otx', ex cxel cycolin tu'n cyc'ulun cywitz ke tilbilal, ex mi'n cybinchatl tcyakil aju ic'bilxix in bant cyu'n nej. 19C'elel wi'ne aju cyanmi cyuwxix ic tza'n abj, ex cxel nk'o'ne jun cyanmi ac'aj ex ba'n niman, ex jun cyximbetz ac'aj. 20Che ank'il ic tza'nx in cyma'n ke nleye ex che japunel ke nmandamyente cyu'n; che oquel te jun tnam etzan wu'ne, atzun weye chin oquele te Cydios. 21Atzun keju in che c'ulun cywitz ke tilbilal ex cucx in cybincha'n mya ba'n aju ic'bilxix, cbel cycastiw wu'ne tu'n tlaj cybinchben mya ba'n. Akine Dios in chin k'mante jlu, chi Kman, chicuya cye. 22E jaw lipan ke querubín twitz cya'j, ax icx ke rwed e jaw junx cyuc'il. Ex tcubtok tajwalil Cydios aj Israel cyibaj. 23Jawtzun tajwalil Dios twitz cya'j ex el tpa'n tib ti'j tnam Jerusalén, ex cub ten twi witz ttxlaj tnam tuj tjawitz k'ij. 24In jaw k'i'ne tu'n tipumal Kman, ex in aj meltz'aje tu'n tuj Babilonia jatum otok che pon k'i'n ke aj Israel. A jlu o wile ic tza'n tuj jun witzic', aju tzaj tyec'un T-xew Dios weye. Tbajlenxi jlu cub naj ju witzic', 25ex tcyakil aju otok tzaj tyec'un Kman weye xi nchic'ba'ne cye aj Israel, akeju otok che pon k'i'n tuj Babilonia.

will be added

X\