ÉXODO 9

1Tzajtzun tma'n Kman te Moisés: —Tocxa twitz Faraón ex k'manxa te cyja': Chi Kmane, aju Kdiose ako'ye aj Hebrey: Che ttzokpi'mexa ke xjal etzan wu'ne, tu'n cyc'ulun weye, chi Kman. 2Katzun mi'n ma che ex ttzokpi'na, ex ka cucx ma che cub ttzyu'na, 3tzul t-sama'n Kmane jun yabil cyuwxix cyibaj ke taluna ate' tuj cojbil, ke tcheja, ke tburra, ke tcheja camey, ke twacẍa, ke t-ẍne'la ex ke tchipa. 4Atzun ke cyalun aj Israel che elel tpa'n Kmane cyi'j ke cyalun aj Ejipt, ex mi jun cyalun aj Israel cymel, chicuya te. 5Bi'x o tma Kman alcye k'ij tu'n ttzaj c'ixbisabl lu: Nchi'j bant jlu wu'ne tuj tx'otx' Ejipt, chi Kmane, chi Moisés. 6Tujtzun juntl k'ij tzaj c'ixbisabl lu tu'n Kman. E baj cyim cycyakil cyalun aj Ejipt; atzun cye aj Israel mi jun cyalun o cyim. 7Xitzun t-sama'n Faraón jun xjal bilte te, ex mi jun cyalun aj Israel otok cyim. Masque icju, pero cucx cub tcyuwsa'n tanmi, ex minti' e je'tz ttzokpi'n ke aj Israel. 8Xi tma'n Kman te Moisés ex te Aarón cyja': Cyjato'n jawe nok jte' yub tza'j ttzi jorni, ex cjawix tchitun Moisés twitz cya'j twitz Faraón. 9C'oquel tza'j lu te puj tibaj tcyakil tx'otx' Ejipt; ex tu'nju puj lu, tzul jlet tx'a'c cyi'j xjal ex cyi'j alumaj tuj tcyakil tx'otx' Ejipt, chi Kman. 10Jawtzun cyjato'n tza'j ttzi jorni, ex e pon twitz Faraón. Jax tchitun Moisés tza'j twitz cya'j, ex jawil jlet tx'a'c cyi'j xjal ex cyi'j alumaj. 11Atzun cye chman minti' bant cywe' twitz Moisés, tu'n tlaj tx'a'c jaw jlet cyi'j ex cyi'j cycyakil aj Ejipt. 12Pero cub tcyuwsa'n Kman tanmi Faraón, ex minti' xi tbi'n cyyol Moisés ex Aarón, ic tza'n otok tma Kman te Moisés. 13Tzajtzun tma'n Kman te Moisés: —Primx jaw we'ya nchi'j, we'cuya twitz Faraón ex k'manxa te cyja': Chi Kmane aju Kdiose ako'ye aj Hebrey: Che ttzokpi'mexa ke xjal etzan wu'ne, tu'n cyc'ulun weye, 14ex katzun mi'n, ctzajel nsama'ne cycyakil nc'ixbisable ti'ja, cyi'j keju at cyoclen ttxlaja ex cyi'j ke t-xjalila, tu'ntzun tel tnic'a ti'j mi a'l juntl ic tza'n kine tuj tcyakil twitz tx'otx'. 15Nokwit xi nyec'une wipumale tu'n tc'ixbiseta tu'n yabil, owtlo cyima cyuc'ix ke t-xjalila, 16pero ma cyaj ank'ina wu'ne tu'n tel tnic'a ti'j wipumale, ex tu'n tel tkanil nbiye tuj tcyakil twitz tx'otx'. 17¿Maj cucxtzun che bel ttzyu'na ke xjal etzan wu'ne tu'n mi'n cyex ttzokpi'na? 18Bintza, tlokju nchi'j ctzajel nchitune sakbakun alxix wen, aju bajx tzaj jun maj icju atxix tuj k'ij tcublen xe't tnam lu, ex matzun ja'lo. 19Samanxtzuna xjal tu'n cytzaj chmet ke taluna ex tcyakilju at teya tuj cojbil. Katzun mi'n ma che baj tchmo'na tu'n cyul tjaya, che cymel tu'n sakbakun cbel tz'ak cyibaj tuj cojbil, ka xjal ex ka alumaj, chi Kmane, chicuya te Faraón. 20Akeju xi cyniman tyol Kman cyxol keju attok cyoclen ttxlaj Faraón, ocx cyk'o'n ke cymajen ex ke cyalun cyuj cyja; 21atzun keju minti' xi cyniman tyol Kman, ax e cyaj cyk'o'n ke cymajen ex ke cyalun tuj cojbil. 22Tzajtzun tma'n Kman te Moisés cyja': —Nukpinx tk'aba twitz cya'j tu'ntzun ttzaj sakbakun tibaj tcyakil tx'otx' Ejipt, cyibaj ke xjal ex ke alumaj, ex tibaj tcyakil awal tuj cojbil tuj Ejipt. 23Xitzun tnukpi'n Moisés tcy'ako'ch twitz cya'j. Tzaj julin k'ancyok tu'n Kman, ex tzaj sakbakun. Tzaj koptz'aj tkan k'ancyok, ex tzaj chitj sakbakun tu'n Kman tibaj tx'otx' Ejipt. 24Cu'tz chitj sakbakun twitz cya'j tuc'ix tkan k'ancyok nimxix wen; bajx tzaj jun maj icju atxix tcublen xe't tnam Ejipt. 25Tcyakilju attok tuj cojbil tuj tx'otx' Ejipt o naj tu'n sakbakun, tza'nx ke xjal ax icx ke alumaj. Ax icx o naj tcyakil awal, ex cycyakil tze' bi'x e baj naj. 26O'cx tuj tx'otx' Gosén jatum najltok ke aj Israel, minti' cub sakbakun. 27Xitzun txocbaj Moisés ex Aarón tu'n Faraón, ex xi tma'n cye cyja': —Ma chin binchane il ja'lo. Ate Cymane tz'aklxix, atzun weye ex ke nxjalile aj il ko'ye. 28Che cubsane twitz Cymane tu'n twe' sakbakun ex k'ancyok in julin tu'n. Jacu che ex ntzokpi'ne ke xjal ex mlay che cub ntzyu'ntle, chi Faraón. 29Xitzun tma'n Moisés te: —Bi'x oc wexe ja'lo tuj tnam lu, cxel nnukpi'ne nk'abe, chin cubsale twitz Kmane, ex cwebel k'ancyok ex sakbakun tu'ntzun tel tnic'a ti'j, te te Kmane aju Kdiose tcyakil twitz tx'otx'. 30Pero ba'n wu'ne, mlay txi cynimane Kmane aju Kdiose, mi aya ex mi keju at cyoclen ttxlaja, chi Moisés. 31Aju awal lino tuc'ix sebad, bi'x e baj naj tu'n sakbakun, porque matok in japun twitz sebad, ex matok in xmacalin lino. 32Atzun te triw tuc'ix senteno, minti' e naj, porque na'nxtok tul cyk'ij. 33Etztzun Moisés twitz Faraón, elpun ti'jxi tnam, e je'x tnukpi'n ke tk'ab ex cubsan twitz Kman. We'tzun k'ancyok ex sakbakun, ex we' tu'n ttzaj jbal. 34Tej tque'yinte Faraón otok we' jbal tuc'ix sakbakun ex k'ancyok, o binchan il juntl maj ex cub tcyuwsa'ntl tanmi, cyuc'ix keju attok cyoclen ttxlaj. 35O cyuwix tanmi Faraón, ex minti' e je'tz ttzokpi'n ke aj Israel, ic tza'n otok tma Kman tu'n Moisés.

will be added

X\