ÉXODO 8

1tzaj tma'n Kman te Moisés: —Tocxa twitz Faraón ex k'manxa te: Chi Kmane aju Kdiose cyja': Che ttzokpi'mexa ke xjal etzan wu'ne tu'n cyc'ulun weye. 2Katzun mi'n ma che ex ttzokpi'na, che c'ixbiseteltzun xjal wu'ne cyu'n ẍal tuj tcyakil tx'otx' Ejipt. 3Che ul tpok'sa'n nima nim ẍal, che jawitz tuj a', che oquex tuj tjaya, che oquex jatum in tana, che jawix twi twatbila, che oquex tuj cyja keju at cyoclen ttxlaja ex tuj cyja ke t-xjalila, che oquex tuj cyjorniye, ex che belex cyuj ke cychoque jatum in xyok'it pan. 4Che jawix t'icpaj tibaja, cyibaj ke t-xjalila ex cyibaj cycyakil keju at cyoclen ttxlaja, chicuya te Faraón, chi Dios. 5Tzaj tma'ntl Kman te Moisés: —K'manxa te Aarón tu'n t-xi tnukpi'n tk'ab tuc'il tcy'ako'ch cyibaj ke nima, cyibaj ke toma ex cyibaj ke najab, tu'n cyjatz ẍal cyuj, tu'n tnoj twitz tx'otx' Ejipt cyu'n. 6Xitzun tnukpi'n Aarón tk'ab cyibaj ke nima tuj Ejipt, e jatztzun ẍal, ex baj noj tcyakil twitz tx'otx' Ejipt cyu'n. 7Ax icx cye chman o cybincha jlu tu'n cymañ, ex e jatz ẍal cyu'n tuj a' tuj tx'otx' Ejipt. 8E tzajtzun txco'n Moisés ex Aarón tu'n Faraón ex xi tma'n cye cyja': —Che cubsane twitz Cymane aju Cydiose tu'n cyel ti'n ke ẍal wi'je ex cyi'j ke nxjalile, ex jacutzun che ex ntzokpi'ne ke cyxjalile tu'n cyxi' k'olte chojbil te Cymane aju Cydiose, chi Faraón. 9Xi ttzak'we'n Moisés te Faraón: —K'mantza jtoj taja tu'n ncubsane ti'ja, cyi'j keju at cyoclen ttxlaja ex cyi'j ke t-xjalila, tu'ntzun cyel k'i'n ke ẍal cyi'je ex tuj cyjaye ex o'cx tu'n cycyaj ten tuj nima. 10Xi ttzak'we'n Faraón: —Nchi'jxi, chi Faraón. Xi tma'n Moisés te: —Cbantel ic tza'n ma tmaya, tu'ntzun tel tnic'a ti'j ka mi a'l juntl ic tza'n te Kmane, aju Kdiose. 11C'elel cypa'n cyib ke ẍal ti'ja, cyi'j ke tjaya, cyi'j keju at cyoclen ttxlaja ex cyi'j ke t-xjalila, ex o'cxtzun che cyjel ten tuj nima, chi Moisés. 12E etztzun Moisés ex Aarón twitz Faraón ex cubsan Moisés twitz Kman tu'n cyel ti'n ke ẍal, akeju otok che tzaj t-sama'n ti'j Faraón. 13O tbincha Kman ic tza'n o tma Moisés. E baj cyim ke ẍal tuj cyja xjal, ttxa'n cype'n ex tuj cojbil. 14E baj chmo'n ke ẍal cyu'n aj Ejipt, junx e cub cybuyba'n, ex baj tzuwix tcyakil tx'otx' Ejipt cyu'n. 15Tejtzun tque'yinte Faraón otok che el k'i'n ke ẍal ex minti'tltok in yajlanjtz, cub tcyuwsa'n tanmi ex minti' xi tk'o'n twi' ti'j tyol Moisés ex Aarón, ic tza'n otok tma Kman. 16Xitzun tma'n Kman te Moisés cyja': —K'manxa te Aarón tu'n t-xi tnukpi'n tcy'ako'ch, ex e tcub tpek'un tkukil tx'otx', tu'n toc te xmisak tuj tcyakil tx'otx' Ejipt. 17Cybinchatzun icju. Xi tnukpi'n Aarón tk'ab tuc'il tcy'ako'ch, cub tpek'un tkukil tx'otx', ex e oc chmet xmisak cyi'j ke xjal ex cyi'j ke alumaj, ex oc tcyakil tkukil tx'otx' te xmisak tuj tcyakil tx'otx' Ejipt. 18Ax icx oc tilil cyu'n chman tu'n cyjaw jlet xmisak tu'n cymañ, pero minti' o bant cyu'n. E oc cychmon cyib xmisak cyi'j xjal ex cyi'j alumaj. 19Xitzun cyma'n ke chman te Faraón cyja': —Tu'n Dios te jlu, che chi. Masque icju, pero cub tcyuwsa'n tanmi Faraón, ex minti' xi tk'o'n twi' ti'j tyol Moisés ex Aarón, ic tza'n otok tma Kman. 20Xi tma'n Kman te Moisés cyja': —Primx jaw we'ya nchi'j, we'cuya twitz Faraón oc tcu'x ttzi a', ex k'manxa te, chi Kmane cyja': Che ttzokpi'mexa ke xjal etzan wu'ne tu'n cyc'ulun weye. 21Katzun mi'n ma che ex ttzokpi'na, che tzajeltzun nsama'ne xcatz ti'ja, cyi'j keju at cyoclen ttxlaja, cyi'j ke t-xjalila ex cyuj ke cyjaye. Cnojel cyja aj Ejipt cyu'n xcatz, ax icx tcyakil tx'otx' jatum najl ke. 22Tuj k'ij lu c'elel npa'ne tx'otx' Gosén, jatum najl ke xjal etzan wu'ne, ex mlay jaw jlet xcatz ma chixin, tu'ntzun tel tnic'a ti'j ka akine Cyman aju Cydios aj Israel, ex atine tuj tx'otx' Ejipt. 23Che elel npa'ne ke xjal etzan wu'ne cyi'j ke t-xjalila. Nchi'j bant aju techal lu, chicuya te Faraón. 24Tbinchatzun Kman icju. Chmet nimxix xcatz tuj tja Faraón ex tuj cyja keju attok cyoclen ttxlaj, ex baj naj tcyakil tx'otx' Ejipt cyu'n xcatz. 25E tzajtzun txco'n Moisés ex Aarón tu'n Faraón, ex xi tma'n cye cyja': —Cyxi'ye, ex cyk'onxe chojbil te Cydiose, pero ax tuj tx'otx' lu, chi Faraón. 26Xitzun ttzak'we'n Moisés: —Mya ba'n tu'n tbant ku'ne icju, porque aju chojbil cxel kk'o'ne te Kmane aju Kdiose, mya ba'n tuj cywitz aj Ejipt, ex ka ma txi kk'o'ne chojbil mya ba'n tuj cywitz, jaculo ko oc xo'ne tu'n abj cyu'n. 27Il ti'j tu'n kxi bete ox k'ij tuj tzkij tx'otx', ex atzun cxel kk'o'ne chojbil te Kmane aju Kdiose, ic tza'n o tzaj tma'n keye, chi Moisés. 28Xitzun tma'n Faraón cye: —Jacu txi nk'o'ne ambil cyeye tu'n cyxi'ye k'olte chojbil te Cymane aju Cydiose tuj tzkij tx'otx', pero mi'n che'xe najchak. Che na'ne Dios wi'je, chi Faraón. 29Xi ttzak'we'n Moisés: —Oc wexe twitza, chin cubsale twitz Kmane aju Kdiose tu'n cyel ti'n ke xcatz nchi'j, tu'n cyel ti'n ti'ja, cyi'j keju at cyoclen ttxlaja ex cyi'j ke t-xjalila, pero mi'n ko cub t-sbu'na tu'n mi'n kex ttzokpi'na, ako'ye aj Israel, tu'n t-xi kk'o'ne chojbil te Kmane aju Kdiose, chi Moisés. 30Etztzun Moisés twitz Faraón, ex o cubsan twitz Kman. 31Tbinchatzun Kman ic tza'n tma Moisés, e je'l ti'n ke xcatz ti'j Faraón, cyi'j keju attok cyoclen ttxlaj ex cyi'j ke t-xjalil, ex mi jun xcatz cyaj ten. 32Pero cub tcyuwsa'n Faraón tanmi ex minti' e je'tz ttzokpi'n ke aj Israel.

will be added

X\