ÉXODO 6

1Tzaj ttzak'we'n Kman te Moisés: —Ja'lo oc tila'ya aju cbantel wu'ne ti'j Faraón, porque tu'n wipumale che eletz ttzokpi'n, ex tu'nx wipumale che eletz tlajo'n ti'jtzi ttx'otx', chi Dios. 2O yolin Dios juntl maj tuc'il Moisés ex tzaj tma'n te cyja': Akine Jehová aju Cydiose. 3Cub nyec'un wibe twitz Abraham, twitz Isaac ex twitz Jacob ex xi nma'ne cye: Akine Dios at wipumale tu'n tbant tcyakil wu'ne; atzun ti'j nbiye Jehová minti' xi nma'ne cye. 4Cyaj bant ti'j jun nyole axix toc cyuc'il, tu'n t-xi nk'o'ne tx'otx' Canaán cye, jatum e najan ic tza'n stranjer xjal. 5Atzun ja'lo, in nbi'ne in che ayayan aj Israel tu'nju ma che oc lajwersin ti'j ak'untl cyu'n aj Ejipt, ex ma tzaj nna'ne nyole cyaj bant ti'j cyuc'il. 6Tu'ntzun jlu k'manxa cye aj Israel: Akine Cymane, ex akine chin eletz k'inte cyeye tjak' yajbil cyeye aju in cub cyk'o'n aj Ejipt. Che eletz ntzokpi'ne tjak' ak'untl ex che co'pjele wu'ne tu'n wipumale nim, tuc'il c'ixbisabl ma'xix cyibaj aj Ejipt. 7Che oquel nk'o'ne te jun c'loj xjal etzan wu'ne, ex akine chin oquel te Cydiose. C'elel cynic'e wi'je, ka akine Cymane ex Cydiose aju etz k'inte cyeye tjak' yajbil ma'xix cub k'o'n cyu'n aj Ejipt. 8Atzun che pol wi'ne tuj tx'otx' xi ntziyane te Abraham, te Isaac ex te Jacob, ex cxel nk'o'ne tx'otx' lu te cyetzbile, akine Cymane, chicuya cye, chi Dios te Moisés. 9Atzun yol lu xi tma'n Moisés cye aj Israel; atzun cye minti' xi cybi'n tyol tu'nju otok baj cyc'u'j tu'n ak'untl cyuw. 10O yolintl Kman tuc'il Moisés ex tzaj tma'n te cyja': 11—Txi'ya tuc'il Faraón aju rey te Ejipt ex k'manxa te tu'n cyetz ttzokpi'n aj Israel tuj ttx'otx', chi Kman. 12Xi ttzak'we'n Moisés te Kman: —Minti' in chin ocx nimane cyu'n aj Israel. ¿Tza'ntzun tten chin oquex bi'ne tu'n Faraón, porque xt'ab chin yoline? Chi Moisés. 13O yolin Kman tuc'il Moisés ex Aarón, ex tzaj tma'n cye tu'n t-xi cyma'n cye aj Israel ex te Faraón ka otok tma Dios cye tu'n cyetz cyi'n aj Israel tuj tx'otx' Ejipt. 14Atzun ke nejenel cyxol ke cyxe'chel: Ke tcy'ajal Rubén, aju tnejel tcy'ajal Israel, atzun ke jlu: Hanoc, Falú, Hezrón ex Carmi. Atzun ke jlu cyxe'chel tiyjil Rubén. 15Ke tcy'ajal Simeón, atzun ke jlu: Jemuel, Jamín, Ohad, Jaquín, Zohar ex Saúl aju tal jun aj Canaán. Atzun ke jlu cyxe'chel tiyjil Simeón. 16Ke tcy'ajal Leví, atzun ke jlu: Gersón, Coat ex Merari, atzun ke jlu cyxe'chel tiyjil Leví. 137 abk'i ten Leví twitz tx'otx'. 17Ke tcy'ajal Gersón, atzun ke jlu: Libni ex Simei, teyle te junjun c'loj tiyjil. 18Ke tcy'ajal Coat, atzun ke jlu: Amram, Izhar, Hebrón ex Uziel. 133 abk'i ten Coat twitz tx'otx'. 19Ke tcy'ajal Merari, atzun ke jlu: Mahli ex Musi. Atzun ke jlu cyxe'chel tiyjil Leví. 20Moje' Amram tuc'il Jocabed aju tanb tman, ex e ul itz'j cabe tcy'ajal ti'j; Aarón tbi jun, ex Moisés tbi juntl. 137 abk'i ten Amram twitz tx'otx'. 21Ke tcy'ajal Izhar, atzun ke jlu: Coré, Nefeg ex Zicri. 22Ke tcy'ajal Uziel, atzun ke jlu: Misael, Elzafán ex Sitri. 23Moje' Aarón tuc'il Elisabet aju tme'jel Aminadab ex tanb Naasón. Ke tcy'ajal e tzaj ti'j Elisabet, atzun ke jlu: Nadab, Abiú, Eleazar ex Itamar. 24Ke tcy'ajal Coré, atzun ke jlu: Asir, Elcana ex Abiasaf. Atzun ke jlu cyxe'chel tiyjil Coré. 25Moje' Eleazar aju tcy'ajal Aarón tuc'il jun xu'j cyxol ke tme'jel Futiel, ex ul itz'j jun tcy'ajal ti'j, Finees tbi. Atzun ke jlu nejenel cyxol teyle junjun c'loj aj Leví. 26Axtzun ke jlu, Aarón ex Moisés, akeju o yolin Kman cyuc'il tu'n cyetz cyi'n aj Israel tuj tx'otx' Ejipt tuj c'lojin cyten. 27Axte Moisés ex Aarón e yolin twitz Faraón aju rey te Ejipt tu'n cyetz ttzokpi'n ke aj Israel tuj Ejipt. 28Tej tyolin Kman tuc'il Moisés tuj tx'otx' Ejipt, 29tzaj tma'n te cyja': —Akine Cymane. K'manxa te Faraón aju rey te Ejipt tcyakilju cxel nma'ne teya, chi Kman. 30Xitzun ttzak'we'n Moisés: —Nman, xt'ab chin yoline. ¿Tza'ntzun tten chin oquex bi'ne tu'n Faraón?

will be added

X\