ÉXODO 5

1E ocxtzun Moisés ex Aarón twitz Faraón ex xi cyma'n te cyja': —Ate Kmane ex Kdiose, ako'ye aj Israel, in tma'n teya cyja': Che ttzokpintza ke xjal etzan wu'ne, tu'n cyic'san nink'ij te nimbil weye tuj tzkij tx'otx'. 2Xi ttzak'we'n Faraón cyja': —¿Alcyeju nno'c cyk'o'ne te Cymane, ex cyaje tu'n t-xi nbi'ne tyol tu'n cyex ntzokpi'ne ke aj Israel? Minti' ojtzki'n Cymane wu'ne, ex mlayx che ex ntzokpi'ne ke aj Israel tu'n cyex, chi Faraón. 3Xitzun cyma'n te cyja': —Aju Kmane ex Kdiose, ako'ye aj Hebrey, o cub tyec'un tib kwitze. Ko xe'ltzune ja'lo tuj tzkij tx'otx' ox k'ij kbeye, ex cxel kk'o'ne chojbil te, tu'n mi'n ttzaj tk'o'n tx'u'j yabil ex ka k'oj kibaje, che chi. 4Xitzun tma'n rey te Ejipt cye Moisés ex Aarón cyja': —¿Tiku'n in che el cypa'ne ke xjal ti'j cyak'un? Cyxi'tle ak'nal, chi rey. 5Ax icx xi tma'ntl Faraón: Ma chmet nimxix cyajlal aj Israel tzalu, atzun cyeye cyaje tu'n cyel cypa'ne ke ti'j cyak'un, chi Faraón. 6Tujx k'ij lu xi tma'n Faraón cye caporal ex cye tmayordom cyja': 7—Texju ja'lo mi'n txi cyk'o'ntle tkan triw cye aj Israel tu'n tbant lok' ic tza'n in bant ja'lo. Cyu'nx e ttzaj cyjyo'n tkan triw, 8ex cyk'oncuye cytarey ax ic tza'n ja'lo; mi'n tz'ajtz cylak'ba'ne. Ake jlu cy'aj ke, ex tu'ntzun jlu in jaw tk'ajk'ajel cywi' ex in cyma'n: Ko'ke, ex kk'onx chojbil te Kdios, che chi. 9E tcub mas nim ak'untl cyibaj tu'ntzun cyak'nan ti'j, ex mya tu'n t-xi cybi'n nic'aj yol, chi Faraón. 10E je'tztzun ke caporal ex ke mayordom, ex xi cyma'n cye xjal cyja': Ma tma Faraón tu'n mi'n t-xi kk'o'ne tkan triw cyeye. 11Ax keye che xe'l jyolte nok jatum ccnetel cyu'ne, ex ax tajlal cytareye cbantel ic tza'n nej, che chi. 12Bajtzun cysipan cyib aj Israel tuj tcyakil tx'otx' Ejipt, ex tzaj cyi'n tloc' triw tu'n tajben te t-xel tkan triw. 13Atzun cye mayordom e oc cylajo'n ke xjal ti'j ak'untl, ex xi cyma'n cye cyja': Cybinchame tajlal cytareye teyle junjun k'ij ic tza'n in banttok cyu'ne tej cucxtok t-xi k'ot tkan triw cyeye, che chi. 14E baj asyalin ke caporal aj Israel cyu'n ke tmayordom Faraón, ex xi cyma'ntl cye cyja': ¿Tiku'n minti' ma bant tajlal lok' ic tza'n nej, mi ew ex mi ja'lo? Che chi. 15E ultzun ke caporal aj Israel twitz Faraón ex xi cyma'n te cyja': —¿Tiku'n in tbincha'na ki'je icju, ako'ye tmajena? 16Minti' in tzaj k'o'n tkan triw keye. Nno'c k'o'n il ki'je tu'n tbant tajlal lok' ic tza'n nej, ex in ko baj asyaline. Bix ake t-xjalila at cypaj, che chi. 17Xitzun ttzak'we'n Faraón: —Cy'aj keye. Ax toc cy'aj keye. Tu'ntzun jlu in cyma'ne: Ko'ke ex kk'onx chojbil te Kman, che chiye. 18Cyxi'ye ex che ak'nantle. Mi'n txi k'ot tkan triw cyeye, ex ax tajlal lok' cbantel cyu'ne ic tza'n nej, chi Faraón. 19Atzun cye caporal aj Israel bi'x e bisun tej ttzaj k'ma'n cye cyja': Mi'n tz'ajtz lak'e' tajlal lok' in bant teyle junjun k'ij. 20Tej cyetz ke caporal yolil twitz Faraón, oc cyc'ulban cyib tuc'il Moisés ex Aarón, akeju in che ayontok cyi'j. 21Xi cyma'n ke caporal cye cyja': —Jacu til Kman cyi'je, ex ate cbel k'onte cycastiwoye. Tu'n cylaje ma ko el ic'une tu'n Faraón ex cyu'n ke tmayordom. Mer ic tza'n jun spad o txi cyk'o'ne tuj cyk'ab tu'n kcub byo'ne cyu'n, che chi caporal. 22O yolin Moisés juntl maj tuc'il Kman, ex chi cyja': —Nman, ¿tiku'n in che cub tc'ixbisa'na ke xjal lu? ¿Ti wile in tzaj t-sama'na? 23Atxix tej wule yolil tuc'il Faraón te t-xela, mas ma che cub tc'ixbisa'n ke xjal etzan tu'na, ex na'nx cyclet tu'na, chi Moisés.

will be added

X\