ÉXODO 4

1Xitzun tma'n Moisés te cyja': —Yajtzun ka mi'n ẍinx cyniman, ka mi'n ẍinx cybi'n, ex ka ma cyma cyja': Minti' o cub tyec'un tib Kman twitza, ka che chi. 2Tzajtzun tkanin Kman te: —¿Titzun k'i'n tu'na tuj tk'aba? Xi ttzak'we'n Moisés: —Jun cy'ako'ch, chi Moisés. 3Tzaj tma'n Kman te cyja': —Xo'nxa twitz tx'otx'. Xitzun t-xo'n Moisés twitz tx'otx', o ch'expaj naj ex oc te jun lobaj. Atzunte Moisés, el ok ti'j. 4Tzajtzun tma'n Kman te Moisés: —Nukpinx tk'aba, ex tzyuntza tje', chi Dios. Xi tnukpi'n Moisés tk'ab ex tzaj ttzyu'n; o ch'expaj naj, ex octl te cy'ako'ch tuj tk'ab. 5Tzaj tma'n Kman te cyja': —Tu'ntzun jlu c'oquex cyniman ka ax toc o cub nyec'un wibe twitza, akine Dios, aju Cydios t-xe'chela, Tdios Abraham, Tdios Isaac ex Tdios Jacob. 6Tzaj tma'ntl Kman te: K'o'ncx tk'aba ttzi t-xu'ca. Ocxtzun tk'o'n tk'ab ttzi t-xu'c, ex tej tetz ti'n, lu nojnitok ti'j tu'n tx'a'c, ex sak que'yintok ic tza'n ttxa che'w. 7Tzaj tma'ntl Kman te cyja': —K'o'ncx juntl maj tk'aba ttzi t-xu'ca. Ocxtzun tk'o'ntl Moisés tk'ab ttzi t-xu'c ex tej tetz ti'ntl, otok banix tk'ab ic tza'nx tten tcyakil t-ximlal. 8—Katzun mi'n ma txi nimana cyu'n, ex ka mi'n ma txi cybi'n tyola oc tbant tnejel techal, cxeltzun nimana cyu'n oc tbant tcabin techal. 9Katzun mi'n ma txi cyniman ke cabe techal lu, ex ka mi'n ma txi cybi'n tyola, cjawitztzun ti'na ch'in a' tuj nima ex cbel tko'na twitz tx'otx'. Cch'expeteltzun a' lu ex c'oquel te chic' twitz tx'otx', chi Dios. 10Xitzun ttzak'we'n Moisés te Kman cyja': —Ay, Tat. Bajx chin oque te jun xjal nok tocx yol tuj ttzi'; atxix wul-len itz'je ex mya nok o'cx tej ma yolina wuc'ile yaj in meltz'aj ntzi'ye ti'j yol, ex xt'ab chin yoline, chi Moisés. 11Tzajtzun tma'n Kman te cyja': —¿Al u'n bant ttzi xjal? ¿Al u'n bant aju xjal miban yolin ex aju xjal miban bin, aju xjal ba'n que'yin ex aju xjal moẍ? ¿Myapetzun wu'ne, akine Cymane? 12Txi'ya ja'lo. Akine chin onil teya oc tyolina, ex cxel nxnak'tza'ne alcye yol cxel tma'na, chi Dios. 13Xitzun tma'ntl Moisés te Dios: —Nman, chin cubsale twitza tu'n t-xi t-sama'na junxitl xjal, chi Moisés. 14Tzajtzun tk'oj Kman ti'j Moisés ex tzaj tma'n te cyja': —¿Myapetzun ojtzki'n Aarón wu'ne, aju aj Leví ex ttzica? Ba'n wu'ne ba'nxix yolin. Tzul canul ti'ja, ex oc tque'yinjtza tu'n ctzalajel nim tuj tanmi. 15Aya c-yolil tuc'il, ex cxel tma'na te alcye yol tu'n t-xi tma'n. Akine chin xel k'onte yol tuj ttzi'ya, ax icx tuj ttzi Aarón, ex che xel nxnak'tza'ne alcye cbantel cyu'ne. 16A Aarón c-yolil te t-xela cywitz xjal. Ate c'oquel mer ic tza'n ttzi'ya; atzun teya c'oquela mer ic tza'n Dios te te. 17K'inxa aju cy'ako'ch lu, porque tu'ntzun jlu che bantel ke techal tu'na, chi Dios. 18Ic'tzun Moisés, pon tja Jetro aju tji' ex xi tma'n te cyja': —Waje tu'n waj meltz'aje cyuc'il nxjalile ate' tuj Ejipt, tu'n twile ka itz'x ke, chi Moisés. Xitzun tma'n Jetro te Moisés: —Txi'ya tuc'il tzalajbil. 19Ax icx otok tzaj tma'n Kman te Moisés tuj Madián cyja': —Taj meltz'aja tuj Ejipt porque o che cyim cycyakil keju cyajbiltok tu'n tcub byo'na cyu'n. 20Tzajtzun ti'n Moisés aju t-xu'jil cyuc'ix ke tc'wa'l, e jax tk'o'n cyibaj bur, ex aj meltz'aj tuj Ejipt. Ax icx xi ti'n Moisés aju cy'ako'ch te Dios. 21Xi tma'n Kman te Moisés: —Oc tpona tuj Ejipt nok mi bant tu'na ke binchben nim cyipumal twitz Faraón, porque o txi nk'o'ne tipumala tu'n cybant tu'na. Masque icju, pero cbel ncyuwsa'ne tanmi, ex mi'n che etz ttzokpi'n ke aj Israel. 22Cxeltzun tma'na te Faraón: O tzaj tma'n Kmane cyja': Ke aj Israel mer ic tza'n tnejel ncy'ajale ke. 23Ma txi nma'ne teya tu'n cyex ttzokpi'na tu'n cyc'ulun weye; atzun teya mi'n taja tu'n cyex ttzokpi'na. Tu'n jlu cbel nbyo'ne aju tnejel tcy'ajala, chicuya te Faraón, chi Dios te Moisés. 24Cyja'tok t-xi' Moisés tuj be ex pon jatum tu'n tex ak'bil te. Cub tyec'un tib Kman twitz ex o tajbe Kman tu'n tcub byo'n Moisés tu'n. 25Tzajtzun ti'n Séfora jun abj attok ttzi' wen, el tkesin ttz'umal twi ttz'a'lbil tal, xi t-xo'n cyxe tkan Moisés ex xi tma'n te cyja': Ax toc nchmil, nok tu'n tlaja ma tz'el chic', chi xu'j. 26O tma Séfora icju tu'n tlaj sircunsisyón. Cyja'tzun tten tzokpet Moisés tu'n Kman. 27Tzaj tma'n Kman te Aarón: —Txi'ya canul ti'j Moisés tuj tzkij tx'otx', chi Kman. Tzajtzun Aarón, ex o cnet Moisés tu'n t-xe witz te Dios ex el ttz'uban twitz. 28Xitzun ttx'olba'n Moisés te Aarón tcyakil yol otok tzaj tma'n Kman te, cyuc'ix cycyakil ke techal otok che tzaj k'ma'n te tu'n tbinchante. 29E je'xtzun Moisés ex Aarón ex e oc cychmo'n cycyakil ke tij xjal at cyoclen cyxol aj Israel. 30Xi ttx'olba'n Aarón tcyakilju otok tzaj tma'n Kman te Moisés ex tbincha ke techal cywitz ke xjal. 31Xitzun cyniman aj Israel tyol Moisés. Tej cybinte ka otok til Kman aju yajbil cye ex tajbiltok tu'n t-onin cyi'j, e cub moc'e' ex e c'ulun.

will be added

X\