ÉXODO 36

1Cyja'tzun, ate Bezaleel ex Aholiab, cyuc'ix cycyakil keju at cynabl tu'n cybinchante ak'untl tbanilxix, akeju o tzaj tk'o'n Kman cynabl ex cyojtzkibl tu'n cybinchante tcyakilju at tajben tuj tja Dios, cbantel cyu'n aju o tzaj tma'n Kman, chi Moisés. 2Tzaj txco'n Bezaleel tu'n Moisés, tuc'ix Aholiab ex cycyakil keju attok cynabl tu'n cybinchante ak'untl tbanilxix, akeju otok tzaj tk'o'n Kman cynabl ex otok txi cyk'on cyib tu'n cyex cygan tu'n cyonin ti'j ak'untl lu. 3Xi cyc'mo'n te Moisés ke oyaj otok che ul cyi'n aj Israel tu'n cyajben tuj tja Dios. Atzun cye aj Israel, teyle junjun prim cucxtok tul cyi'n cyoyaj tu'n cyex cygan. 4Cycyakil keju attok cynabl ex in che ak'nantok ti'j ju attok tajben ti'j tja Dios, we' ch'in ak'untl cyu'n, 5ex e je'x k'malte te Moisés cyja': Ma tzul cyi'n xjal mas nim twitzju at tajben ti'j ak'untl o tzaj tma'n Kman tu'n tbant, che chi. 6Xitzun t-sama'n Moisés tkanil cyxol cycyakil xjal tuj campament, chi cyja': Mi jun xinak, mi jun xu'j ctzajel ti'ntl toyaj ti'j tja Dios, chi. Cyja'tzun tten o we' tu'n tul cyi'n xjal cyoyaj. 7Mya nok o'cx otok chmet aju attok tajben tu'n tbant ak'untl, ax icx otok pon mastl tibaj. 8Akeju mas attok cynabl tu'n cybinchante ak'untl tbanilxix, baj cybincha'n ja xbalun cyi'j laj xbalun binchamaj ti'j nok' lino ex ti'j nok' ẍk'ilun que'yin, ẍjulin que'yin ex cyak que'yin; tcyakil nok' chubemajtok ex tbanil binchben cye, ex bi'x xi cychmo'n cyilbilal querubín cywitz. 9Cycyakil xbalun lu junx ta' echbil cye: Cyajlaj var cynukbil ex cab var cywitz. 10Oc t-slapun Bezaleel jwe' xbalun jun ttxlaj juntl, ax icx e tenba jwe'tl. 11E oc tk'o'n tak'al ẍk'ilun che que'yin te t-ẍcyin ttxlaj mancbil xbalun cyi'j ke jwe' otok che oc slapit. Ax icx e oc tk'o'n tak'al ttxlaj jun xbalun cyi'j ke jwe'tl. 12E oc tk'o'n 50 tak'al te t-ẍcyin ttxlaj tnejel xbalun ex 50 ttxlaj juntl, tu'n tcyaj ten jun twitz juntl. 13Ax icx baj tbincha'n 50 ganch k'an pwak cytx'otx'il. Cyu'ntzun ke jlu e oc tmojba'n ke ttxlaj xbalun jun tuc'il juntl. Octzun ja xbalun te junx tten. 14Ax icx baj tbincha'n junlaj xbalun ti'j cytzmal chip, tu'n t-xi lic'et tibaj ja xbalun. 15Cycyakil ke xbalun lu junx ta' echbil cye: Olaj var cynukbil ex cab var cywitz. 16E oc t-slapun jwe' xbalun jun ttxlaj juntl, ax icx e oc t-slapun kaktl xbalun jun ttxlaj juntl. 17E oc tk'o'n 50 tak'al te t-ẍcyin ttxlaj tnejel xbalun ex 50 ttxlaj juntl. 18Ax icx tbincha 50 ganch k'an c'uxbil cytx'otx'il tu'n cyoc moje' cytxa'n xbalun, tu'ntzun toc te junx tten. 19Tbincha jun maksibl te ja xbalun ti'j ttz'umal ẍne'l toc tc'a' cyak que'yin, ex tibajxi jlu tbincha juntl maksibl ti'j tz'u'm tbanilxix. 20E baj tbincha'n txkan tz'lom ti'j tze' ch'i'x acacia, akeju wa'l cyten tu'n cyajben ti'j ja xbalun. 21Teyle junjun tz'lom, jwe' var tnukbil ex ox xc'achub twitz. 22Teyle junjun tz'lom at cabe t-ẍcyin tu'n tcu'x ke' jun ttxlaj juntl. Iclex e tenba cycyakil ke tz'lom tu'n ti'j ja xbalun. 23E baj tbincha'n winkin tz'lom tu'n cyoc ten tuj tumlal tnayaj k'ij te ja xbalun. 24Ax icx e cub tbincha'n 40 cyk'ukbil tz'lom sak pwak cytx'otx'il. Cabe tk'ukbil tjak' teyle junjun tz'lom, tu'n cycu'x ke' cycabil cyẍcyin cyuj. 25Ax icx tuj juntl pac' ja xbalun, tuj tumlal tbank'ab k'ij tbincha winkin tz'lom, 26ex 40 cyk'ukbil sak pwak cytx'otx'il, tu'n cyten cabe tjak' teyle junjun tz'lom. 27Atzun ti'jxi ja xbalun, tuj telex k'ij, e baj tbincha'n kak tz'lom 28ex cabetl tz'lom tu'n cyoc cyi'j ke cabe tbutx' te ti'jxi, 29akeju tu'n cymojbet xi'ynix t-xe', atzun twi' tu'n cyoc mojbet tu'n jun argoy. Atzun jlu tbincha cyi'j cycabil tz'lom cyi'j cycabil tbutx' te ti'jxi. 30E banttzun wajxak tz'lom ex kaklaj cyk'ukbil sak pwak cytx'otx'il, cabe tjak' teyle junjun tz'lom. 31Ax icx baj tbincha'n jwe' tze' ti'j tze' ch'i'x acacia, te tk'e'lil, tu'n cyoc ten ke tz'lom cyi'j tuj jun pac' ja xbalun, 32jwe'tl tze' tu'n cyoc ten ke tz'lom cyi'j tuj juntl pac' ex jwe'tl tu'n cyoc ten ke tz'lom cyi'j ti'jxi ja xbalun tuj telex k'ij. 33Baj tbincha'n aju tze' te tuj tmij, tu'n tic'x cymij ke tz'lom, tu'n t-xi ke' ti'j jun ttxa'n ex tu'n tpon baj ti'j juntl. 34Oc tlo'tzin k'an pwak cyi'j ke tz'lom ex e baj tbincha'n ke argoy k'an pwak cytx'otx'il jatum tu'n cyex ke tze'. Ax icx oc tlo'tzin k'an pwak cyi'j ke tze' lu. 35Baj tbincha'n jun xbalun te makbil, ti'j nok' lino chubemaj ttze'yil, ex ti'j nok' ẍk'ilun que'yin, ẍjulin que'yin, cyak que'yin, tbanil binchben te, ex bi'x xi tchmo'n cyilbilal querubín twitz. 36Baj tbincha'n cyaje tkan ti'j tze' ch'i'x acacia, ex oc tlo'tzin k'an pwak cyi'j. Ax icx tbincha ke tganchil k'an pwak cytx'otx'il, ex cyaje cyk'ukbil tkan sak pwak cytx'otx'il. 37Ax icx tbincha jun xbalun te makbil ttzi ja xbalun. Baj tbincha'n ti'j nok' ẍk'ilun que'yin, ẍjulin que'yin ex cyak que'yin ex ti'j nok' lino chubemaj ttze'yil, ex bi'x xi tchmo'n ke tilbilal twitz. 38E baj tbincha'n jwe' tkan tuc'ix adorn tjax tuj cywi', ex oc tlo'tzin k'an pwak cyi'j. Ax icx tbincha ke tganchil k'an pwak cytx'otx'il, ex tbincha jwe' cyk'ukbil tkan k'an c'uxbil cytx'otx'il.

will be added

X\