ÉXODO 33

1Tzaj tma'n Kman te Moisés cyja': Cyic'e tzalu, aya ex ke xjal e je'tz ti'na tuj Ejipt; cyxi'ye tuj tx'otx' xi ntziyane te Abraham, te Isaac ex te Jacob, tu'n t-xi nk'o'ne cye cyiyjil che ul itz'j te tibajxi. 2Cxel nsama'ne n-anjele tu'n tcub nej cywitze, ex che elex nlajo'ne ke aj Canaán, ke aj Amorrey, ke aj Hetey, ke aj Ferezey, ke aj Hevey ex ke aj Jebusey. 3Cyxi'ye tuj tx'otx' k'inun tx'otx' ex tbanilxix. Atzun weye mi'n chinxe cyxole; mya yajcu jacu che naje wu'ne tuj be, tu'nju miban che bine, chi Dios. 4Tejtzun cybinte xjal tkanil mya ba'n lu, tzaj nimxix cybis, ex mi jun baj tbinchan tib cyu'n ke ti'xti tbanilxix, 5tu'nju otok tzaj tma'n Kman te Moisés tu'n t-xi tma'n cye aj Israel cyja': Akeye xjal miban che bine, ka ma chinxe cyuc'ile, te jun rat jacu che naje wu'ne. Cyi'mele bi'x ja'lo ke ti'xti tbanilxix nno'c cyk'o'ne cyi'je, tu'ntzun nlonteye ti cbantel wu'ne cyi'je. 6Eltzun cyi'n aj Israel ke ti'xti tbanilxix cyoc cyi'j, tej cyic' t-xe witz Horeb. 7Etztzun ti'n Moisés ja xbalun ex jaw tbincha'n najchak ti'jxi campament, ex Ja Xbalun te Mojbabl Tibil tbi oc tk'o'n. Ka attok jun tajbil tu'n tyolin tuc'il Kman, nnu'ltok twitz ja xbalun aju tetz ti'jxi campament. 8Oc t-xi' Moisés tumlal ja xbalun, cycyakil xjal in che jaw we'tok, in che cub we'tok ttzi cyja, ex ax in xi bajtok cywitz ti'j Moisés ocxi tocx baj tuj. 9Octzun tocx tuj, in cubtok muj ttzi ja xbalun ex ax in cub ten acux in yolintok Kman tuc'il Moisés. 10Octzun cyque'yinte cycyakil xjal aju muj tcub ttzi ja xbalun, teyle junjun in cub moc'e'tok ax ttzi tja, tu'n tc'ulun. 11Acu Dios in yolintok tuc'il Moisés ic tza'n in yolin jun xjal tuc'il tamiw. Oc tbaj yolin Moisés tuc'il Kman, nna'j meltz'ajtok tu'n tpon tuj campament. Atzunte cu'xun Josué tcy'ajal Nun, aju onil te Moisés, minti'tok nne'l lak'e' tuj ja xbalun. 12Xi tma'n Moisés te Kman cyja': —Bintza, in tzaj tma'na weye: K'inxa ke xjal lu, chiya, pero na'nx ttzaj tchic'ba'na weye alcye cxel t-sama'na wuc'ile. Ax icx in tma'ntla cyja': Ojtzki'na wu'ne ex ba'n ma tz'e'la tuj nwitze, chiya weye. 13Katzun icju, ka ba'n ma chin e'le tuj twitza, in chin cubsane twitza tu'n ttzaj tyec'una tbeya weye, tu'ntzun tel nnic'e ti'ja ex tu'n tcnet t-xtalbila wu'ne. Ximana ti'j, ke xjal lu teya ke, chi Moisés. 14Tzajtzun tma'n Kman cyja': —Ax kine chin xe'l tuc'ila, ex ctzajel nk'o'ne ojlabl teya, chi Kman. 15Xitzun tma'n Moisés te cyja': —Katzun mya aya cxe'l kuc'ile, mi'n ko ex ti'na tzalu. 16¿Tza'n tten c'elel nic'baj ti'ja ka ba'n ma ko e'le tuj twitza, akine ex ke xjal etzan tu'na? ¿Myapetzun tu'nju in beta kuc'ile ex tu'nju pa'maj ko'ye tu'na cyxol ke mastl nasyon tuj tcyakil twitz tx'otx'? Chi Moisés. 17Tzajtzun tma'n Kman te cyja': —Oc nbincha'ye aju ma tmaya, tu'nju ba'n ma tz'e'la tuj nwitze ex ojtzki'na wu'ne, chi Dios. 18Xitzun tma'n Moisés te: —Chin cubsale twitza, yec'untza tajwalila weye. 19Tzaj ttzak'we'n Kman: —Cxel nyec'une nc'ujlalile teya ex cxel nma'ne nbiye twitza. Ka waje tu'n ttzaj k'ak'an nc'u'je ti'j jun xjal, ctzajel k'ak'an nc'u'je ti'j; ex ka waje tu'n ttzaj tz'e'y wanmiye ti'j jun xjal, ctzajel tz'e'y wanmiye ti'j. 20Mlay tz'oc tque'yina nwitze, porque ka ma tz'oc tque'yin jun xjal nwitze mlay tz'ank'intl. 21Ax icx tzaj tma'ntl Kman: —Lu jun lugar at junx wuc'ile. We'cuya twi pic. 22Octzun tic' wajwalile, cbelex nk'o'ne tuj jun tpa'xil pic, ex cbel ntxayine tibaja tu'n nk'abe ocxi wic'xe. 23Te tibajxi c'elel wi'n nk'abe tibaja ex oc tila'ya ttzal wi'je; atzun nwitze mlay tila, chi Kman te Moisés.

will be added

X\