ÉXODO 32

1Tej tcyil xjal mintz'ininxtok cubil Moisés, baj cychmon cyib ti'jele Aarón, ex xi cyma'n te cyja': —Chuxa, binchame junjun kdiose tu'n cycub nej kwitze. Minti' ba'n ku'ne ti ma baj ti'j Moisés aju etz k'inte keye tuj Ejipt, che chi. 2Xitzun tma'n Aarón cye cyja': —Cyi'n ele ke cyuj ẍcyinbaj k'an pwak cytx'otx'il, aju toc cyu'n cyxu'jile, cyme'jele ex cycy'ajale, ex cyi'ntze wuc'ile, chi Aarón. 3Cycyakil xjal, el cyi'n ke cyuj cyẍcyin k'an pwak cytx'otx'il ex xi cyi'n tuc'il Aarón. 4O tc'am Aarón tcyakil jlu, ex ocx tk'o'n tuj k'ak' tu'n tcub ulj. Ti'jtzun jlu baj tbincha'n jun tilbilal tal tor tu'n tz'kab ex cymatzun xjal: Akeye aj Israel, lu kdios lu aju etz k'inte ke tuj Ejipt, che chi. 5Tej tque'yinte Aarón jlu, jaw tbincha'n jun altar twitz tilbilal tal tor, ex xi tma'n tkanil lu: Nchi'j cub ic'set nink'ij te nimbil te Kman, chi Aarón. 6Tujtzun juntl k'ij, junya'x e jaw we', xi cyk'o'n oyaj patun in che cub ex oyaj te mojbabl tibil, ex e cub ke' wa'l ex c'al. Te tibajxi e oc ten bixal. 7Tzajtzun tma'n Kman te Moisés cyja': —Chux tcu'xa, porque ke t-xjalila, akeju e je'tz ti'na tuj Ejipt, ma che binchan il; 8jurat naj ma tz'el cypa'n cyib ti'j be xi nma'ne cye. Ma cub cybincha'n jun tilbilal tal tor k'an pwak ttx'otx'il ex lu ke in che c'ulun twitz, in cub cyk'o'n oyaj twitz ex in cyma'n cyja': Akeye aj Israel, lu kdios lu aju etz k'inte ke tuj Ejipt, che chi. 9Ax icx tzaj tma'ntl Kman te Moisés: —Ma tz'el nnic'e cyi'j ke xjal lu, ax toc miban che bin. 10Atzun ja'lo mi'n colina cyi'j porque ctzajel nimxix ntx'u'jile cyi'j, ex che bajel naj wu'ne, pero ti'ja c'elel jlet jun nintz nasyon wu'ne, chi Dios. 11Octzun ten Moisés cubsal twitz Kman aju Tdios, ex xi tma'n te cyja': —Nman, ¿tiku'n ctzajel nimxix ttx'u'jila cyi'j ke xjal etzan tu'na, akeju tu'na e je'tz tuj Ejipt tu'n tipumala nimxix? 12¿Tza'n tten cxel tk'o'na ambil cye aj Ejipt tu'n cymante cyja': O che ex ti'n Dios ke aj Israel tu'n tbinchante mya ba'n cyi'j, tu'n cycub tbyo'n cywi witz, ex bi'x tu'n cynaj tu'n twitz tx'otx'? Che chilo aj Ejipt. Colinxa tu'n ttzaj ttx'u'jila cyi'j, ex ch'expuma aju mya ba'n ma cub t-ximana tu'n tbinchanteya cyi'j ke xjal etzan tu'na. 13Na'ntza Abraham, Isaac ex Israel ke tmajena, akeju tu'nx tiba xi tma'na jun yol axix toc cye cyja': Cchmetel nimxix cyiyjile wu'ne ic tza'n cyajlal ke che'w twitz cya'j, ex cxel nk'o'ne cye tcyakilju tx'otx' o txi ntziyane cyeye, ex c'oquel te cyetzbil te jumajx, chiya cye, chi Moisés. 14Bajtzun tch'expu'n Kman aju mya ba'n otok cub t-ximan tu'n tbinchante cyi'j ke xjal etzan tu'n. 15Cu'tztzun Moisés twi witz, k'i'n tuj tk'ab ke cabe tz'lom abj jatum tz'iban ley cywitz cycabil plaj teyle junjun. 16Tu'nx Dios otok che bant ke tz'lom abj ex tu'nx Dios otok che cub tz'iban ke yol cywitz. 17Tej tbinte Josué tk'ajk'ajel cywi xjal in che sch'intok, xi tma'n te Moisés cyja': —Tk'ajk'ajel k'oj in binjtz tuj campament, chi Josué. 18Atzunte Moisés xi ttzak'we'n: —Aju tk'ajk'ajel lu, mya tk'ajk'ajel cywi' keju ma che camban, mi tk'ajk'ajel cywi' keju ma cub cyi'j; tk'ajk'ajel bitz aju in nbi'ne, chi Moisés. 19Tej tcubil Moisés tuj campament, o til aju tilbilal tal tor ex ke xjal in che bixuntok twitz. Tzaj tk'oj Moisés, e cub t-xo'n ke tz'lom abj cyocxtok cyuj tk'ab, ex e baj tbuchin t-xe witz. 20Tzaj ti'n tilbilal tal tor otok cub cybincha'n xjal, ocx tk'o'n tuj k'ak', baj tche'n tejxi tkukix, xi tchitun kuk lu tibaj a', ex xi tk'o'n a' lu te cyc'a aj Israel. 21Xitzun tma'n Moisés te Aarón cyja': —¿Ti ma cybincha xjal lu ti'ja, tu'nju ma txi tk'o'na ambil cye tu'n cybinchante jun il ma'xix, chi Moisés. 22Xi ttzak'we'n Aarón: —Tat, mi'n jaw k'ojla wi'je. Ba'n tu'na, ke xjal lu jurat in che binchan mya ba'n. 23Tzaj cyma'n weye cyja': Binchan cuba jun kdiose tu'n tcub nej kwitze, porque minti' ba'n ku'ne ti ma baj ti'j Moisés aju etz k'inte keye tuj Ejipt, che chi. 24Xi nma'ne cye cyja': Alcye at k'an pwak tuc'il, e ttzaj ti'n ex e ttzaj tk'o'n weye, nchiye. Tzaj cyk'o'n weye, ocx nk'o'ne tuj k'ak', ex banttzun aju tilbilal tal wacẍ lu, chi Aarón. 25Tej ttil Moisés otok txi cyk'on cyib xjal tu'n cybinchante mya ba'n, tu'nju otok txi tk'o'n Aarón ambil cye, ex tu'n jlu jacu cub cych'ixwi cywitz ke aj k'oj cyi'j, 26cub we' Moisés ttzi be jatum in che ocx xjal tuj campament ex xi tma'n: Alcye lepch ti'j Kman e ttzaj wuc'ile, chi Moisés. Cycyakiltzun ke aj Leví oc cychmon cyib tuc'il. 27Xitzun tma'n Moisés cye: —Atzun jlu ma tzaj tma'n Kman aju Cydios aj Israel: Tzyum t-spad teyle junjun, cyaj meltz'aje cyxol ke xjal tuj campament, ex cyxi'ye ttzi'yile ja. Teyle junjun e tcub tbyo'n terman, tamiw ex tvesin, chi Moisés. 28O bant cyu'n aj Leví ic tza'n otok tma Moisés, ex balo ox mil xinak e cyim tuj k'ij lu. 29Xitzun tma'n Moisés cye aj Leví cyja': Ja'lo ma che el pa'ne tu'n cyajbene o'cx te Kman, tu'nju ma txi cynimane tu'n tcub cybyo'ne cycy'ajale ex cyermaniye, ex tu'ntzun jlu oc che cy'iwlanjtzele tu'n Kman ja'lo. 30Tuj juntl k'ij xi tma'n Moisés cye xjal: Ma cybinchaye jun il ma'xix. Ja'lo chin jawixe tuc'il Kman, balo ka jacu chewix tc'u'j wu'ne, tu'n tcub tnajsa'n cyile, chi Moisés. 31Aj meltz'aj Moisés tuc'il Kman ex xi tma'n te cyja': —Ke xjal lu ma cybincha jun il ma'xix tu'nju o cub cybincha'n cydios k'an pwak cytx'otx'il. 32In chin cubsane twitza tu'n tcub tnajsana cyil. Katzun mi'n, k'uchan jatza nbiye tuj tu'ja jatum o cu'x ttz'ibana, chi Moisés. 33Tzajtzun tma'n Kman te: —O'cx cjawitz nk'uchane tuj wu'je cybi keju in che binchan il nwitze. 34Txi'ya ja'lo ex k'inxa ke xjal jatum o txi nma'ne teya. Cbel nej n-anjele twitza, ex octzun tpon k'ij tu'n tcub cycastiw, cbel nk'o'ne cycastiw tu'n tlaj cyil, chi Dios. 35Tzajtzun t-sama'n Kman c'ixbisabl cyibaj xjal tu'nju otok che c'ulun twitz tilbilal tal tor otok cub tbincha'n Aarón.

will be added

X\