ÉXODO 31

1Tzaj tma'n Kman Dios te Moisés cyja': 2Bintza, cyxol ke tiyjil Judá o jaw nsc'o'ne Bezaleel aju tcy'ajal Uri ex tal tchman Hur; 3o noj tuj tanmi tu'n Nxewe ex o tz'oc nim tnabl wu'ne, o txi nk'o'ne tojtzkibl ex t-sec'al tnabl ti'j tcyakil ak'untl, 4tu'n t-ximan ti'j tza'n tten tu'n tbant ak'untl, tu'n tak'nan ti'j k'an pwak, ti'j sak pwak, ti'j k'an c'uxbil, 5ex tu'n cybaj jaset ke tal abj tbanilxix ex tu'n cycu'x tk'o'n cyuj cyk'ukbil, tu'n cybaj tjaso'n ke tze', ex tu'n tak'nan ti'j tcyakil wik ak'untl. 6Cyxol ke tiyjil Dan o tz'oc nk'o'ne Aholiab aju tcy'ajal Ahisamac, te onil te. Ax icx o txi nk'o'ne cynabl cycyakil keju at cyojtzkibl tu'n cyak'nan, tu'n tbant cyu'n tcyakilju o txi nma'ne teya. 7Cbajel cybincha'n aju ja xbalun te mojbabl tibil, aju cax te c'ubl nleye, aju tmaksil tcubsa'n tibaj, ex cycyakil ke macbil che ajbel tuj ja xbalun, 8aju mes ex ke macbil che ajbel ti'j, aju cycubil candil k'an pwak tbanilxix ttx'otx'il ex cycyakil ke macbil che ajbel ti'j, aju altar jatum cbel patit storac, 9aju altar jatum cbel patit chojbil ex cycyakil ke macbil che ajbel ti'j, aju tcubil a' tuc'ix tk'ukbil, 10ke cyxbalun pal, ke xbalun xjan te Aarón, ke xbalun che ajbel cye tcy'ajal oc cyajben weye, 11aju aseyt c'ajbel te xjansabl ex aju storac at tc'oc'jal tu'n tajben tuj Lugar Xjan. Cbantel tcyakil jlu cyu'n ic tza'nx o txi nma'ne teya, chi Kman Dios. 12Tzaj tma'ntl Kman te Moisés cyja': 13Chi Kman, chicuya cye aj Israel: Ax toc che ojlale cyuj ke k'ij te ojlabl, porque atzun jun techal ti'j yol cyaj bant ti'j wu'ne cyuc'ile ex cyuc'il cyiyjile che ul itz'j te tibajxi, tu'ntzun tel cynic'e ti'j akine Cymane in chin xjansante cyeye. 14Cyja'tzun, che ojlale tuj k'ij te ojlabl tu'nju xjan te k'ij lu te cyeye. Alcye jun minti' ma tz'ocx t-xo'n k'ij lu, ax toc cymel. Alcye jun ma tz'ak'nan tuj k'ij lu, bi'x c'elex lajet tu'ntzun mi'n ttentl cyxol t-xjalil. 15Kak k'ij che ak'nale. Atzunju twukin k'ij, k'ij te ojlabl, xjansamaj te weye. Nok alcyexcu ma tz'ak'nan tuj k'ij te ojlabl ax toc cymel. 16Akeye aj Israel, cynimanxe k'ij te ojlabl ex cyic'san cube k'ij lu, ax icx cyu'n cyiyjile che ul itz'j te tibajxi. A jlu jun yol cyjel bant ti'j wu'ne cyuc'ile te jumajx. 17Atzun jun techal tu'n tten kxol akine ex akeye aj Israel, porque tuj kak k'ij bant cya'j ex tx'otx' wu'ne; ex tuj twukin k'ij xi ncoline ak'untl ex in ojlane, chi Dios. 18Tej tbaj yolin Kman tuc'il Moisés twi witz Sinaí, e tzaj tk'o'n cabe tz'lom abj te, tz'ibamaj ke ley cywitz tu'nx twi tk'ab Dios.

will be added

X\