ÉXODO 28

1Cyxol aj Israel, k'manxa te Aarón aju termaniya tu'n tul lak'e', tuc'ix Nadab, Abiú, Eleazar ex Itamar, akeju tcy'ajal, tu'ntzun cyoc te pal te weye. 2Binchama xbalun tbanilxix te Aarón aju termaniya, tu'n tjaw nimsa'n ex tu'n mas ba'n tque'yinjtz. 3K'manxa cye keju at nim cynabl, akeju o tzaj nk'o'ne cynabl tu'n cybinchante ak'untl tbanilxix, tu'ntzun cybinchante t-xbalun Aarón, tu'n tajben te oc tc'monte toclen tu'n toc te pal te weye. 4Ke xbalun tu'n cybinchante, atzun ke jlu: Aju tal xbalun c'oquel ten ttzi t-xu'c, aju tcapiẍay, aju tmant, aju t-ẍjo'w binchamaj ke tilbilal twitz, aju c'albil twi' binchamaj ti'j nok' lino, ex aju c'albil tc'u'j. Atzun ke xbalun tbanilxix lu che bantel tu'n tajben tu'n Aarón aju termaniya ex cyu'n ke tcy'ajal, tu'ntzun cyoc te pal te weye. 5Aju c'ajbel tu'n cybant ke xbalun lu, atzun ke jlu: K'an pwak, nok' ẍk'ilun que'yin, nok' ẍjulin que'yin, nok' cyak que'yin, ex nok' lino chubemaj ttze'yil. 6Aju c'ajbel oc tbant capiẍay, atzun jlu: K'an pwak, nok' ẍk'ilun que'yin, nok' ẍjulin que'yin, nok' cyak que'yin, ex nok' lino chubemaj ttze'yil; tbanilxix binchben te, 7ex cabe tak'al twi t-semil, akeju che ajbel tu'n cyoc mojbet cycabil pac' ttxa'n capiẍay. 8Aju c'albil c'u'jbaj xi'yni ti'jxi capiẍay, tiklix tib tuc'il ex ax tbanil binchben te. C'ajbel k'an pwak ti'j, tuc'ix nok' ẍk'ilun que'yin, nok' ẍjulin que'yin, nok' cyak que'yin, ex nok' lino chubemaj ttze'yil. 9K'intza cabe abj ónice, ex tz'iban oca cybi ke tcy'ajal Israel cywitz, 10kak biybaj twitz jun abj, ex kaktl biybaj twitz juntl, txolin tu'n cyten ic tza'n cyul-len itz'j. 11Tu'n jun xjal at tnabl ti'j, c'oquel c'ochin tu'n cycyaj ten cybi tcy'ajal Israel cywitz, ic tza'n twitz jun sey. Che belextzun tk'o'na cyuj cyk'ukbil k'an pwak cytx'otx'il, 12ex che oqueltzun tk'o'na cyi'j tak'al capiẍay, jun twi' jun t-semil ex jun twi' juntl. Cyu'ntzun ke abj lu, che tzajel na't ke tcy'ajal Israel. Che xeltzun ti'n Aarón cybi nwitze cywi t-semil, tu'n cytzaj na't akine Cymane. 13Binchama ke cyk'ukbil k'an pwak cytx'otx'il, 14cyuc'ix cabe caden k'an pwak tbanilxix cytx'otx'il, xpaltx'i'n cyten, ex che bel tk'o'na ke caden lu cyi'jele ke cyk'ukbil. 15Ax icx tbanil binchben te tal xbalun c'oquel ten ttzi t-xu'c Aarón tu'n t-xi tbincha'n cyi'j xjal, ex ax nok' che ajbel tu'na ic tza'n ti'j capiẍay, atzun ke jlu: K'an pwak, nok' ẍk'ilun que'yin, nok' ẍjulin que'yin, nok' cyak que'yin, ex lino chubemaj ttze'yil. 16Mejetz'in twitz ex junx cyjel tnukbil tuc'il twitz; jun xc'achub tnukbil ex jun xc'achub twitz. 17Che oquel tk'o'na cyaje txol tal abj tbanilxix ti'j. Tuj tnejel txol c'oquel tk'o'na jun tal abj sardio, jun topacio ex jun carbunclo. 18Tuj tcabin txol c'oquel tk'o'na jun tal abj esmeralda, jun zafiro ex jun diamante. 19Tuj toxin txol c'oquel tk'o'na jun tal abj jacinto, jun ágata ex jun amatista 20ex tuj tcyajin txol c'oquel tk'o'na jun tal abj berilo, jun ónice ex jun jaspe. Cycyakil ke tal abj lu che belex tk'o'na cyuj cyk'ukbil k'an pwak cytx'otx'il. 21Ax cyajlal tal abj c'oquel tk'o'na ic tza'n cyajlal tcy'ajal Israel, cablaj cybet. Ic tza'n twitz jun sey c'oquel tz'ibet tbi jun tcy'ajal Israel twitz teyle junjun. 22Binchama cabe caden k'an pwak tbanilxix cytx'otx'il ex xpaltx'i'n cyten, tu'n cyoc ten ti'j tal xbalun c'oquel ten ttzi t-xu'c. 23Ax icx binchama cab argoy k'an pwak cytx'otx'il, ex che oquel tk'o'na cyi'j cycabil ttxa'n tal xbalun; 24che oquex tk'o'na cycabil caden cyuj argoy k'an pwak cytx'otx'il che oquel ten cyi'j cycabil ttxa'n tal xbalun. 25Che oquel tk'o'na cytxa'n cycabil caden cyibaj ke cyk'ukbil k'an pwak cytx'otx'il cyocsa'n cyi'j ke cabe twi t-semil, ttzi twitz capiẍay. 26Binchan cubtla cab argoy k'an pwak cytx'otx'il ex che oquel tk'o'na cyi'j cycabil ttxa'n tal xbalun te tujxi, tibaj ttxa'n, junx tuc'il capiẍay. 27Binchama cabetl argoy k'an pwak cytx'otx'il, ex che oquel tk'o'na cyi'j ke cabe twi t-semil capiẍay te cubni, junx tuc'il slapbil te ex ch'in tibaj c'albil tc'u'j capiẍay. 28Tu'n jun c'albil ẍk'ilun que'yin, che oquel c'alet ke argoy cyoc ti'j tal xbalun cyuc'il keju cyoc ti'j capiẍay, tu'ntzun tcyaj ten tal xbalun tibaj c'albil tc'u'j capiẍay, ex tu'n mi'n tel tpa'n tib tal xbalun ti'j capiẍay. 29Cyja'tzun, oc tocx Aarón tuj Lugar Xjan, che oquex ti'n cybi ke tcy'ajal Israel twitz tal xbalun c'oquel ten ttzi t-xu'c, tu'n t-xi tbincha'n cyi'j xjal, tu'ntzun cucx cytzaj na't nwitze, akine Cymane. 30K'on cu'xa Urim ex Tumim tuj tal xbalun c'oquel ten ttzi t-xu'c Aarón tu'n t-xi tbincha'n cyi'j xjal, tu'ntzun cyxi ti'n Aarón ttzi t-xu'c oc tocx nwitze. Cyja'tzun cucx che xel ti'n Aarón ttzi t-xu'c ke macbil che ajbel tu'n t-xi tbincha'n cyi'j xjal nwitze, akine Cymane. 31Binchama jun xbalun ẍk'ilun que'yin, aju c'oquel tujxi capiẍay, 32tuc'ix jun toy' tuj tmij tu'n tjax twi' tuj. Slapun cuba jun tkul ttzi'yile toy' lu, ic tza'n cyten ke chicyet tz'u'm, tu'ntzun mi'n t-xi tzakj. 33Ttxa'nile xbalun lu c'oquel tk'o'na tilbilal ẍok' carnad ẍk'ilun que'yin, ẍjulin que'yin ex cyak que'yin. Cyxoltzun ke jlu che oquex ten tal campan k'an pwak cytx'otx'il. 34Jun tal campan k'an pwak ttx'otx'il ex jun ẍok' carnad, juntl tal campan ex juntl ẍok' carnad; iclex ctembil tcyakil ttxa'nile xbalun. 35C'oqueltzun tk'o'n Aarón ti'j tcyakil maj oc tajben tuj tak'un te pal, tu'ntzun cybinjtz tk'ajk'ajel ke campan oc tocx nwitze tuj ja xbalun, ax icx oc tetz, tu'ntzun mi'n tcyim. 36Binchama jun tal tz'lom k'an pwak tbanilxix ttx'otx'il ex c'ochin jatza ic tza'n twitz jun sey, tu'n cycyaj ke yol lu twitz: XJANSAMAJ TE JLU TE KMAN. 37C'oquel tk'o'na tal tz'lom lu tibaj twitz ti'j c'albil twi', ex c'oquel c'alet tu'n jun tak'al ẍk'ilun que'yin, 38cyja'tzun ax ctembil tibaj twitz Aarón. Che xel tikan Aarón cycyakil cyil aj Israel oc t-xi cyk'o'n alcyexcu cyoyaj xjan. Acux in ak'nan nwitze, ax ctembil tibaj twitz tu'ntzun cyc'monte xtalbil wu'ne. Akine Cymane. 39Chmon cu'tza jun ẍjo'w ti'j nok' lino, ex binchama jun c'albil twi' ax ti'j nok' lino, ex jun c'albil tc'u'j pitxin twitz. 40Binchama cyẍjo'w ke tcy'ajal Aarón cyuc'ix c'albil cyc'u'j ex c'albil cywi', tu'n cyjaw nimsa'n ex tu'n mas ba'n cyque'yinjtz. 41Che oqueltzun tk'o'na xbalun lu ti'j Aarón aju termaniya ex cyi'j ke tcy'ajal, ex cbel tko'na aseyt tibaj cywi', che elel tpa'na, ex che bajel t-xjansa'na, tu'ntzun cyoc te pal te weye. 42Ax icx binchama cycalsonsiy ti'j xbalun lino, tu'ntzun ttxayit cycux. Cxel ke' cymij, ex cpol baj ti'j cycux. 43Che oquel ti'j Aarón ex cyi'j ke tcy'ajal oc cyocx tuj ja xbalun te mojbabl tibil, ex ka oc cyxi lak'e' ti'j altar tu'n cyajben tuj Lugar Xjan, tu'ntzun mi'n cybinchante jun il ex tu'n mi'n cycyim. A jlu jun ley cucx ctel te Aarón ex cye tiyjil che ul itz'j te tibajxi.

will be added

X\