1 Tzaj tma'n Kman te Moisés cyja': 2 —K'manxa cye aj Israel tu'n tjaw cychmo'n oyaj te weye. Cjawil cychmo'ne cyxol cycyakil keju cyaj tu'n ttzaj cyk'o'n tu'n cyex cygan ex tu'n tcyakil cyanmi. 3 Akeju oyaj cjawil cychmo'ne, atzun ke jlu: K'an pwak, sak pwak, k'an c'uxbil, 4 xbalun ẍk'ilun que'yin, xbalun ẍjulin que'yin, xbalun cyak que'yin, tbanil xbalun lino, ttzmal chip, 5 ttz'umal ẍne'l toc tc'a' cyak que'yin, tz'u'm tbanilxix, tze' ch'i'x acacia, 6 aseyt tu'n tajben cyuj candil, t-samel at tc'oc'jal tu'n tcu'x k'ot tuj aseyt aju in ajben oc toc toclen jun xjal, ex tu'n tajben te tc'oc'jal storac, 7 ke tal abj ónice ex txkantl tal abj tbanil, tu'n toc k'ot ti'j capiẍay nno'c tk'o'n tnejel pal, ex ti'j tal xbalun nno'c ten ttzi t-xu'c. 8 K'manxa cye tu'n cybinchante jun ja xbalun te weye, tu'n nnajane cyxol. 9 Cjawil cybincha'ne aju ja lu ex cycyakil ke macbil che tel tuj, ic tza'nxix cxel nyec'une teya. 10 Binchama jun cax ti'j tze' ch'i'x acacia, te jun var tuc'il jun xc'achub tnukbil, ox xc'achub twitz, ex ox xc'achub twa'l. 11 Lo'tzin oca k'an pwak tbanilxix tujile ex ti'jele, ex binchan jawa jun adorn k'an pwak ttx'otx'il ttzi'yile. 12 Ax icx binchama cyaje argoy k'an pwak cytx'otx'il, ex k'on oca ke cyi'j cycyajil tkan cax, cabe jun pac' ex cabetl juntl pac'. 13 Ax icx binchama cabe tze' tolin cyi'j, ti'j tze' ch'i'x acacia, ex lo'tzin oca k'an pwak cyi'j. 14 K'on extzuna ke tze' lu cyuj ke argoy ate'c ttxlaj cax, tu'n cyajben tu'n t-xi tanut cax. 15 Ax che cyjel ten ke tze' cyuj ke argoy cyoc ti'j cax, mi'n che etz k'it. 16 Tujtzun cax lu cbelex tk'o'na aju ley cxel nk'o'ne teya. 17 Binchama jun tmaksil cax k'an pwak tbanilxix ttx'otx'il, jatum tu'n tnajset cyil xjal, te jun var tuc'il jun xc'achub tnukbil ex ox xc'achub twitz. 18 Ax icx binchama cabe tilbilal querubín k'an pwak cytx'otx'il tx'ino'n tu'n martiy, ex che bel tk'o'na cyibaj cycabil pac' ttxa'n tmaksil cax. 19 Jun cbel ten tibaj jun pac' ttxa'n tmaksil cax ex jun tibaj juntl pac'. Junx piẍ c'elel tmaksil cyuc'il ke cabe tilbilal querubín. 20 Che jawil cylic'un cyxic' tu'n ttxayit tmaksil cax. Ctel twitz jun tumlal twitz juntl, ex cyja' cbel cyque'yin tibaj tmaksil. 21 Cbelex tk'o'na tuj cax aju ley cxel nk'o'ne teya, ex cbel tk'o'na tmaksil cax. 22 Atzun c'oquel nc'ulban wibe tuc'ila tibaj tmaksil cax ex cyxol ke cabe tilbilal querubín, akeju cycubsa'n tibaj cax c'ubl nleye. Atzun cxel nma'ne teya tcyakil aju waje tu'n t-xi tma'na cye aj Israel. 23 Binchama jun mes ti'j tze' ch'i'x acacia, jun var tnukbil, cabe xc'achub twitz, ex ox xc'achub twa'l. 24 Lo'tzin oca k'an pwak tbanilxix ti'jele, ex binchan jawa jun adorn k'an pwak ttx'otx'il ttxa'nile mes. 25 Ax icx binchama jun tmakel ttxa'nile tjak' mes, cyaje k'ab twa'l, ex lo'tzin oca jun adorn k'an pwak ttx'otx'il ti'jele. 26 Binchama cyaje argoy k'an pwak cytx'otx'il, ex k'on oca ke cyi'j cycyajil pac' ttxa'n mes, cyumlal ke tkan. 27 Che oquel ten ke argoy lu tjak' tmakel mes tu'n cyocx ke tze' tolin cyi'j tu'n cyajben tu'n t-xi tanut mes. 28 Binchama ke cabe tze' lu ti'j tze' ch'i'x acacia, ex lo'tzin oca k'an pwak cyi'j, porque cyi'jtzun cxel tanut mes. 29 Ax icx binchama ti'j k'an pwak tbanilxix, ke lak, ke pac', ke xar ex ke vas ma tij, tu'n cyajben te kobl oyaj ti'j ta'l twitz uva. 30 Cucx che bel cyk'o'ne tibaj mes lu ke pan in che cub k'o'n nwitze. 31 Ax icx binchama jun cycubil candil k'an pwak ttx'otx'il tx'ino'n tu'n martiy. Te junx c'elel aju tk'ukbil, tkan, ke tcopa, ke tilbilal xwaquin cyten, ex ke tilbilal bech. 32 Che elel kak tk'ab ti'j tc'u'j; ox tuj jun pac' ex ox tuj juntl pac'. 33 Ti'j teyle junjun tk'ab c'elel ti'j tc'u'j, che tel ox tilbilal bech tjak'xi, ic ctel binchben cye ic tza'n t-xmacal tze' almendro; ax icx ctel ox tilbilal xwaquin cyten tuc'ix cycopa. Iclex ctelba cyi'j ke kak tk'ab. 34 Ti'j ju tkan tuj tmij cycubil candil, che tel cyaje tilbilal bech tjak'xi, ic ctel binchben cye ic tza'n tilbilal t-xmacal tze' almendro; ax icx ctel cyaje tilbilal xwaquin cyten tuc'ix cycopa. 35 Ti'j teyle junjun moj tk'ab c'elel ti'j tc'u'j, cyjel k'ot jun tilbilal bech tjak'xi. 36 Ke tilbilal bech ex ke tk'ab che elel ti'j junx piẍ k'an pwak tbanilxix ex tx'ino'n tu'n martiy. 37 Ax icx binchama wuk candil, akeju che oquel cytxako'ne tu'n cyk'onte spic'un tetz twitzx, 38 ex ke matzbil cywi mech cyuc'ix ke tal tcubil ttza'jil mech, ax icx k'an pwak cytx'otx'il. 39 C'ajbel 75 libr k'an pwak tbanilxix cyu'ne tu'n tbant aju cycubil candil ex cycyakil ke macbil che ajbel tuc'il. 40 Cybinchame jlu ic tza'nx tilbilal xi nyec'une teya twi witz.
