ÉXODO 24

1Tzaj tma'ntl Kman te Moisés cyja': Tjatza tzalu wuc'ile, tuc'ix Aarón, Nadab, Abiú ex 70 tij xjal cyxol aj Israel, ex che moc'ecuye najchakyin. 2O'cx teya ctzajel lak'e' wuc'ile; atzun cye txkantl, mi'n che tzaj lak'e', ex mi'n che jatz ke xjal tuc'ila, chi Kman. 3Cubiltzun Moisés ex xi ttx'olba'n cye xjal tcyakil tyol Kman, cyuc'ix cycyakil ke ley; atzun cye tnam xjal xi cytzak'we'n cycyakil junx cyja': —Cbantel ku'ne tcyakilju ma tma Kman, che chi. 4Cub ttz'iban Moisés tcyakil yol tzaj tma'n Kman te. Tej tjaw we' te prim tuj juntl k'ij, jaw tbincha'n jun altar t-xe witz, ex e cub twalba'n cablaj abj ic tza'nx cablaj c'loj cyiyjil aj Israel. 5E je'x t-sama'n Moisés txkan cu'xun aj Israel, cub cybyo'n txkan tal tor ex cub cypatun te chojbil ex te oyaj te mojbabl tibil tuc'il Kman. 6Tzajtzun ti'n Moisés mij chic' ex cu'x tk'o'n cyuj matij lak; atzun mijtl chic' cub ttx'ito'n tibaj altar. 7Te tibajxi jlu, tzaj ti'n Moisés aju u'j jatum tz'ibantok yol otok cyaj bant ti'j tu'n Dios cyuc'il, ex jaw t-sch'i'n cywitz xjal. Atzun cye xjal cyma cyja': —Cbantel ku'ne tcyakilju ma tma Kman, ex cxel knimane, che chi. 8Tzajtzun ti'n Moisés chic', xi ttx'ito'n cyibaj xjal ex tma: Aju chic' lu, atzun cyuwsabl te yol ma cyaj bant ti'j tu'n Kman cyuc'ile, ic tza'n in tma'n tcyakil yol lu. 9Jaxtzun Moisés twi witz tuc'ix Aarón, Nadab, Abiú ex 70 tij xjal cyxol aj Israel, 10ex o cyil aju Cydios aj Israel. Tcubtok jun wa'lbil tjak' tkan ic que'yin ic tza'n abj zafiro, ex ictok que'yin ic tza'n twitz cya'j oc minti' muj. 11Pero minti' baj cyi'j ke nejenel cye aj Israel tu'n Dios masque o ilwaj Dios cyu'n. E wa'ntzun ex e c'an. 12Tzajtzun tma'n Kman te Moisés cyja': Tjaxa wuc'ile twi witz ex ayona wi'je ma chixin. Che xel nk'o'ne ke tz'lom abj teya jatum tz'ibamaj ley ex ke mandamyent wu'ne, tu'n tajben te xnak'tzbil cyeye. 13Jawtzun we' Moisés tuc'ix Josué aju onil te, ex cub be cyu'n tu'n cyjax twi witz te Dios. 14Xi tma'n cye tij xjal cyxol aj Israel cyja': Che ayone ki'je tzalu ocxi kcubile cyuc'ile. Cyjel ten Aarón ex Hur cyuc'ile, ex ka at jun ma baj cyxol xjal, cyk'manxe cye. 15Jaxtzun Moisés twi witz Sinaí, cub juque' muj twi witz, 16ex atzun cub ten tajwalil Kman. Kak k'ij o ten aju muj twi witz. Tujtzun twukin k'ij o txocl Moisés tu'n Dios tuj tmij muj. 17Aju tajwalil Kman twi witz ic que'yin tuj cywitz aj Israel ic tza'n k'ak' in baj tz'e'y tcyakil tu'n. 18Ocxtzun Moisés tuj tmij muj ex jax twi witz. 40 k'ij ex 40 konic'an o ten Moisés twi witz.

will be added

X\