ÉXODO 23

1Mi'n txi cyk'o'ne jun tkanil mya ax toc. Mi'n tz'oc cyk'on cyibe te tuc'il jun xjal binchal mya ba'n, tu'n cyoque te testiw ti'j ju mya ax toc. 2Mi'n che oc lpe'ye ti'j tnimal xjal tu'n cybinchanteye aju mya ba'n. Oc cyocxe cywitz jwes te testiw, mi'n txi cyk'o'ne cywi'ye cyi'j tnimal xjal tu'n tbant aju mya tuj tumel, 3ax icx mi'n che coline cyi'j ke meba xjal ka at cyil. 4Ka ma txi tzpet twacẍ ex ka tbur jun aj k'oj ti'ja, ex ka ma tz'oc noja ti'j, k'on aja te. 5Ka at jun xjal nne'l ic'unte teya, ex ka ma tila ma cub tz'ak tbur tjak' tikatz, mi'n nok tz'oc tque'yina, c'onila ti'j tu'n tjaw we' tbur. 6Mya tu'nju meba jun xjal mi'n txi cybincha'ne ti'j oc tpon twitz ley. 7Cypa'mil cyibe ti'j nic'aj yol ex mi'n cub cybyo'ne jun xjal minti' til ex tz'aklxix, porque mlay tz'oc nk'o'ne te tz'aklxix aju xjal at til. 8Mi'n tzaj cyc'mo'ne pwak in cyk'o'n binchal mya ba'n, porque tu'nju pwak lu in moẍix cywitz ke xjal tu'n mi'n tel cynic' ti'j ju tz'aklxix, ex in baj tch'expu'n cyyol keju xjal tz'aklxix. 9Mi'n baj cyyajla'ne ke stranjer xjal, tu'nju ojtzki'n cyu'ne tza'n tten tchwinklal jun stranjer xjal, porque icx cyeye o che tene te stranjer xjal tuj tx'otx' Ejipt. 10Kak abk'i che awale twitz tx'otx' ex cjawil cychmo'ne twitz cyawale; 11Atzun tuj twukin abk'i mi'n cu'x cyawa'ne awal tuj tx'otx', tu'ntzun cywa'n ke meba, akeju najl tuj cytx'otx'e, ti'j t-xpok'il awal; atzunju cyjel ten cxel cywa'n ke txcup te tjak' c'ul. Ax icx cybinchame jlu ti'j tkan uva ex tkan olivo. 12Kak k'ij che ak'nale, atzun tuj twukin k'ij che ojlale tu'ntzun cyojlan cywacẍe ex cyburre, ex tu'n toc t-xel cyipun ke cyal cymajene xu'j ex ke stranjer xjal. 13Japunx cyu'ne tcyakilju ma txi nma'ne cyeye. Mi'n tzaj cyna'ne cybi junxitl dios, ex mi'n che yoline cyi'j. 14Teyle junjun abk'i cbel cyic'sa'ne ox nink'ij te nimbil weye. 15Cbel cyic'sa'ne aju nink'ij tu'n cywa'ne pan minti' t-samel tuj tu'n tjaw mal tc'u'j. Wuk k'ij che wa'le pan minti' t-samel tuj, ic tza'n o nmaye cyeye. Oc cybincha'ye jlu tuj tk'ijlalil banimaj ti'j tuj xjaw Abib, porque tuj xjaw lu e je'tze tuj Ejipt. Mi jun tu'n tul nwitze ka minti' k'i'n tu'n. 16Ax icx cbel cyic'sa'ne aju nink'ij cyi'j tnejel twitz cyawale otok cu'x cyawa'ne tuj cojbil, ax icx aju nink'ij oc tjaw cychmo'ne tcyakil twitz cyawale oc tbaj abk'i. 17Ox maj tuj abk'i che pol cycyakil xinak yec'ulte cyib nwitze, akine Cymane. 18Oc ttzaj cyk'o'ne jun alumaj te chojbil weye, mi'n tzaj cyk'o'ne tchc'el junx tuc'il pan at t-samel tuj tu'n tjaw mal tc'u'j, ex mi'n txi cyc'u'ne t-sebyil te juntl k'ij. 19Ctzajel cyi'ne tuj njaye aju tbanilxix ti'j tnejel twitz cyawale ctzajel tuj cytx'otx'e. Akine Cymane ex Cydiose. Mi'n jax cytxco'ne tal chip tujx ta'l tim ttxu'. 20Cybintze, cxel nsama'ne n-anjele tu'n tcub nej cywitze, tu'n cyoc cwentine tu'n tuj be, ex tu'n cyxi k'i'ne tu'n tuj tx'otx' banimaj wu'ne te cyeye. 21Ten tchiylal cyeye, cynimanxe, ex mi'n che oque chcyinwi'. Mlay cub tnajsa'n cyile, porque akine samalte te. 22Ka axix toc ma txi cybi'ne tyol ex ka ma cybinchaye tcyakilju in xi nma'ne cyeye, chin oqueltzune aj k'oj cyi'j ke aj k'oj cyi'je, ex che bajel nyajla'ne keju che yajlalte cyeye. 23Cbeltzun nej n-anjele cywitze, ex che xel k'i'ne tu'n tuj cytx'otx' aj Amorrey, aj Hetey, aj Ferezey, aj Cananey, aj Hevey ex aj Jebusey, porque bi'x che najel ke jlu wu'ne. 24Mi'n che cub ẍmeje'ye cywitz cydios ex mi'n che c'ulune cye. Mi'n cybinchaye ic tza'n cye in cybincha'n. Nok o'cx che bajel cybuchine ke tilbilal ex ke abj nno'c cyk'o'n te xjan. 25Che c'ulune weye, akine Cymane ex Cydiose, ex ctzajeltzun nk'o'ne cywaye ex cyc'aye a', ex c'elel wi'ne yabil cyi'je. 26Mi jun xu'j ctel cyxole miban alin ex mi jun nok cucx c'elel tal. Mlay che cyime ka na'nxtok cytijine. 27Cxel nsama'ne xobsabl cyibaj nasyon jatum che oquexe, bi'x cnajel cynabl wu'ne ex che eleltzun ok ke aj k'oj cyi'je. 28Che xel nsama'ne ttxu sichil cywitze tu'n cyex cylajo'n ke aj Hevey, ke aj Cananey ex ke aj Hetey. 29Mya tuj junx abk'i che elex nlajo'ne ke xjal lu cywitze, tu'ntzun mi'n tcyaj ten tx'otx' mi a'l xjal tuj, ex tu'n mi'n cychmet txcup te tjak' c'ul tuj tu'n cybinchante mya ba'n cyi'je. 30Cheba che elex baj ke xjal lu wu'ne ocxi tchmet mas cybaje, ex ocxi cyoque tajwil tx'otx'. 31Aju tmojonil cytx'otx'e cyjel nk'o'ne, atzun jlu: Cxel ke' ttzi Mar Cyak Que'yin ex cpol baj ttzi mar cye aj Filistey. Cxel ke'tl ti'j tzkij tx'otx' ex cpol baj ttzi nima Éufrates. Che xel nk'o'ne tuj cyk'abe ke xjal najl tuj tx'otx' lu, ex che elex cylajo'ne cywitze. 32Mi'n cyaj bant ti'j jun cyyole cyuc'il, mi cyuc'il ke cydios. 33Mi'n cyak'e ambil tu'n cynajan ke xjal lu tuj cytx'otx'e, tu'ntzun mi'n cybinchane il nwitze oc cyc'ulune cywitz cydios, porque ka ma cybinchaye jlu che najele, chi Dios.

will be added

X\