ÉXODO 22

1Ka at jun xjal ma txi elk'ante jun wacẍ ex ka jun ẍne'l, ex ka ma cub tbyo'n ex ka ma txi tc'ayin, il ti'j tu'n taj tk'o'n jwe' wacẍ te t-xel wacẍ, ex cyaje ẍne'l te t-xel ẍne'l. 2Ka ma cnet jun elek' matok in elk'a'n tuj ja, ka ma baj c'ixbisa'n ex ka ma cyim, aju otok baj c'ixbisante te, minti' til ti'j tcyimlen xjal lu. 3Katzun k'ijl ma cnet ex ma cub byo'n, attzun til aju xjal otok cub byonte te. Aju xjal otok tz'elk'a'n, c'ajel tk'o'n t-xel aju otok tz'etz telk'a'n. Katzun minti' tumel tu'n taj tk'o'n t-xel, cxeltzun c'ayit tu'n tchjet aju otok tz'etz telk'a'n. 4Ka itz'x alumaj oc tcnet tuj tcwent elek', ka wacẍ, ka bur ex ka ẍne'l, cxeltzun tchjo'n cab maj. 5Ka at jun xjal ma che'x ttzokpi'n talun ex ka ma che ocx tzokpaj tuj tawal juntl xjal ex ka cyxol tkan uva, cxeltzun tk'o'n aju awal mas tbanil in tzaj tuj tcojbil, ex ka aju mas tbanil in tzaj cyk'o'n tkan t-uva te t-xel aju otok naj cyu'n ke talun. 6Ka minaben ma txi' k'ak', ka ma txi c'ant cyxol tkan ch'i'x, ex ka ma tz'e'y triw tu'n k'ak' lu, ka aju otok tz'oc chmo'n ex ka aju toctok ti'j tkan, ex ka tcyakil cojbil, aju xjal otok cyaj k'onte k'ak' cxel tchjo'n aju otok tz'e'y. 7Ka ma cyaj tokxenan jun xjal tpwak te juntl, ex ka jun ti'xti wi'yilxix, ex ka ma tz'etz elk'a'n jlu tuj tja, ka ma cnet elek', cxeltzun tchjo'n elek' cab maj. 8Katzun minti' ma cnet elek', cxe'ltzun tajwil ja cywitz jwes tu'n tel nic'baj ti'j ka otok tz'oc tk'o'n tk'ab ti'j aju otok cyaj okxenan tuc'il. 9Ka at jun xjal ma tz'el tetzan jun wacẍ, jun bur, jun ẍne'l, jun xbalun, ex ka juntl ti'xti otok cub naj, ex ka chi juntl cyja': Weye jlu; che xe'ltzun cycabil cywitz jwes, ex aju cjawil tz'ak tuj til cyu'n jwes cxel tchjo'n cab maj te tuc'il. 10Ka at jun ma txi tokxenan tbur te tuc'il, ex ka twacẍ ex ka t-ẍne'l ex ka nok alcyex juntl alumaj; ka ma c'ixbi, ka ma cyim ex ka ma txi k'i'n mi a'l jun otok que'yinte te, 11aju xjal otok tc'am okxenaj cxel tma'n te tajwil jun yol axix toc tuj tbi Kman, ka minti' otok tz'oc tk'o'n tk'ab ti'j tokxenaj tuc'il. Cxeltzun tniman tajwil alumaj aju tyol; atzunte mi'n chojin ti'j. 12Katzun in que'yin ti'j oc t-xi elk'a'n alumaj, cxeltzun tchjo'n te tajwil. 13Katzun tu'n jun txcup te tjak' c'ul otok baj paẍu'n alumaj, cxeltzun ti'n ttx'akan alumaj otok cyim te jun yec'bil te tajwil, ex mi'n chojin ti'j. 14Ka at jun ma txi majnante jun tchej tuc'il, ex ka ma c'ixbi ex ka ma cyim acux mi a'ltok tajwil, cxeltzun tchjo'n majnalte jte' twi chej. 15Katzun attok tajwil tej tcyim chej, mi'ntzun txi tchjo'n xjal; ka majna'n otok tzaj alumaj, o'cxtzun majnibl te cchjetel tu'n. 16Ka at jun ma cub sbunte jun k'apoj mya tk'o'n tyol tuc'il juntl xinak, ex ka ma cub tan tuc'il, cxeltzun tk'o'n twi k'apoj, ex cjawil t-xu'jla'n. 17Katzun tc'i' tman k'apoj txi tk'o'n tme'jel tu'n toc te t-xu'jil xinak lu, cxeltzun tk'o'n xinak twi k'apoj te mambaj, ic tza'n cywi k'apoj na'nx cylonte xinak. 18Ka at jun xu'j ba'n cy'a'n, mi'n cyak'e ambil te tu'n cucx tank'in. 19Ka at jun xjal ma yaẍin tuc'il jun alumaj, il ti'j cbel byet. 20Ka at jun ma txi k'onte chojbil te junxitl dios ex mya te weye, akine Cymane, il ti'j cbel byet. 21Mi'n cybinchaye mya ba'n cyi'j ke stranjer xjal ex mi'n che baj cyyajla'ne, porque icx cyeye e tene te stranjer xjal tuj Ejipt. 22Mi'n baj cyyajla'ne ke meba xu'j mi ke c'wa'l minti' cyman ex cytxu'. 23Katzun ma che baj cyyajla'ne, ex ka ma che oc ten kanil onbil weye, ax toc ctzajel nbi'ne tk'ajk'ajel cywi'; 24ctzajeltzun ntx'u'jile cyi'je, ex che bel nbyo'ne tu'n spad. Che cyjel cyxu'jile meba, icx ke cyc'wa'le. 25Ka at jun ma txi k'onte pwak te tch'ex jun xjal meba, aju ax najl cyxol ke xjal etzan wu'ne, mi'n tbincha ti'j ic tza'n in tbincha'n jun k'ol ch'ex, ex mi'n tz'el tkanin ta'l tpwak. 26Ka at jun ma tz'el k'inte t-xbalun tuc'il te prent ti'j tch'ex, c'ajel tk'o'n xbalun lu oc tex k'ij, 27tu'nju o'cx xbalun lu in ajben te txaybil te. Ka minti' ma tz'aj tk'o'n, ¿titzun c'ajbel tu'n oc ttan? Octzun ttzaj tkanin onbil weye, ctzajel nbi'ne tk'ajk'ajel twi' tu'nju at tk'ak'bil nc'u'je. 28Mi'n che yoline mya ba'n ti'j Dios, ex mi'n tzaj cykanine mya ba'n tibaj ju toc te cawil tuj cytanmiye. 29Mya yajxi ctzajel cyk'o'ne tnejel twitz cyawale weye, tuc'ix ta'l twitz uva. Che tzajel cyk'o'ne ke tnejel cycy'ajale te weye. 30Ax icx ke tnejel cyal cywacẍe ex ke tnejel cyal cyẍne'le; wuk k'ij che tel cyuc'il cytxu', ex tuj twajxakin k'ij cyul-len itz'j, che tzajel cyk'o'ne weye. 31Che oquele xjan te weye. Mi'n txi cychyo'ne cychibjal alumaj otok che baj cypaẍu'n txcup tuj cojbil; cyk'onxe jlu cye tx'yan.

will be added

X\