ÉXODO 21

1Atzun ke ley lu cxel tma'na cye aj Israel: 2Ka at jun cyxole ma lak'et jun aj Hebrey tu'n te tmajen, kak abk'i c'ajbel te; atzun tuj twukin abk'i c'elex tzokpet nok cucx. 3Ka ma lak'et tjunal te, ax tjunal te c'elex. Ka attok t-xu'jil tej tlak'et, tuc'ix t-xu'jil c'elex tuc'il. 4Katzun ma txi k'o'n t-xu'jil tu'n tpatrón, ex otok tzaj tcy'ajal ex ka tme'jel ti'j xu'j lu, tetzun tpatrón aju xu'j lu cyuc'ix ke tal; atzunte majen tjunal te c'elex. 5Katzun ma tma majen cyja': At nc'ujlalile ti'j npatrone, ti'j nxu'jile ex cyi'j ke nc'wa'le, mlay chin exe ka chi, 6cxeltzun k'i'n majen tu'n tpatrón cywitz jwes, ex cpol ti'n ttzi tlamel tja ex ka ti'j tkan tja. Atzun c'elex tk'o'n toy' t-ẍcyin majen tu'n jun tal c'uxbil tz'u'p twi', ex c'oqueltzun te tmajen te jumajx. 7Ka at jun ma txi tc'a'yin tme'jel tu'n toc te majen, mlay tz'ex tzokpet ic tza'n in che ex tzokpet ke majen xinak. 8Ka mya ba'n xu'j lu tuj twitz tpatrón aju otok jaw sc'o'nte te, cxel tk'o'n patrón ambil tu'n tchjet tzokpibl te. Oc tel tic'un, minti' tumel tu'n t-xi tc'a'yin te jun stranjer xjal. 9Ka ma txi tk'o'n te t-xu'jil tcy'ajal, il ti'j tu'n tbant ti'j ic tza'n in bant cyi'j ke tme'jel. 10Ka ma moje' jun xinak tuc'il juntl xu'j, mi'n tz'ajtz ti'n ti'j twa tnejel t-xu'jil, mi ti'j t-xbalun, ex mi ti'j toclen tuj mejeble'n. 11Katzun mi'n ma japun keju ox jlu tu'n, c'elextzun majen xu'j lu nok cucx, ex mi'n cyaj tchjo'n tzokpiblte. 12Ka at jun ma tz'oc tbyo'n jun tuc'il, ex ka ma cyim tu'n, ax icx te cbel byet. 13Atzun teju mya ximantok tu'n tu'n tcub tbyo'n tuc'il, nok o'cx ax Dios otok tzaj k'o'nte ambil te tu'n tcyim tuc'il tu'n, cxeltzun nyec'une cyeye jatum cpol ok. 14Katzun at jun tuj ewaj ma tz'oc tzokpaj ti'j tuc'il, ex ka ma cyim tu'n, masque otok pon ok twitz n-altare, pero c'eletz cyi'ne tu'n tcyim. 15Ka at jun ma tz'oc byonte tman ex ka ttxu', il ti'j cbel byet. 16Ax icx ka at jun ma txi elk'ante jun xjal, ka ma txi tc'ayin, ex ka ma tz'el cnet tuj tk'ab, il ti'j cbel byet. 17Ax icx ka at jun ma yasun ti'j tman ex ka ti'j ttxu', il ti'j cbel byet. 18Ax icx ka ma che jaw k'ojl xinak, ex ka ma tza'w jun tu'n tuc'il, ka tu'n abj ex ka tu'n tk'ab, ex ka minti' ma cyim, nok o'cx otok cub twitz watbil tu'n ta'w c'ixble'n, 19ka ma banix, ex ka ma tz'etz betel toc tcy'ako'ch, ctzokpeteltzun aju otok tz'oc byonte te. O'cx il ti'j tu'n t-xi tchjo'n tk'ij, jte' k'ij minti' otok tz'ak'nan, ex c'oquel tk'anan. 20Ka at jun ma tz'oc byonte tmajen tu'n tze', ka xinak ex ka xu'j, ex ma cyim tu'n, cbel tcastiw. 21Katzun itz'x oc tex jun k'ij ex ka cabe, mlaytzun cub tcastiw patrón, tu'nju tetok. 22Ka ma che jaw k'ojl xinak, ex tc'ulbacu ma tza'w jun xu'j cyu'n, aju otok tz'oc ten tal, ex ka tu'n jlu ma tz'el tal, pero ka minti' ma cyim xu'j, c'elel tmult xjal otok tza'w xu'j tu'n, ic tza'n tajlal oc ttzaj tkanin chmilbaj ex ic tza'n oc cyma' jwes. 23Katzun ma c'ixbi xu'j, il ti'j cchjetel tu'nju xinak otok c'ixbisante te. Ka ma cyim xu'j tu'n, ax icx te il ti'j tu'n tcyim. 24Ka ma naj tbak' twitz xu'j tu'n, ax icx te il ti'j tu'n tnaj tbak' twitz; ka ma tz'etz twitz te' xu'j tu'n, ax icx te il ti'j tu'n tnaj twitz te'; ka ma naj tk'ab xu'j tu'n, ax icx te il ti'j tu'n tnaj tk'ab; ka ma naj tkan xu'j tu'n, ax icx te il ti'j tu'n tnaj tkan. 25Ka ma tz'e'y xu'j tu'n xinak, ax icx te il ti'j tu'n ttz'e'y; ka ma tz'oc ẍil ti'j xu'j tu'n xinak, ax icx te il ti'j tu'n toc ẍil ti'j; ka ma c'ixbi xu'j tu'n xinak, ax icx te il ti'j tu'n tc'ixbi. 26Ka at jun ma tz'oc tc'ixbisa'n tbak' twitz tmajen, ka xinak ex ka xu'j, ex ka tu'n jlu ma cyaj moẍix tu'n, c'elextzun ttzokpi'n tu'n tlaj otok naj tbak' twitz. 27Ka ma tz'etz jun twitz te' tmajen tu'n, ka xinak ex ka xu'j, c'elextzun ttzokpi'n tu'n tlaj otok naj twitz te'. 28Ka ma jaw ẍu'yin jun xinak ex ka jun xu'j tu'n jun wacẍ, ex ka tu'n jlu ma cyim, c'oqueltzun xo't wacẍ lu tu'n abj tu'n tcyim, ex mi'n txi chyo't tchibjal; atzunte tajwil minti' til. 29Katzun otok tz'el k'ij jawni ẍu'yin wacẍ ex otok tbi tajwil pero minti' otok tz'oc tk'o'n tcwent ti'j; ka ma cub tbyo'n wacẍ jun xinak ex jun xu'j, c'oqueltzun xo't wacẍ lu tu'n abj tu'n tcyim; ax icx te tajwil cbel byet. 30Katzun ma tzaj kanin tu'n tchjet twi cyimni, cxeltzun tchjo'n nok jte' ctzajel kanin te te colpiblte, tu'n mi'n tcyim. 31Ka ma jaw ẍu'yin jun tal k'a ex ka jun tal txin tu'n jun wacẍ, ax ley lu c'ajbel ti'j. 32Ka ma jaw ẍu'yin jun majen xinak ex ka jun majen xu'j tu'n jun wacẍ, cxeltzun tchjo'n tajwil wacẍ 30 sak pwak te tajwil majen; atzunte wacẍ c'oquel xo't tu'n abj tu'n tcyim. 33Ka at jun xjal ma cyaj tcatba'n jun xoch ex ka ma cu'x tlacu'n jun jul tu'n tjatz a' tuj, ka minti' ma cyaj tmaksi'n ttzi', ex ka ma cu'x tz'ak jun wacẍ tuj ex ka jun chej, 34cxeltzun tchjo'n tajwil jul aju twi alumaj, ex aju alumaj otok cyim c'oquel te te. 35Ka ma jaw ẍu'yin twacẍ jun tu'n twacẍ juntl, ex ka tu'n jlu ma cyim wacẍ, cxeltzun c'ayit aju wacẍ itz'x, cbel cyi'n tmij pwak otok tz'octz twi', ex cbel cyi'n tmij aju wacẍ otok cyim. 36Katzun otok tz'el k'ij jawnix ẍu'yin wacẍ ti'j tuc'il ex otok tbi tajwil pero minti' otok tz'oc tk'o'n tcwent ti'j, cxeltzun tk'o'n twacẍ te t-xel wacẍ, ex aju wacẍ otok cyim c'oquel te te.

will be added

X\