ÉXODO 20

1Tzaj tma'n Dios cycyakil ke yol lu, ex chi cyja': 2Akine Cymane ex Cydiose aju etz k'inte cyeye tuj tx'otx' Ejipt jatum ate'toke te majen. 3Mi'n che c'ulune cywitz junxitl dios, o'cx nwitze tu'n cyc'ulune. 4Mi'n cub cybincha'ne jun tilbilal; mi jun tilbilal ti'j ju at twitz cya'j, mi jun tilbilal ti'j ju at twitz tx'otx' ex mi jun tilbilal ti'j ju at tuj mar. 5Mi'n che cub ẍmeje'ye cywitz ex mi'n che c'ulune cywitz, porque akine Cymane ex Cydiose, ex minti' in cub tuj nwitze tu'n cyc'ulune twitz juntl dios. Cpol canun castiw wu'ne cyibaj ke c'wa'lbaj, ke tal chmambaj ex ke cyxca chmambaj tu'n tlaj in chin el ic'une cyu'n cyman, 6pero cucx ctel tk'ak'bil nc'u'je cyi'j nimcu cyiyjil xjal, akeju in che c'ujlan weye ex in che japun ke nmandamyente cyu'n. 7Mi'n tzaj cyna'ne nbiye nokx gan, akine Cymane ex Cydiose, porque cbel tcastiw xjal wu'ne, aju in tzaj na'nte nbiye nokx gan. 8Cyna'ntze aju k'ij te ojlabl tu'n tajben o'cx te weye. 9Kak k'ij che ak'nale, ex cbantel tcyakil cyak'une, 10atzunju twukin k'ij, k'ij te ojlabl tu'n cyc'ulune weye, akine Cymane ex Cydiose. Mi jun ak'untl cbantel cyu'ne tuj k'ij lu. Mi jun cycy'ajale ex mi jun cyme'jele c'ak'nal tuj k'ij lu, mi jun cymajene xinak, mi jun cymajene xu'j, mi jun cyalune ex mi jun stranjer xjal at tuj cytanmiye. 11Porque tuj kak k'ij bant cya'j wu'ne, tuc'ix tx'otx' ex tcyakilju at cywitz, tuc'ix mar ex tcyakilju at tuj, ex in ojlane tuj twukin k'ij, akine Cymane. Tu'ntzun jlu cub ncy'iwla'ne k'ij lu te ojlabl, ex el npa'ne tu'n toc te xjan. 12Cynimanxe cymane ex cytxu'ye tu'ntzun t-xi lak'e' tuj cyk'ije twitz tx'otx' aju cxel nk'o'ne cyeye, akine Cymane ex Cydiose. 13Mi'n che biyune. 14Mi'n cybinchaye aj pajil. 15Mi'n che elk'ane. 16Mi'n che nic'ane yol cyi'j cyuc'ile. 17Mi'n pon cyc'u'je ti'j tja cyuc'ile; mi'n pon cyc'u'je ti'j t-xu'jil cyuc'ile, mi ti'j tmajen xinak, mi ti'j tmajen xu'j, mi ti'j twacẍ, mi ti'j tbur, ex mi ti'j jun ti'xti at te. 18O cyil cycyakil aj Israel aju tkan k'ancyok, o cybi tk'ajk'ajel chun ex o cyil aju witz in bukintok tu'n sib, ex tu'n jlu e tzaj lu'lun tu'n cyxobil, ex najchak e tzaj ten. 19Xitzun cyma'n te Moisés cyja': —Aya yolin kuc'ile, ex jacu cub kbi'ne. Mi'n yolintl Dios kuc'ile tu'ntzun mi'n kcyime, che chi. 20Xitzun tma'n Moisés cye cyja': —Mi'n che xobe. Ma cubil Dios nok tu'n cyoque tuj malbil tu'n, tu'ntzun tten t-xobil tuj cywitze, ex tu'n mi'n cybinchane il, chi Moisés. 21Najchak e tzaj ten xjal; atzunte Moisés xi lak'e' mastl jatum ta' Dios tuj k'ek muj. 22Tzajtzun tma'n Kman te Moisés, k'manxa cye aj Israel cyja': —Ma cyile ma chin tzaj yoline cyuc'ile max tuj cya'j. 23Mi'n cub cybincha'ne ke tilbilal tu'n toc cydiosine, mi ti'j ttx'otx'il sak pwak, mi ti'j ttx'otx'il k'an pwak, o'cx nwitze tu'n cyc'ulune. 24Cybinchan jawe jun byuj tx'otx' te jun altar te weye, ex atzun che bel cybyo'ne cyẍne'le ex cywacẍe te chojbil patun in cub te weye, ex ka te oyaj te mojbabl tibil. Nok jatumchak waje tu'n ttzaj na'n nbiye, chin ule cyuc'ile ex che bel ncy'iwla'ne. 25Katzun abj altar ma jaw cybincha'ne te weye, mi'n baj cyxpe'line cyi'j abj, porque ka ma baj cyxpe'line cyi'j tu'n c'uxbil, mlay tz'ajben te altar. 26Ex mi'n cybinchaye jun altar ma' twa'l, tu'ntzun mi toc grad ti'j n-altare tu'ntzun mi'n cyk'ancha'lin ke cycuxe tibaj oc cyjax bete.

will be added

X\