ÉXODO 2

1At jun xinak cyxol tiyjil Leví o moje' tuc'il jun xu'j ax aj Leví. 2Oc ten tal xu'j lu, ex k'a tal ul itz'j. Tej ttil tbaniltok que'yin, xi tewan ox xjaw. 3Tej minti'tl bant tu'n t-xi tewan, tzaj ti'n jun chi'l binchamaj ti'j ajlaj, baj tlo'tzin ti'j tu'n ta'l ula ex k'ol, cu'x tk'o'n tal ne' tuj ex ocx tewan cyxol tkan ajlaj ttzi nima Nilo. 4Najchak xi we' jun tanb ne' que'yilte te, tu'n tlonte ti at tbajel ti'j. 5Cu'xtzun tme'jel Faraón chil ttzi nima ex tej in che bettok ke k'apoj ttzi nima, akeju uc'intok tu'n, o til tme'jel Faraón aju chi'l tocx cyxol tkan ajlaj, ex xi t-sama'n jun tmajen k'ilte te. 6Tej tjaw tjako'n, o til tal ne' ex lu in ok'tok. Tzajtzun k'ak'an tc'u'j tme'jel Faraón ti'j ex tma: Tc'wa'l jun aj Hebrey te jlu, chi tme'jel Faraón. 7Xitzun tma'n tanb tal ne' te tme'jel Faraón cyja': —Ka taja, jacu chinxe txcolte jun xu'j aj Hebrey tu'n t-xi k'ot tch'u' ne', chi txin. 8Xi ttzak'we'n tme'jel Faraón: —Txi'ya. Xi'tzun te txin ex tzaj ttxco'n aju ttxu ne'. 9Xitzun tma'n tme'jel Faraón te cyja': K'inxa tal ne' lu, ch'iysama ex cchjetela wu'ne. Xitzun ti'n txubaj tal ne' ex o ch'iy tu'n. 10Tejtzun tch'iy ne', xi ti'n twitz tme'jel Faraón, octzun tk'o'n tme'jel Faraón mer ic tza'n te tal, Moisés tbi oc tk'o'n ex tma: Atzun tbi c'oquel tu'nju tuj a' jatz wi'ne, chi tme'jel Faraón. 11At jun k'ij, tej otok ch'iy Moisés, etz que'yilte cye t-xjalil ex o til cyuw ak'untl tcub cyibaj. Ax icx o til lu jun aj Ejipt in c'ixbisantok ti'j jun aj Hebrey aju t-xjalil. 12Xitzun tque'yin Moisés ti'jele, ex tej ttil mi a'ltok jun in que'yin ti'j, cub tbyo'n aju aj Ejipt ex cu'x tmaku'n tjak' poklaj. 13Tuj juntl k'ij, etztl Moisés ex o til cabe aj Hebrey in che k'ojintok cyxolx. Xi tma'n teju otok tbincha mya ba'n ti'j tuc'il: —¿Tiku'n nno'c tbyo'na t-xjalila? Chi Moisés. 14Xitzun ttzak'we'n aj Hebrey te: —¿Alcye ma tz'oc k'onte teya te nejenel ex te jwes kibaje? ¿Kape taja tu'n ncub tbyo'na ic tza'n cub tbyo'na aju aj Ejipt? Chi xjal. Tzajtzun t-xobil Moisés, ex tma tuj tanmi: Malo chin binjtze ti'j xjal o cub wu'ne, chi Moisés. 15Tej tbinte Faraón aju otok binchanjtz, oc tk'o'n tilil tu'n tcub byo'n Moisés tu'n, atzunte Moisés etz ok twitz, ex xi' najal tuj tx'otx' Madián. 16Tej k'ukltok ttzi jun xoch, e ul wuk tme'jel pal te Madián, ex jatz cyi'n a' tu'n cynoj ke choc tu'n cyc'an t-ẍne'l cyman. 17E ultzun txkantl pastor ex e je'l cylajo'n ke txin. Atzunte Moisés oc ten colol cyi'j txin ex xi tk'o'n cyc'a ke cyẍne'l. 18Tej cypon meltz'aj ke txin tja Reuel aju cyman, tzaj tkanin cye cyja': —¿Tza'n tten ma che ul naje ja'lo? Chi Reuel. 19Xitzun cytzak'we'n txin: —At jun xinak aj Ejipt ma colon ki'je tuj cyk'ab txkantl pastor. Ax icx ma jatz ti'n a' ex ma txi tk'o'n cyc'a ẍne'l, che chi txin. 20Xitzun tma'n Reuel cye tme'jel: —¿Jatum ta' xinak lu? ¿Tiku'n mi'n saj cyuc'ine tzalu? Cytxca'tze tu'n twa'n kuc'il, chi Reuel. 21Ba'n e'la tuj twitz Moisés tu'n tcyaj ten tuc'il xinak lu, ex xi tk'o'n xinak jun tme'jel aju Séfora tbi te t-xu'jil Moisés. 22Ul itz'j jun tal xu'j lu. Gersón tbi oc tk'o'n Moisés ex tma: Atzun tbi c'oquel tu'nju stranjer xjal kine tuj tx'otx' lu. 23Tbajlenxi nim k'ij cyim rey te Ejipt. Atzun cye aj Israel cucx e ayayan tu'nju nim ak'untl cub k'o'n cyibaj, ex jaw tk'ajk'ajel cywi'. O japun tk'ajk'ajel cywi' tuc'il Dios, tu'n tlaj ak'untl tcubtok cyibaj. 24O tbi Dios tk'ajk'ajel cywi' in che ayayantok, ex ultzun ti'j tc'u'j aju yol otok tzaj ttziyan te Abraham, te Isaac ex te Jacob. 25O til Dios ke aj Israel ex el tnic' ti'j ju in bajtok cyi'j.

will be added

X\