ÉXODO 17

1E je'tz cycyakil aj Israel tuj tzkij tx'otx' Sin, e ic' bet ic tza'n tzaj tma'n Kman cye, ex e cub ten tuj Refidim, pero minti' cnet a' te cyc'a. 2E jawtzun ilin xjal ti'j Moisés ex xi cyma'n te: —K'ontza a' te kc'aye, che chi. Xi tma'n Moisés cye: —¿Tiku'n in che oc tene ilil wi'je? ¿Tiku'n nno'c Kman tuj malbil cyu'ne? Chi Moisés. 3Tzaj txketle'n cyi'j xjal ex e oc ten yolil mya ba'n ti'j Moisés, xi cyma'n te: —¿Ti til o ko etz ti'na tuj Ejipt tu'n kcyime tu'n txketle'n, cyuc'ix ke kc'wa'le ex ke kalune? Che chi. 4Octzun ten Moisés cubsal twitz Kman ex xi tma'n te cyja': —¿Ti che oquel xjal lu wu'ne? Nok ch'ixmi in chin oc xo'ne tu'n abj cyu'n, chi Moisés. 5Tzajtzun tma'n Kman te cyja': —Nejcuya cywitz ex k'inxa junjun tij xjal aj Israel tuc'ila. Ax icx k'inxa tcy'ako'cha tuc'ila, aju ajben tu'na tej tcub tpek'una tibaj nima tuj Ejipt, ex bet-xa. 6Lu kine chin bel tene twitza tibaj pic t-xe witz Horeb. C'oquel tpek'una twitz pic ex c'eletz a' tuj. Che c'altzun ke xjal ti'j, chi Dios. Tbinchatzun Moisés icju cywitz tij xjal cyxol aj Israel. 7Meriba tbi lugar lu oc tk'o'n, tu'nju cyuw jaw cyyol aj Israel ti'j Kman, ex Masah juntl tbi oc tk'o'n, tu'nju oc Kman tuj malbil cyu'n, ex che chi cyja': ¿Atpelo Kman kxol, ex ka mi a'l? 8E tzajtzun aj Amalec k'ojlel cyi'j aj Israel tuj Refidim, 9ex xi tma'n Moisés te Josué cyja': Sc'o'n jawa txkan xinak, ex cyxi'ye k'ojlel cyi'j aj Amalec. Atzun weye chin bel tene twi witz nchi'j tuc'il tcy'ako'ch Dios tuj nk'abe. 10Tbinchatzun Josué ic tza'n otok tma Moisés te. Oc ten k'ojlel cyi'j aj Amalec; atzunte Moisés tuc'ix Aarón ex Hur e jax twi witz. 11Oc cyjaw tk'o'n tk'ab Moisés twitz cya'j, in che cambantok aj Israel, ex oc cycub ti'n tk'ab, atzun ke aj Amalec in che cambantok. 12E sicttzun tk'ab Moisés. Tu'ntzun jlu tzaj k'i'n jun abj tu'n tcub ke' tibaj. Cubtzun ke' tibaj. Atzunte Aarón ex Hur tzyu'n ke tk'ab Moisés cyu'n, jun ti'j jun tk'ab ex jun ti'j juntl. Cyja'tzun o cyipa tk'ab tejxi tex k'ij. 13Cub cyi'j cycyakil soldad aj Amalec tu'n spad tu'n Josué. 14Tzaj tma'n Kman te Moisés cyja': —Tz'iban cu'xa jlu tuj jun u'j tu'n ttzaj na't, ex k'manxa te Josué cyja': Te jumajx che bel nnajsa'ne ke aj Amalec. Mi jun ctzajel na'nte cye twitz tx'otx', chi Kman. 15Jaw tbincha'n Moisés jun altar ex oc tk'o'n tbi cyja': Ate Kman ma tz'oc te nbanderiye, 16ex tmatl: Tu'nju e jo'c ten ke aj Amalec k'ojlel ti'j Kman, tu'ntzun jlu, cucx ck'ojlel Kman cyi'j wikinwik te jumajx.

will be added

X\