ÉXODO 16

1E je'tz cycyakil aj Israel tuj Elim, ex tuj 15 tajlal tcabin xjaw e ul tuj tzkij tx'otx' Sin, tej otok bant jun xjaw cyetzlen tuj Ejipt. Atzun tcub tx'otx' lu t-xol Elim ex Sinaí. 2Cycyakil aj Israel e oc ten yolil mya ba'n ti'j Moisés ex ti'j Aarón tuj tzkij tx'otx' lu, 3ex xi cyma'n cye cyja': —Maswitlo ba'n nokwit o ko cyime tu'n Kman tuj tx'otx' Ejipt, tej in ko cub ke'toke wa'l cyxol kc'ile nojnitok ke tu'n chibj, tej in ko nojxixtoke wen tu'n wabj. Atzun cyeye, ma ko tzaj cyi'ne tuj tzkij tx'otx' lu tu'n kcyime kcyakile tu'n we'yaj, che chi. 4Tzajtzun tma'n Kman te Moisés cyja': —Ctzajel nchitune wabj twitz cya'j, atzun cye xjal che eletz chmolte te cycyakil k'ij, pero o'cx cywa aju in baj te jun k'ij cjawil cychmo'n, tu'ntzun cyoc tuj malbil wu'ne, ka cxel cyniman nyole ex ka mi'n. 5Atzun tuj tkakin k'ij bi'x cjawil cychmo'n cywa te cab k'ij, chi Kman. 6Xitzun cyma'n Moisés ex Aarón cye cycyakil aj Israel: Te kale ja'lo c'elel cynic'e ti'j, ate Kman etz k'inte cyeye tuj tx'otx' Ejipt; 7atzun te prim nchi'j oc cyila'ye tajwalil Kman, tu'nju ma tbi in che yoline mya ba'n ti'j. Atzun keye, ¿ti kxilene tu'nju in che yoline mya ba'n ki'je? Che chi. 8Ax icx tmatl Moisés: Ctzajel tk'o'n Kman chibj te cychi'ye kale ja'lo; atzun te prim nchi'j ctzajel tk'o'n cywaye nimxix, tu'nju ma tbi in che yoline mya ba'n ti'j. Atzun keye, ¿ti kxilene? Mya ki'je in che yoline mya ba'n, nok o'cx ti'j Kman, chi Moisés. 9Xi tma'n Moisés te Aarón cyja': —K'manxa cye cycyakil aj Israel tu'n cytzaj lak'e' twitz Kman, porque ma tbi Kman in che yolin xjal mya ba'n ti'j, chi Moisés. 10Matok in yolin Aarón cyuc'il cycyakil aj Israel, xi cyque'yin tuj tzkij tx'otx', lu tajwalil Kman tzaj tyec'un tib tuj muj, 11ex tzaj tma'n Kman te Moisés cyja': 12—Ma nbiye in che yolin aj Israel mya ba'n. K'manxa cye cyja': Te kale ja'lo che chyo'le chibj, atzun prim che wa'le ocxi cynoje, ex c'eleltzun cynic'e ti'j, akine Cymane aju Cydiose, chi Kman. 13Tejtzun toc kax e ul tz'uchin ex baj noj ti'jele cycampament xjal cyu'n; atzunte prim tzaj tk'ab che'w ex cub ti'jele campament. 14Tej tcub naj tk'ab che'w, at jun cyaj ten twitz tx'otx', tal ch'intok ex tal se'wtok, ic tza'n ttxa che'w. 15Tejtzun tcyil aj Israel cyma cyxolx: ¿Titzun jlu? Che chi, tu'nju minti' ojtzki'ntok cyu'n. Xi ttzak'we'n Moisés cye: —Atzun wabj jlu aju ma tzaj tk'o'n Kman cyeye tu'n t-xi cywa'ne. 16Atzun jlu ma tzaj tma'n Kman: Cjawil cychmo'ne o'cx aju in baj cyu'ne tuj jun k'ij, jun c'oẍ te teyle junjun xjal tuj tja. 17Banttzun cyu'n aj Israel icju. At junjun jaw tchmo'n nim, ex at junjun nok ch'in. 18Cub cymalo'n tuj c'oẍ. Akeju jaw cychmo'n nim, minti' sobryin cye, ex akeju jaw cychmo'n nok ch'in, acux o canun cye. Teyle junjun jaw tchmo'n ic tza'nx twa in baj. 19Ax icx xi tma'n Moisés cye: Mi jun cyeye cyaj tclo'n twa te juntl k'ij, chi. 20At junjun minti' xi cyniman tyol Moisés, cyaj cyclo'n cywa te juntl k'ij, bi'x e tzaj pok'l ẍuk' tuj, ex o tzuwix. Tzaj tk'oj Moisés cyi'j. 21Cycyakil prim jaw tchmo'n teyle te junjun aju in baj tu'n tuj jun k'ij, ex octzun tmek't k'ij in cub uljtok aju minti' otok jaw chmet. 22Tujtzun tkakin k'ij jaw cychmo'n cywa te cab k'ij, cabe c'oẍ te teyle junjun xjal. Cycyakil ke nejenel cyxol xjal e ul ex xi cytx'olba'n jlu te Moisés. 23Xitzun tma'n Moisés cye cyja': —Atzun jlu ma tzaj tma'n Kman: Nchi'j, k'ij xjan te ojlabl, aju ojlabl pa'maj te Kman. Aju wabj at tu'n ttzk'ajset cyu'ne tuj jorni, cytzk'ajsame ja'lo; ex aju at tu'n tjax ta'l cyu'ne, cytxcon jaxe ja'lo, ex tcyakilju cyjel sobryin, cyc'u'nxe te nchi'j chi Moisés. 24Atzun cye xi cyc'u'n te juntl k'ij aju cyaj sobryin, ic tza'n otok tma Moisés. Minti' o naj tu'n ẍuk' ex minti' o tzuwix. 25Xi tma'n Moisés cye: Che wa'ne ti'j ja'lo, porque ja'lo k'ij te ojlabl te nimbil te Kman. Ja'lo mlay cnet wabj cyu'ne twitz tx'otx'. 26Kak k'ij che elexe chmolte te, atzun tuj twukin k'ij, k'ij te ojlabl, ex mlay cnet cywaye twitz tx'otx', chi Moisés. 27At junjun xjal e je'x chmolte cywa tuj twukin k'ij ex minti' cnet cyu'n. 28Tzajtzun tma'n Kman te Moisés cyja': —¿Maj cucx cxe'l cyu'ne tu'n mi'n cyxi cynimane ke nmandamyente ex ke nxnak'tzbile? 29Cybintze, akine Cymane o txi nk'o'ne jun k'ij te ojlabl. Tu'ntzun jlu, tuj tkakin k'ij in xi nk'o'ne cywaye te cab k'ij. Teyle te junjun, ax e tcyaj ten tuj tja, ex mi jun tu'n tex betel tuj twukin k'ij, chi Dios. 30Cyja'tzun e ojlan ke xjal tuj twukin k'ij. 31Aju wabj jaw cychmo'n aj Israel, maná tbi oc cyk'o'n. Ic tten ic tza'n tiyjil culantr, saktok que'yin ex ictok tc'oc'jal ic tza'n pan tuc'il ta'l cab. 32Tmatl Moisés: —Atzun jlu ma tzaj tma'n Kman: Cynojsame jun c'oẍ tu'n maná ex cyc'u'nxe tu'n toc cyque'yin ke cyiyjile che ul itz'j te tibajxi aju wabj xi nk'o'ne te cywaye tuj tzkij tx'otx', tej cyetz wi'ne tuj tx'otx' Ejipt, chi Kman, chi Moisés. 33Xi tma'n Moisés te Aarón cyja': K'intza jun xar ex k'on cu'xa jun c'oẍ maná tuj. K'on cuba twitz Kman ex e t-xi c'u't, tu'ntzun toc cyque'yin kiyjil che ul itz'j te tibajxi, chi Moisés. 34Cubtzun tk'o'n Aarón ju xar lu twitz cax c'ubl tley Dios, tu'n t-xi c'u't ic tza'n otok tma Kman te Moisés. 35Ake aj Israel e wa'n 40 abk'i ti'j maná, tejxi cypon tuj tx'otx' attok xjal tuj, tejxi cypon ttzi tmojonil tx'otx' Canaán. 36Jun efa, in xi baj laj c'oẍ tuj.

will be added

X\