ÉXODO 14

1Tzaj tma'n Kman te Moisés cyja': 2—K'manxa cye aj Israel tu'n cyk'on welt ex e cycub ten twitz Pi-hahirot, t-xol tnam Migdol tuc'ix mar, tumlal Baal-zefón. Atzun che bel ten twitz lugar lu ttzi mar, 3porque jacu cub t-ximan Faraón cyja': Ma che el tzpet aj Israel tuj tzkij tx'otx' ma chixin ex minti' jatum ba'n cyxi', chilo. 4Cbel ncyuwsa'ne tanmi Faraón tu'n toc lpe' cyi'je, ex chin jawil nimsa'ne oc tcub ti'j Faraón wu'ne, cyuc'ix cycyakil ke t-soldad, ex c'elel cynic' aj Ejipt wi'je, akine Cymane, chi Dios. O cybincha aj Israel ic tza'n otok tzaj k'ma'n cye. 5Tej tpon tkanil tuc'il rey te Ejipt ka otok che ex ok aj Israel, baj tch'expu'n t-ximbetz, ax icx keju attok cyoclen ttxlaj, ex cyma cyja': ¿Tza'n tten ma txi kk'o'n ambil cye aj Israel tu'n cyex, ex ya mi'ntl che ajben ke? Che chi. 6Bant tten tcarwaj Faraón, ex e je'x ti'n ke t-soldad tuc'il. 7E je'tz t-sc'o'n kak syent carwaj tbanilxix, ax icx e je'x ti'n cycyakil ke carwaj tuj Ejipt, ex e je'x junjun nejenel cyujile. 8Cub tcyuwsa'n Kman tanmi Faraón aju rey te Ejipt, ex oc lpe' cyi'j aj Israel, akeju otok che etz cyuw cyc'u'j wen. 9E je'tztzun ke aj Ejipt cyuc'ix cycyakil ke soldad, cyuc'ix ke carwaj ex keju cyjaxtok cyibaj chej, e oc lpe' cyi'j aj Israel tu'n cytzyet, ex e pon cnet aj Israel cyu'n, lu ke otok che cub ten ttzi mar, ttxlaj Pi-hahirot, tumlal Baal-zefón. 10Tejtzun cylonte aj Israel otok tzul lak'e' Faraón cyuc'ix ke aj Ejipt, tzaj nimxix cyxobil ex jaw tk'ajk'ajel cywi' in che kanin onbil te Kman, 11ex xi cyma'n te Moisés cyja': —Baka minti' lugar tu'n kcu'x maku'ne tuj Ejipt, tu'nju ma ko etz ti'na tu'n kcyime tuj tzkij tx'otx'. ¿Tiku'n ma tbinchaya ki'je icju? ¿Tiku'n ma ko etz ti'na tuj Ejipt? 12¿Myapetzun o txi kma'ne jlu teya tuj Ejipt? Ko chiye cyja': Ko tk'oncja tuj txubtxaj. Ko ajbele cye aj Ejipt, porque mas ba'n te keye tu'n kajbene cye twitzju tu'n kcyime tuj tzkij tx'otx', ko chiye, che chi. 13Xitzun tma'n Moisés cye: —Mi'n che xobe. Che we'cuye ex cyque'yinxe aju colbil oc tbincha' Kman cyeye ja'lo. Ke aj Ejipt in cyile ja'lo, te jumajx mlay cyiltle. 14Ate Kman ck'ojel te cyxele. Mi'n baj cyc'u'je, chi Moisés. 15Tzajtzun tma'n Kman te Moisés cyja': —¿Tiku'n in tzaj tkanina onbil weye? K'manxa cye aj Israel tu'n cybet-x. 16K'in jaw tcy'ako'cha, nukpinx tk'aba tibaj mar, ex pa'n ela. E cyic'x aj Israel tuj tmij mar tuj tzkij. 17Cbel ncyuwsa'ne cyanmi aj Ejipt tu'n cyoc lpe' cyi'je, ex chin jawil nimsa'ne oc tcub ti'j Faraón wu'ne, cyuc'ix ke t-soldad, ke tcarwaj ex keju cyjax cyibaj chej. 18C'eleltzun cynic' aj Ejipt wi'je ka akine Cymane, oc tcub ti'j Faraón wu'ne, cyuc'ix ke tcarwaj ex ke t-soldad cyjax cyibaj chej, chi Kman. 19Aju t-anjel Dios nejnitok cywitz aj Israel nej, aj ttzal cyi'j, ax icx aju muj nejnitok cywitz, cyaj ten cyi'jxi. 20Cyja'tzun tten, cub ten muj cyxol aj Ejipt cyuc'il aj Israel. Mujtok ex kloljtok cywitz aj Ejipt; atzun cywitz aj Israel, spic'untok konic'an. Minti' e pon cnet aj Israel cyu'n aj Ejipt tuj enter konic'an lu. 21Xi tnukpi'n Moisés tk'ab tibaj mar. Tcyakil konic'an lu el tpa'n tib mar tu'n Kman tu'n jun nintz cyk'ik' tzaj tuj tjawitz k'ij. Cyja'tzun tten cub tpa'n tib a', ex tzkij cyaj tmij mar. 22E ic'tztzun aj Israel tuj tmij mar jatum otok cyaj tzkij; cyaj ten mar tuj cybank'ab mer ic tza'n muro, ax icx tuj cynayaj. 23E oc lpe' aj Ejipt cyi'j, cyuc'ix cycyakil ke tchej Faraón, ke tcarwaj ex ke t-soldad cyjaxtok cyibaj chej, ex e jo'cul max tuj tmij mar. 24Tej ch'ixtok kskix, max tuj tkan k'ak' ex tuj muj e tzaj tque'yin Kman ke soldad aj Ejipt, ex baj ttzpet-sa'n cynabl. 25E baj co'pj ke cyrwed carwaj, ex pen bant cybet. Cymatzun aj Ejipt cyja': Ko el ok cywitz aj Israel, porque a Cyman in k'ojl ki'j te cyxel tu'n cyclet, che chi. 26Tzajtzun tma'n Kman te Moisés cyja': —Nukpinx tk'aba tibaj mar, tu'ntzun toctl tmojban tib a' cyibaj aj Ejipt, cyibaj ke cycarwaj ex cyibaj ke soldad cyjax cyibaj chej, chi Kman. 27Xitzun tnukpi'n Moisés tk'ab tibaj mar. Tej tcub k'ij ajtz mulk'aj mar ex pon tuj tlugar ic tza'n tten nej. Tej cyel ok aj Ejipt, ax e pon tacl ti'j mar. Cyja'tzun tten e baj t-xitun Kman tuj mar. 28Oc tmojban tib a' ic tza'n tten nej, ex bi'x e cyaj mulk'aj ke carwaj tuj mar, cyuc'ix ke soldad cyjaxtok cyibaj chej ex cycyakil ke t-soldad Faraón, akeju otok che oc lpe' cyi'j aj Israel. Mi jun soldad o cyaj ank'in. 29Atzun cye aj Israel e ic'tz tuj tmij mar tuj tzkij. Toctok a' ic tza'n jun muro tuj cybank'ab ex tuj cynayaj. 30Cyja'tzun tten tuj k'ij lu e clet aj Israel tu'n Kman tuj cyk'ab aj Ejipt, ex o cyil aj Israel nok cyximlal aj Ejipt palch ttzi'yile mar. 31O cyil aj Israel aju binchben ma'xix t-xilen lu otok tbincha Kman cyi'j aj Ejipt, e xob twitz, e niman te, ex ke' cyc'u'j ti'j ex ti'j Moisés aju tmajen.

will be added

X\