ÉXODO 13

1Tzaj tma'n Kman te Moisés cyja': 2—Cypa'mile te weye cycyakil nej c'wa'lbaj xinak cyxol aj Israel, tza'nx cyxol ke xjal, ax icx cyxol alumaj, porque weye cycyakil jlu. 3Xi tma'n Moisés cye xjal cyja': Cyna'ntze aju k'ij lu, tej cyetze tuj Ejipt tjak' tcawbil majnal cyeye. Tu'n te Kman ma che etz k'i'ne tu'n nimxix tipumal. Tu'ntzun jlu, mi'n che wa'ne pan at t-samel tuj tu'n tjaw mal tc'u'j. 4Che elexe ja'lo, tuj xjaw Abib. 5Tujxtzun xjaw lu cbel cyic'sa'ne aju nink'ij lu oc cyocxe tu'n Kman tuj cytx'otx' aj Canaán, aj Hetey, aj Amorrey, aj Hevey ex aj Jebusey, aju o tzaj ttziyan Kman cye kxe'chel tu'n jun yol axix toc. Aju tx'otx' lu k'inun ex tbanilxix. 6Wuk k'ij che wa'le pan minti' t-samel tuj, ex tuj twukin k'ij cbel cyic'sa'ne nink'ij tu'n tnimset tbi Kman. 7Cyuj ke wuk k'ij lu cxel wa't pan minti' t-samel tuj tu'n tjaw mal tc'u'j; mi jun at t-samel tuj ctel cyuc'ile, ex mi'n ten t-samel pan tuj tcyakil cytanmiye. 8Tuj tk'ijlalil tzul cxel cytx'olba'ne cye cyc'wa'le cyja': In binchet jlu tu'nju o etz k'i'ne tu'n Kman tuj Ejipt, che chicuye. 9C'oquel nink'ij lu te jun techal te cyeye, mer ic tza'n tz'ibamaj tibaj cyk'abe ex tibaj cywitze, tu'ntzun ttzaj cyna'ne ex cucx tu'n cyyoline ti'j tley Kman, tu'nju e je'tz k'i'ne tuj Ejipt tu'n nimxix tipumal. 10Aju nink'ij lu cbel cyic'sa'ne teyle junjun abk'i tuj tk'ijlalil banimaj ti'j. 11Octzun cyocx k'o'ne tuj cytx'otx' aj Canaán tu'n Kman, ic tza'n tzaj ttziyan cyeye ex cye cyxe'chele, ex oc ttzaj tk'o'n tx'otx' cyeye, 12che xel cyk'o'ne te Kman cycyakil tnejel cycy'ajale, ax icx ke nej cyal cyalune, akeju tal tman, porque te Kman cycyakil ke jlu. 13Atzun teyle te junjun tnejel tal bur, cbajel cych'expu'ne tuc'il jun tal ẍne'l ex ka jun tal chip, tu'ntzun tcolpet. Katzun mi'n ma baj cych'expu'ne, cjawiltzun cytokine ti'j tkul. Ax icx ke tnejel cycy'ajale che bajel cych'expu'ne tu'n pwak. 14Oc ttzaj cykanin cyc'wa'le cyeye tuj tk'ijlalil tzul: ¿Ti t-xilen jlu? ka che chi, cxeltzun cyma'ne cye: Tu'nju o etz k'i'ne tuj Ejipt tu'n Kman tu'n tipumal nimxix, jatum o tene te majen. 15Cub tcyuwsa'n tanmi Faraón ex minti' o etz tzokpi'ne tu'n. Tu'n jlu e cyim cycyakil ke nej cycy'ajal aj Ejipt tu'n Kman, ax icx ke nej cyal cyalun. Cyja'tzun in xi kk'o'ne teyle te junjun nej tal alumaj, aju tal tman, te chojbil te Kman, ex in xi kk'o'ne pwak te Kman te t-xel tnejel kcy'ajale, che chicuye cye cyc'wa'le. 16Cyja'tzun c'oquel jlu te jun techal te cyeye, mer ic tza'n tz'ibamaj tibaj cyk'abe ex tibaj cywitze, ex c'ajbel te cyeye tu'n ttzaj cyna'ne, ate Kman etz k'inte ke tuj Ejipt tu'n nimxix tipumal, chi Moisés cye. 17Tej cyetz ttzokpi'n Faraón ke aj Israel, minti' e ic'x ti'n Dios tuj be nne'x tuj cytx'otx' aj Filistey, aju mas nikayintok, porque tma Dios cyja': Oc cytzaj aj Filistey k'ojlel cyi'j, mya yajcu tzaj baj cyc'u'j ex jaculo cub cyximan tu'n cyajtz meltz'aj tuj Ejipt. 18E je'x ti'n Dios tu'n cyk'on welt tuj tbeyil tzkij tx'otx', tumlal Mar Cyak Que'yin. Tej cyetz aj Israel tuj Ejipt, k'i'mlex cyubl te cyk'ojbil. 19Ax icx e etz ti'n Moisés tbakil José, porque otok cyaj tma'n José cye aj Israel cyja': Ax toc tzul Dios onil cyeye. Bix tz'ex cyi'ne ke nbakile cyuc'ile oc cyic'e tzalu, chi José. 20E ic'tzun aj Israel tuj Sucot, e pon tuj Etam aju tcub ttxa'n tzkij tx'otx'. 21Te k'ijl in cub nejtok Kman cywitz tuj muj te yec'ulte cybe; atzun te konic'an in cub nejtok cywitz tuj tkan k'ak' tu'n t-spic'bante tuj cybe. Cyja'tzun e bet k'ijl ex konic'an. 22K'ijl minti' el tpa'n tib muj cywitz xjal, ax icx konic'an minti' el tpa'n tib tkan k'ak' cywitz.

will be added

X\