ÉXODO 12

1O yolin Kman tuc'il Moisés ex Aarón tuj Ejipt, chi cyja': 2—Aju xjaw lu c'oquel te cyeye te tnejel xjaw. C'oquel te tnejel xjaw te abk'i. 3Cyk'manxe cye cycyakil aj Israel cyja': Tuj laj tajlal xjaw lu, teyle te junjun ja xjal ctzajel ti'n jun tal ẍne'l ex ka jun tal chip. 4Katzun nic'xi cybaj xjal tuj ja, ex ka mlay che xcye' ti'j tu'n tbaj tcyakil tchibjal tal alumaj cyu'n, ctzajeltzun cytxco'n cyvesin aju mas nikayin ta', ex junx che chyo'l ti'j; cbel cysipan cyxol ic tza'n cyajlal xjal ex nic'pun che chyo'n. 5Aju tal alumaj c'ajbel, tal tman te jun abk'i ex misicyer ch'in tpaltil, ka tal ẍne'l ex ka tal chip. 6C'oquel cyc'alo'ne ocxi tjapun cyajlaj tajlal ax xjaw. Tujtzun k'ij lu teyle te junjun ja xjal aj Israel cbel tbyo'n tal alumaj oc tex k'ij. 7Ctzajel cyi'n tchc'el tal alumaj, ex c'oquel cysu'n ti'j tcyakil tmarquil tlamel ja jatum che chyo'l ti'j tchibjal tal alumaj. 8Ax konic'an lu che chyo'l ti'j chibj txo'n twitz k'ak', junx tuc'il itzaj c'a tchyo'njtz, tuc'ix pan minti' t-samel tuj tu'n tjaw mal tc'u'j. 9Misicyer jun piẍ chibj cha'x cxel cychyo'ne, mi tu'n tjax ta'l, nok o'cx txo'n twitz k'ak'; enter tuc'ix twi', ke tkan ex tuj tc'u'j. 10Misicyer ch'in cyjel cyk'o'ne te juntl k'ij. Ka at ch'in ma sobryin, bi'x cbel cypatune tu'n k'ak'. 11Cxel cychyo'ne ic cytene cyja': C'alo'n cyc'u'je wen, ex toc cyxajbiye, tuc'ix cycy'ako'che tuj cyk'abe, ex jurat naj cxel cychyo'ne, porque atzun k'ij tkanx chin ic'el bete, akine Cymane. 12Tujxtzun konic'an lu chin ic'ele tuj tcyakil tx'otx' Ejipt, che bel nbyo'ne ke nej c'wa'lbaj xinak tuj cyja teyle junjun aj Ejipt, ax icx ke tnejel cyal alumaj; ex cbel nk'o'ne cysentens cycyakil cydios aj Ejipt, akine Cymane. 13Aju chic' otok tz'oc cysu'ne ti'j tmarquil tlamel cyjaye c'ajbel te jun techal cyi'j ke ja jatum ate'ye. Octzun toc nque'yine chic', tkanx chin ic'el bete, ex mi a'l jun cyeye cymel tu'n c'ixbisabl oc cycyim ke tnejel cycy'ajal aj Ejipt wu'ne. 14Ctzajel cyna'ne k'ij lu ex cbel cyic'sa'ne te nink'ij te nimbil weye, akine Cymane. Cucx cbel cyic'sa'ne te jumajx, ex wikinwik cyjel cyma'ne cye cyc'wa'le. 15Wuk k'ij che wa'le pan minti' t-samel tuj tu'n tjaw mal tc'u'j; ex bi'x tuj tnejel k'ij mi'n tentl t-samel pan tuj cyjaye. Alcye jun ma wa'nte pan at t-samel tuj cyuj k'ij lu, c'elex lajet cyxol aj Israel. 16Tza'nx tuj tnejel k'ij, ax icx tuj twukin k'ij, cbel cychmon cyibe tuj jun buyj xjan. Mi a'l jun c'ak'nal cyuj cabe k'ij lu, o'cx cywaye ba'n tu'n tbant cyu'ne. 17Cbel cyic'sa'ne aju nink'ij te wabl pan minti' t-samel tuj tu'n tjaw mal tc'u'j, porque tujtzun ju k'ij lu e je'tz wi'ne tuj Ejipt tuj c'lojin cytene; cbel cyic'sa'ne cycyakil abk'i te jumajx, ex wikinwik cyjel cyma'ne cye cyc'wa'le. 18Te kale tuj cyajlaj tajlal tnejel xjaw ctzyetel tu'n cywa'ne pan minti' t-samel tuj, ex cpol baj te kale tuj 21 tajlal ax xjaw. 19Misicyer t-samel pan ctel tuj cyjaye cyuj wuk k'ij lu, ex alcye jun ma wa'n pan at t-samel tuj tu'n tjaw mal tc'u'j, c'elex lajet cyxol aj Israel, ka stranjer xjal ex ka ax aj Israel. 20Cyja'tzun, mi'n che wane pan at t-samel tuj tu'n tjaw mal tc'u'j. Nok jatum che najale che wa'le ti'j pan minti' t-samel tuj, chi Kman te Moisés ex Aarón. 21E tzajtzun ttxco'n Moisés cycyakil tij xjal cyxol aj Israel ex xi tma'n cye cyja': Cyxi'ye ex cyi'ntze jun tal tman ẍne'l ex ka jun tal chip te teyle junjun ja xjal, ex cybyoncuye tu'n tic'set Xjan K'ij, tej tkanx tic' bet Kman. 22Cbelex cyk'o'ne tchc'el tuj jun palangán. Cyi'ntze jun che'l tk'ab tal tze' hisopo tbi, cymu'n cu'xe tuj chic' ex cysu'nque ti'j tcyakil tmarquil tlamel ja. Mi jun cyeye c'eletz tuj tja ka na'nxtok tcub k'ij. 23Oc tic' Kman c'ixbisal cye aj Ejipt tu'n camic, c'oquel tque'yin aju chic' ti'j tmarquil tlamel cyjaye, ex tkanx c'ic'el ttzi ja lu. Tu'ntzun jlu mlay tak' Kman ambil te k'ol camic tu'n tocx tuj cyjaye. 24Cxel cynimane aju mandamyent lu, ax icx il ti'j tu'n cyniman ke cyiyjile che ul itz'j te tibajxi, ex c'oquel te jun ley te jumajx. 25Oc cyocxe tuj tx'otx' ctzajel tk'o'n Kman cyeye ic tza'n o tzaj ttziyan, cucx cbel cyic'sa'ne jlu. 26Oc ttzaj cykanin cyc'wa'le cyeye: ¿Ti t-xilen aju in cybincha'ne lu?, ka che chi, 27cxeltzun cytzak'we'ne cyja': Aju tal alumaj lu in cub byet tu'n ttzaj na't Xjan K'ij te Kman. Tej cyc'ixbiset aj Ejipt tu'n camic, tkanx ic' bet Kman ttzi kjaye tuj Ejipt, ako' aj Israel, ex cyja'tzun o ko clete, che chicuye cye cyc'wa'le, chi Moisés cye. Cubtzun moc'e' cywi' aj Israel, ex e c'ulun te Kman. 28E je'xtzun ex cybincha tcyakil ic tza'nx otok tzaj tma'n Kman te Moisés ex Aarón. 29Tmij ak'bil tc'ixbisa Kman tu'n camic ke nej c'wa'lbaj xinak tuj tja teyle junjun aj Ejipt, tzajx ke' ti'j tnejel tcy'ajal Faraón in cub ke'tok tuj tk'ukbil, pon baj ti'j tnejel tcy'ajal xjal tocxtok tuj pres, ax icx cycyakil ke nej cyal alumaj e cyim. 30Jawtzun we' Faraón te konic'an lu cyuc'ix keju attok cyoclen ttxlaj, ex cycyakil aj Ejipt e jaw ok' wen tu'n ta'w cybis, porque tuj tcyakil tx'otx' Ejipt minti' jun ja minti'wt jun xjal cyim tuj. 31Ax konic'an lu e je'x txocbaj Moisés ex Aarón tu'n Faraón, ex xi tma'n cye cyja': —Cyexe cyuc'ix cycyakil aj Israel, ex cypa'mil cyibe cyi'j ke nxjalile. Cyxi'ye c'ulul te Cymane aju Cydiose, ic tza'n o cymaye. 32Cyi'nxe ke cyẍne'le ex ke cywacẍe ic tza'n o cymaye, ex cyexe. Ax icx chin cycy'iwlancuye, chi Faraón. 33E oc ten aj Ejipt lajwersil cye aj Israel tu'n cyetz naj tuj tx'otx' Ejipt, tu'nju o cyma: Ko cymel kcyakil, che chi. 34Ic' cyi'n aj Israel tk'otjil cypan na'nxtok t-xi' t-samel tuj, ocx cypotzin tal choc tuj xbalun, ex jax cyk'o'n twi cysemil. 35O cybincha ic tza'n otok tma Moisés; xi cykanin cye aj Ejipt tu'n ttzaj cyk'o'n cye ke ti'xti k'an pwak ex sak pwak cytx'otx'il, tuc'ix xbalun. 36Tu'n Kman ba'n e e'la aj Israel tuj cywitz aj Ejipt, ex tzaj cyk'o'n aju xi cykanin cye. Cyja'tzun tten etz cyi'n aj Israel nimcu ti'xti wi'yilxix cye aj Ejipt. 37E je'tz aj Israel tuj Ramesés tu'n cyul tuj Sucot, balo kak syent mil xinak akeju otok pon cyipun. Minti' e oc ke xu'j te tajlal, mi ke c'wa'l. 38Ax icx e je'tz nimcu txcaj xjal cyuc'il, cyuc'ix nim ẍne'l ex nimxix wacẍ. 39E oc ten txo'l cywa ti'j tk'otjil pan etz cyi'n tuj Ejipt, aju minti'tok t-samel tuj, tu'nju nok elacyim e je'tz lajo'n cyu'n aj Ejipt, ex minti'tok ten ambil cyi'j tu'n tocx cyk'o'n t-samel tuj. 40Otok che ten aj Israel 430 abk'i tuj Ejipt. 41Cybajlenxi ke 430 abk'i lu, ax k'ij e je'tz cycyakil xjal etzan tu'n Kman, tuj c'lojin cyten. 42Tuj konic'an lu o cwentin Kman cyi'j tu'n cyetz tuj Ejipt. Atzun konic'an lu te Kman ex te nimbil te; c'ajbel cye aj Israel te itz'lebl, ex cucx cbantel cyu'n te jumajx. 43Tzaj tma'n Kman te Moisés ex te Aarón cyja': —Atzun ke ley lu tu'n tic'set Xjan K'ij tej tkanx tic' bet Kman: Mi jun stranjer xjal cchyo'l ti'j alumaj in chyo'njtz tuj nink'ij lu. 44Aju majen lak'omaj tu'n pwak, ba'n tu'n tchyo'n ti'j, pero ka otok baj sircunsidarit; 45atzunju majen nok nnu'l aj ak'nal ex ke stranjer xjal, mlay che chyo'n ti'j. 46Cxel chyo't tuj junx ja. Misicyer jun piẍ tchibjal c'eletz tuj ja, ex mi'n cub toket tbakil. 47Iclex cbantel jlu cyu'n cycyakil aj Israel. 48Katzun at jun stranjer xjal ma najan cyxole ex taj tu'n tcub tic'sa'n nink'ij lu te nimbil te Kman, il ti'j tu'n t-sircunsidarit nej cyuc'ix cycyakil xinak ate' tuj tja; ba'ntzun tu'n tic'san nink'ij lu tu'nju otok tz'oc mer ic tza'n jun cyxjalile. Pero mi jun xjal mya sircunsidarimaj cchyo'l ti'j alumaj lu. 49Axtzun ke ley lu che ajbel cye aj Israel ex cye stranjer xjal, akeju ax najl cyxole, chi Kman cye. 50O cybincha cycyakil aj Israel ic tza'n otok tma Kman te Moisés ex te Aarón. 51Axtzun k'ij lu e je'tz ti'n Kman ke aj Israel tuj Ejipt tuj c'lojin cyten.

will be added

X\