1 Tzaj tma'ntl Kman te Moisés: Atx juntl c'ixbisabl tu'n ttzaj wu'ne tibaj Faraón ex cyibaj aj Ejipt. Te tibajxi jlu che elex tzokpi'ne tu'n, ex lajo'n che elexe cycyakile tu'n. 2 Ja'lotzun k'manxa cye aj Israel, tu'n t-xi cykanin ke xinak ex ke xu'j ke ti'xti sak pwak ex k'an pwak cytx'otx'il cye aj Ejipt akeju cyvesin, chi Kman te Moisés. 3 Tu'n Kman ba'n e e'la ke aj Israel tuj cywitz aj Ejipt. Ax icx te Moisés ma'xix toclen e'la tuj cywitz keju attok cyoclen ttxlaj Faraón ex tuj cywitz cycyakil aj Ejipt. 4 Xi tma'n Moisés te Faraón: Chi Kmane cyja': Chin ic'ele tmij ak'bil ja'lo tuj tcyakil tx'otx' Ejipt, 5 ex che cymel cycyakil ke nej c'wa'lbaj xinak tuj tcyakil tx'otx' Ejipt; cymel tnejel tcy'ajal Faraón in cub ke' tuj tk'ukbil, ex cpol baj ti'j tnejel tal majen xu'j in che'n ti'j cya'. Ax icx che cymel cycyakil ke tnejel cyal alumaj. 6 Cjawil nimxix tk'ajk'ajel cywi xjal tuj tcyakil tx'otx' Ejipt. Aju tk'ajk'ajel lu bajx binjtz jun maj icju ex mlay binjtztl. 7 Atzun cyxol cycyakil aj Israel mi jun tx'yan ckawil cyi'j xjal ex mi cyi'j alumaj, tu'ntzun tel cynic'e wi'je, akine Cyman, ex wu'ne pa'maj ke aj Ejipt cyi'j ke aj Israel, chi Kmane, chi Moisés. 8 Cycyakil keju at cyoclen ttxlaja, che pol wuc'ile, che bel moc'e' nwitze ex oc cyma': Texa tzalu cyuc'ix cycyakil xjal ate' tuj tcwenta. Tbajlenxitzun cyma'n weye icju, chin elexe, chi Moisés te Faraón. In k'ojltok Moisés wen, ex etz twitz Faraón. 9 Otok tzaj tma'n Kman te Moisés: Mlayx che ocx bi'ne tu'n Faraón, tu'ntzun cybant nimcu techal wu'ne tuj tx'otx' Ejipt, chi Kman. 10 Banttzun cycyakil techal lu tu'n Moisés ex Aarón twitz Faraón, pero tu'nju otok cub tcyuwsa'n Kman tanmi Faraón, minti' e je'tz ttzokpi'n ke aj Israel tu'n cyetz tuj ttx'otx'.
