ÉXODO 1

1Atzun cybi aj Israel jlu, akeju e pon tuj Ejipt junx tuc'il Jacob, cyuc'ix ke cyc'wa'l teyle junjun: 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad ex Aser. 5Tu'n tcyakil 70 cybet tiyjil Jacob. Atzunte José otok pon nej tuj Ejipt. 6Cyimtzun José cyuc'ix cycyakil ke terman ex cycyakil keju e ul itz'j tuj tk'ijlalil lu. 7Tzajtzun nim cyc'wa'l aj Israel, chmet-xix cybaj, o ch'iyxix cyajlal, oc nimxix cyipun ex noj twitz tx'otx' Ejipt cyu'n. 8Te tibajxi oc juntl rey tuj Ejipt, minti' ojtzki'ntok José tu'n ex xi tma'n cye t-xjalil cyja': 9—Cyque'yinxe; ma chmet cyajlal aj Israel mas ic tza'n ke, ex mas at cyipun kwitz. 10Mya yajcu che ul xjal k'ojlel ki'j, ex jaculo bant tu'n toc cymojban cyib aj Israel cyuc'il tu'n cyk'ojin ki'j, ex bi'xlo che ic'el tuj tx'otx' lu. Ja'lo ba'n tu'n kximan cyi'j ti che oquel ku'n, tu'n mi'n tchmet nim cybet, chi rey. 11E jo'ctzun k'o'n caporal cyibaj aj Israel cyu'n aj Ejipt tu'n cyak'nan cyuw. Jaw cybincha'n aj Israel cabe tnam te Faraón tu'n tc'u't twitz awal cyuj, jun Pitón tbi, atzun juntl Ramesés tbi. 12Tej cycub c'ixbisa'n nimxix, nok mas nim e chmet ex nimxix oc cyajlal. Tu'ntzun jlu tzaj nimxix cyxobil aj Ejipt cywitz aj Israel. 13E cubtzun jatz'o'n aj Israel tu'n ak'untl cyu'n aj Ejipt. 14Tuj c'ixc'oj e ten cyu'n aj Ejipt, tu'nju cyuwxix ak'untl cub k'o'n cyibaj tu'n tbant xok'l ex lok' cyu'n, ax icx tu'n tbant cycyakil wik ak'untl tuj cojbil. E oc lajwersin tu'n tbant tcyakil jlu cyu'n. 15Xitzun tma'n rey te Ejipt te Sifra ex Fúa, akeju betx'lon ate' cyxol ke xu'j aj Israel: 16—Oc cypone yok'il cyi'j ke xu'j aj Hebrey oc tul cyal, bix tz'oc cyque'yine ti klelte ne'. Ka k'a, bi'x cub cybyo'ne; katzun xu'j, mi'n cub cybyo'ne, chi rey. 17Atzun cye betx'lon e xob twitz Dios, minti' o cybincha ic tza'n o tma rey, nok o'cx cyak' ambil tu'n cyank'in ke tal k'a. 18E tzaj ttxco'n rey ke betx'lon ex xi tma'n cye cyja': —¿Tiku'n ma cybinchaye jlu? Ma cyak'e ambil tu'n cyank'in ke tal k'a, chi rey. 19Xitzun cytzak'we'n ke betx'lon te Faraón: —Ke xu'j aj Hebrey mic'x cyten ic tza'n ke xu'j aj Ejipt pen nnu'l itz'j cyal. Ke xu'j aj Hebrey at nim cyipun; na'nxtok cypon canun betx'lon, otok tzul itz'j naj cyal, che chi. 20O tbincha Dios ba'n cyi'j ke betx'lon. O chmet nimxix cyajlal aj Israel, ex oc nimxix cyipun. 21Tu'nju e xob ke betx'lon twitz Dios, o chmet cyiyjil tu'n. 22Xitzun tma'n Faraón cye cycyakil t-xjalil cyja': Cyxon cu'xe tuj nima cycyakil tal k'a in che itz'j cyxol aj Hebrey; atzun ke tal txin, cyk'onxe ambil cye tu'n cyank'in, chi Faraón.

will be added

X\