ESTER 8

1Tujx k'ij lu xi tk'o'n rey Asuero tja Amán te Ester. Ate Amán aj k'ojtok cyi'j ke xjal Judiy. Ex pontzun Mardoqueo tuc'il rey porque otok txi tma'n Ester te rey alcye t-xilen tuc'il Mardoqueo. 2Eltzun ti'n rey t-xmulk'ab, aju otok tz'el ti'n te Amán, ex xi tk'o'n te Mardoqueo. Atzunte Ester oc tk'o'n toclen Mardoqueo te cwentil tcyakil k'inumabl aju tetok Amán tnejel. 3Xi' juntl maj Ester yolil tuc'il rey, cub mutze' twitz tkan rey, in ok' wen, ex xi tma'n te tu'n tcub k'uchit aju orden mya ba'n otok bant tu'n Amán, ex tu'n mi'n tjapun aju banimaj ti'j tu'n tu'n tbinchante cyi'j ke xjal Judiy. 4Atzunte rey xi tnukpi'n tbastón k'an pwak ti'j Ester. Jawtzun we' Ester, cub we' twitz rey, 5ex tma: —Ka ba'n jacu tz'ela tuj twitza Tat Rey, ex ka tuj tumelxix jacu tz'ela nkanbetze tuj twitza, ka axix toc at tganiya ex tc'ujlalila wi'je, entons e tcub tz'ibet jun orden tu'n cycub k'uchit ke u'j xi t-sama'n Amán aju tcy'ajal Hamedata, jatum tz'iban ju orden tu'n cycub baj byet ke xjal Judiy cyuj cycyakil partament ate' tjak' tcawbila. 6Porque ¿tza'n tten tu'n nlonteye aju mya ba'n ch'ix ttzaj cyibaj ke nxjalile, ex tu'n tcub wipa'ne oc cycub baj byo'n keju at nxilene cyuc'il? 7Xitzun ttzak'we'n rey Asuero te Ester ex te Mardoqueo aju xjal Judiy: —O txi nk'o'ne tja Amán te Ester, ex o jaw yobit Amán ti'j jun tze' tu'nju xi tk'o'n orden tu'n cynaj ke xjal Judiy. 8Atzun ja'lo cxel nma'ne cyeye tu'n tcub cytz'ibane nok alcye ba'n tuj cywitze, tu'n tajben tu'n cyclet ke xjal Judiy. Jacu tz'oc npirmaye ti'j, ex cyseyarin cube ke u'j tu'n weye nsey. (Jun u'j toc tpirma rey ti'j tuc'ix t-sey mlay cub k'uchin.) 9Jurat naj e je'x txocbaj ke aj tz'ibal te rey tuj 23 tajlal toxin xjaw, ex ka aju xjaw Siván tbi. Tcyakilju xi tma'n Mardoqueo cye aj tz'ibal, xi cytz'iban cye xjal Judiy, cye ke xjal at cyoclen ttxlaj rey, cye ke gobernador cyuj partament ex cye mastl xjal at cyoclen cyuj 127 partament, xi'ynix ke' tuj tnam India ex ponin baj max tuj tnam Etiopía. Cub tz'iban ic tza'n che yolin ex ic tza'nx tz'ibbante cyyol junjun c'loj xjal tuj junjun partament. Ax icx cye xjal Judiy xi tz'iban tuj cyex cyyol ex ic tza'nx tz'ibbante cyyol. 10Oc tpirma rey Asuero cyi'j ke u'j lu, ex cybajlenxitzun seyarin ke u'j tu'n t-sey rey, e je'xtzun sama'n ke sanjel sipal cye, cyjax ke cyibaj ke tchej rey cye che kelan. 11Cyujtzun ke u'j lu xi tma'n rey cye xjal Judiy tu'n toc cychmon cyib cyuj nok alcyex tnam jatum najlke, tu'ntzun cyclonte cyib ex tu'n tcub cybyo'n cycyakil ke xjal banin cyten tuc'il cymacbil in che ajben tuj k'oj tu'n cyoc tzokpaj cyi'j, tuc'ix cyi'j cyxu'jil ex ke cyc'wa'l, akeju ate' tuj nok alcyex tnam ex ka partament. Ax icx tu'n cyoc xjal Judiy te tajwil cyk'inumabl aj k'oj cyi'j. 12Tcyakil jlu il ti'j tu'n tbant tuj junx k'ij cyuj cycyakil partament ate' tjak' tcawbil rey Asuero, ex aju k'ij banimaj ti'j, atzun tuj oxlaj tajlal tcablajin xjaw, aju xjaw Adar tbi. 13Il ti'j tu'n tex chic'bet jun copya te ley lu, ex tu'n t-xi k'ot cyuj cycyakil tnam ex ke partament, tu'ntzun tbant cyten ke xjal Judiy tuj k'ij lu tu'n cyclonte cyib cywitz ke aj k'oj cyi'j. 14Tu'nju orden tu'n rey, akeju sipal u'j jurat naj baj cysipan ke u'j, cyjax ke cyibaj ke chej te rey. Ax icx ex chic'bet orden lu tuj tnam Susa. 15Etztzun Mardoqueo tuj tja rey, toc t-xbalun t-xbalun rey, cha'x tuc' sak que'yin, ex tjax jun tbanil coron tuj twi', k'an pwak ttx'otx'il, ex toc juntl tbanil xbalun ti'j, lino tbi, ẍjulin que'yin. Ex cycyakil xjal najlke tuj tnam Susa nimxix e tzalaj. 16Tcyakil jlu oc te nim tzalajbil ex te jun nimbil cye cycyakil xjal Judiy, ex e ten tuj txubtxaj. 17Cyuj cycyakil partament, cyuj cycyakil tnam ex ke lugar jatum pon ju orden lu tu'n rey, nimxix e tzalaj ke xjal Judiy, oc nintz wa'n cyu'n ex cub cyic'sa'n nink'ij. Ax icx ke xjal ax najlke tuj tx'otx', at nimcu oc cyk'on cyib te Judiy, porque tzaj cyxobil cywitz ke xjal Judiy.

will be added

X\