ESTER 4

1Tej tbinte Mardoqueo ti'j tcyakilju otok baj, el t-sbit'un t-xbalun ti'j te jun techal tbis, ex oc tk'o'n t-xbalun ch'i'x twitz, jax tchitun tza'j tuj twi' ex baj tbetin tuj tnam in sch'in wen tu'n ta'w tbis, 2ex cyja'x tten tej tpon max ttzi tja rey. Axtzun cub we', porque minti'tok k'o'n ambil tu'n tocx jun xjal tuj tja rey toc t-xbalun ch'i'x twitz. 3Ax icx cyuj cycyakil partament jatum pon tkanil ley otok txi tk'o'n rey, tzaj nimxix bis cyxol xjal Judiy; tu'ntzunju cub cyyo'n we'yaj, e oc ten ok'el ex e jaw ayayan, ex nimcu cye e cub tan tuj tza'j ex oc cyk'o'n cyxbalun ch'i'x twitz. 4Ke majen xu'j in che ajben te Ester aju t-xu'jil rey, cyuc'ix ke xinak ate' te xk'ukil te, xi cyma'n te Ester ti'j aju in tbincha'ntok Mardoqueo. Tzajtzun nimxix tbis Ester ex xi t-sama'n xbalun te, tu'ntzun tel tch'expu'n t-xbalun ch'i'x twitz toc ti'j, atzunte Mardoqueo minti' xi tniman. 5Txquettzun Hatac tu'n Ester, ate Hatac jun cyxol ke xk'ukil tja rey otok tz'oc tk'o'n rey tu'n tajben te Ester, ex xi tma'n Ester te tu'n t-xi' que'yilte Mardoqueo ex tu'n t-xi tkanin te ti in bajtok ex tiku'n in tbincha'ntok jlu. 6Xi'tzun Hatac yolil tuc'il Mardoqueo, aju ma ta'tok tuj ttxa'n pe'n tcubsa'n tumlal twitz tpwertil tja rey. 7Xitzun tchic'ba'n Mardoqueo ti'j tcyakilju in baj, ax icx xi tma'n ti'j sak pwak otok txi ttziyan Amán tu'n tocx tk'o'n tuj c'ubl tk'inumabl rey ka ma che cub baj byo'n cycyakil xjal Judiy. 8Ax icx xi tk'o'n Mardoqueo jun copya te ley te Hatac, aju otok tz'ex chic'ba'n tuj tnam Susa, jatum tz'iban ka tu'n cycub baj byo'n cycyakil xjal Judiy, tu'ntzun t-xi tk'o'n Hatac te Ester ex tu'n tbinte Ester ti'j tcyakil jlu. Ax icx xi tma'n te Hatac tu'n t-xi tma'n te Ester tu'n t-xi' yolil tuc'il rey, tu'n tcubsan twitz cyi'j ke t-xjalil, tu'n mi'n cynaj. 9Ajtzun meltz'aj Hatac ex xi tchic'ba'n tcyakil te Ester, aju otok tma Mardoqueo. 10Xitzun t-sama'n Ester juntl maj Hatac tuc'il Mardoqueo k'malte tzak'webl lu: 11—Cycyakil xjal in che ajben te rey ex keju najlke cyuj ke partament ate' tjak' tcawbil, ba'n cyu'n at jun orden in tma'n cyja': Ka at jun xinak ex ka jun xu'j ma pon twitz rey max twitz ja te tujxi, ex ka mya txco'n otok txi' tu'n rey, cbel tcastiw tu'n tcyim; o'cx ju xjal mlay cub byo'n ka ma tzaj tnukpi'n rey tbastón k'an pwak ti'j. Ic tza'n weye ma bant-xi jun xjaw na'nx ntxquete tu'n rey, chi Ester. 12Tejtzun tbinte Mardoqueo aju tzak'webl tu'n Ester, 13atzunte aj t-sama'ntl ju yol lu: Mi'n ximana ti'j ka o'cxcu aya jun xjal Judiy ccletela nok tu'nju tocxa tuj tja rey. 14Ka ma cub t-xc'ayin tiba tu'n tyolina twitz rey ki'je, jacu tzaj colbil cye xjal Judiy tuj juntl lugar, atzun teya ex ke terman ktzan tmana che cymele. Balo tu'n jlu ma tz'oca te t-xu'jil rey, tu'n tonina kuc'ile tuj ju mya ba'n ctzajel kibaje lu. 15Xitzun t-sama'ntl Ester ju tzak'webl lu te Mardoqueo: 16Chmo'n oca cycyakil xjal Judiy ate' tuj tnam Susa tu'ntzun tcub cyyo'n we'yaj tu'n nlaje, mi'n che wa'ne ex mi'n che c'ane tuj enter ox k'ij ex ox konic'an; ax icx weye tzalu cyuc'ix ke nmajene xu'j cbel kyo'ne we'yaj, ex te tibajxitzun chin xe'le yolil tuc'il rey, masque chin ic'ele tibaj ley. Katzun ma chin cub byo'ne, malo bant-x ncyime, chi Ester. 17Xi'tzun Mardoqueo ex bant tu'n ic tza'nx otok tma Ester.

will be added

X\