ESTER 2

1Tbajlenxi jlu, chewix tk'oj rey Asuero ex ul Vasti ti'j tc'u'j, ax icx ul ti'j tc'u'j aju otok tbincha Vasti ex ti'j ley in yolin ti'j, aju otok tz'ex tkanil cyxol xjal. 2Entons ke xjal ma' cyoclen tuj tcawbil rey xi cyma'n cyja': E cyxi joybaj ke k'apoj na'nx cylonte xinak ex tbanilxix che que'yin tu'n cyul twitza. 3K'o'n oca junjun nejenel cyuj cycyakil partament ate' tjak' tcawbila, ex atzun ke che tzajel k'inte cye txin tuj ja banimaj tu'na cye xu'j tuj tnam Susa, tu'n cycyaj ten tuj tcwent Hegai aju xinak k'ukl tc'u'ja ti'j ex cwentil cye xu'j, ex ax cxel k'onte tcyakilju c'ajbel cye tu'n tbaj cybinchan cyib. 4Alcyetzun jun k'apoj mas nimxix tganiya ti'j, atzunju c'oquel te t-xu'jila tu'n tcyaj ten te t-xel Vasti aju t-xu'jilbena, che chi. Aju nabl lu ba'n ela tuj twitz rey ex banttzun jlu tu'n. 5Tuj tnam Susa najltok jun xjal Judiy Mardoqueo tbi, tcy'ajal Jair, atzunte Jair tcy'ajal Simei, atzunte Simei tcy'ajal Cis, aju tzajni tiyjil ti'j Benjamín. 6Otok txi k'i'n Cis tuj Babilonia tu'n rey Nabucodonosor, tej cyex k'i'n xjal Judiy tuj Jerusalén junx tuc'il Jeconías aju rey te Judá. 7Attok jun tme'jel terman tman Mardoqueo, otok cyim tman ex ttxu', ex tej cycyim tman txin oc tk'o'n Mardoqueo txin lu ic tza'n tme'jel. Hadasa tbi txin lu ex ax juntl tbi Ester; ex tbanilxix que'yin. 8Tej tex chic'ba'n aju ley otok bant tu'n rey, nimcu k'apoj e oc chmo'n tuj tja rey aju at tuj tnam Susa, ex e cyaj ten tuj tcwent Hegai aju cwentil cye xu'j; cyxoltzun ke jlu ajuntok te Ester. 9Nimxix o tzalaj Hegai ti'j txin lu, ex tu'ntzunju, o xtalinjtz Ester tu'n. Xi tk'o'n Hegai tcyakilju at tu'n tajben tu'n tbaj tbinchan tib Ester ex xi tk'o'n tbanil chibj te. Ax icx e oc tk'o'n wuk txin te ajbel te, sc'o'maj ke cyxol ke mastl txin ate' tuj tja rey; ex cyxol ke ja banimaj cye xu'j tu'n rey, xi tk'o'n Hegai aju ja mas tbanilxix te Ester, tu'n tten tuj, junx cyuc'il ke txin. 10Minti' xi tma'n Ester alcye ke t-xjalil ex alcye tiyjil, porque otok txi k'ma'n te tu'n Mardoqueo tu'n mi'n t-xi tma'n. 11Nok in betje'tok Mardoqueo tcyakil k'ij ttxa'n pe'n te ja banimaj cye xu'j tu'n rey, tu'ntzun tbinte ka ba'n ta' Ester ex alcyetok in binchanjtz ti'j. 12Ex cycyakil k'apoj il ti'j tu'n tbaj cybinchan cyib tuj cablaj xjaw. Tuj kak xjaw oc cysu'n aseyt ti'j cyximlal, aju aseyt nne'l ti'j tze' mirra tbi, ex tuj kaktl xjaw oc cyk'o'n perjum cyi'j tuc'ix crem, aju in ajben cyu'n xu'j. Tejtzun tjapun baj twi' jlu, teylex te junjun k'apoj xi' yec'ul tib twitz rey Asuero, tuj turn cyten. 13Oc t-xi' junjun k'apoj yec'ul tib twitz rey, in xi k'o'n ambil te tu'n t-xi ti'n nok alcye tajbil tu'n toc tk'o'n ti'j oc tex tuj cyja xu'j tu'n tpon tuj tja rey. 14Teyle junjun txin in xi' tuj tja rey te konic'an; octzun kskix te juntl k'ij in xi'tzun txin tuj juntl ja banimaj tu'n rey cye tcab t-xu'jil, ex atzun Saasgaz cwentil cye, aju xjal lu k'ukl tc'u'j rey ti'j. Te tibajxi jlu minti'tl in xi' txin yec'ul tib twitz rey, o'cx jacu txi' ka ma tzalaj rey ti'j ex ka ma txocli tu'n. 15Tejtzun tpon k'ij tu'n t-xi' Ester yec'ul tib twitz rey, minti' jun ti'xti xi ti'n, nok o'cx aju xi tma'n Hegai te tu'n toc tk'o'n ti'j. Cycyakil xjal in che oc que'yinte Ester in che tzalaj ti'j, porque tbanilxix que'yin ex ba'n tmod. Ate Ester tme'jel Abihail aju terman tman Mardoqueo. 16Tuj tlajin xjaw, ex ka aju xjaw Tebet tbi, tej otok bant wuk abk'i ttzyetlen tcawin rey Asuero, xi k'i'n Ester tuj tja rey tu'n t-xi tyec'un tib twitz. 17Masxix o t-xo' tgan rey Asuero ti'j Ester cywitz mastl k'apoj; cyja'tzun tten c'ujlanjtz Ester tu'n rey Asuero ex nimxix cub xtalin Ester tu'n cywitz mastl k'apoj otok che pon aj tuc'il; jax tk'o'n rey Asuero coron tuj twi' Ester ex oc tk'o'n te t-xu'jil te t-xel Vasti aju t-xu'jilben. 18Banttzun jun nintz wa'n tu'n rey Asuero te nimbil te Ester, ex e tzaj ttxco'n cycyakil keju at cyoclen ttxlaj ex cycyakil ke onilte tuj tcawbil, ex ajtz lak'e' chojenj tu'n, aju in chjet cyu'n xjal cyuj ke partament, ex xi t-sipan nimcu oyaj, ic tza'n in bant cyu'n rey at nim cyk'inumabl. 19Tej cyoc chmo'n ke txin tcabin maj, k'ukltok Mardoqueo ttzi tpwertil tja rey. 20Na'nxtok t-xi tma'n Ester alcye ke t-xjalil ex alcye tiyjil, ic tza'nx otok txi tma'n Mardoqueo te; nok o'cx cucxtok tbinchante aju in xi k'ma'ntok te tu'n Mardoqueo, ic tza'nx tej axtok ta' tuc'il. 21Tej k'ukltok Mardoqueo ttzi tpwertil tja rey, o tbi tej cyoc ten Bigtán ex Teres yolil ti'j rey tu'n tcub cybyo'n, tu'nju otok tzaj nimxix cyk'oj ti'j. Akeju cabe xjal lu cyoc te xk'ukil ttzi tja rey. 22Tejtzun tbinte Mardoqueo aju in banttok ti'j cyu'n cabe xjal lu, xi tma'n te Ester aju t-xu'jil rey, ex atzunte Ester xi tma'n te rey Asuero aju otok tma Mardoqueo. 23Eltzun jlu tuj k'ancha'l, ex tej tel tnic' rey ti'j ka ax toc, entons akeju cabe nejenel lu cub cysentens, ex e jaw yobin tu'n cycyim. Aju binchben lu, twitz rey cu'x tz'iban tuj libro jatum tz'iban aju tx'olbaben ti'j nasyon.

will be added

X\