Efesios 6

1Akeye c'wa'lbaj, cynimanxe cymane ic tza'n in tma'n Kajaw, porque tuj tumelxix jlu. 2Atzun tnejel mandamyent jlu at t-xel tu'n Dios ka ma japun: Cynimanxe cymane ex cytxuye, 3tu'ntzun tel ba'n cyeye ex tu'n cytene nim k'ij twitz tx'otx', chi tuj Tu'jil. 4Icx cyeye mambaj, mi'n tz'oc cyic'le'ne cyc'wa'le tu'n mi'n ttzaj cyk'oj, nok o'cx cych'iysame ex cyca'winxe ex cyk'onxe cynabl ic tza'n in tma'n Kajaw. 5Akeye majen, cynimanxe cypatrone ate' twitz tx'otx', che xobe cywitz ex tenwt cychiylal cyeye, che ajbene cye tu'n tcyakil cyanmiye, ic tza'n te Kajaw in che ajbene. 6Mya o'cx tu'n cyajbene ka at jun to'yil cyeye, ic tza'n keju in che ajben nok o'cx tu'n cytzalaj xjal cyi'j; atzun cyeye che ajbene ic tza'n tmajen Crist keye, cybinchame tajbil Dios tu'n tcyakil cyanmiye. 7Che ajbene tu'n tcyakil cyc'u'je ic tza'n te Kajaw in che ajbene ex mya cye xjal. 8Porque ba'n cyu'ne, teyle junjun alcye in tbincha'n ba'n, tzul tk'o'n Kajaw t-xel te, ka tzyu'n te majen ex ka tzokpi'n. 9Icx cyeye patrón, cybinchame ba'n cyuc'il cymajene, ex mi'n che oc cyxobtza'ne; porque ba'n cyu'ne, aju Cyajaw majen ex Cyajawe at tuj cya'j, ex ba'n cyu'ne minti' in tque'yin Kajaw ti t-xilen xjal. 10Ja'lotzun erman, cycyuwsam cyibe tu'nju at cymojbabl cyibe tuc'il Kajaw, ex tz'ocwit cyipune tu'n tipumal nimxix. 11Cyk'o'nque cyi'je tcyakilju in ajben te k'ojbil, aju ma tzaj tk'o'n Dios cyeye, tu'ntzun cywe'xixe twitz ju sbubl tu'n tajaw il. 12Porque mya cyuc'il xjal in ko k'ojin, nok o'cx cyuc'il keju nejenel minti' k'ancha'l, ex cyuc'il keju at cyipumal, ex cyuc'il keju in che cawin tuj klolj twitz tx'otx', ex cyuc'il ke ju'ẍ mya ba'n ke nim cyajlal ate' twitz cya'j. 13Cyja'tzun, cytzyume tcyakilju in ajben te k'ojbil, aju in tzaj tk'o'n Dios cyeye, cyk'o'nque cyi'je tu'n tbant cywe'xixe oc tul tk'ijlalil mya ba'n, ex tu'n mi'n cyyucche oc tjapun baj tcyakil cyu'ne. 14Cyja'tzun che we'xixe, cyc'alo'nc cyc'u'je tu'nju yol axix toc; che oque tz'aklxix, ic tten jlu ic tza'n jun chicyet c'uxbil nno'c cyk'o'n soldad cyi'j tu'n cyclet. 15Nok banin cytene tu'n cyxi'ye pacbal tkanil ba'n tu'n tbant cyten xjal tuc'il Dios, ic tten jlu ic tza'n jun soldad banin tten ex toc t-xajab. 16Ax icx tu'n toc ke' cyc'u'je ti'j Dios, ic tten jlu ic tza'n jun makbil tu'n cyclete ex tu'n tyupit tcyakil plech in c'ant in tzaj t-xo'n tajaw il. 17Ex ke' cyc'u'je ti'j ju colbil cyeye, ic tten jlu ic tza'n jun pasbil c'uxbil tu'n tjax cyk'o'ne tuj cywi'ye; ex cytzyume ju spad in tzaj tk'o'n Xewbaj Xjan, atzun tyol Diosju. 18Che na'ne Dios tcyakil k'ij ic tza'n in tma'n Xewbaj Xjan, che na'ne Dios ti'j tcyakil ex che cubsane twitz Dios, che xk'ukine ex mi'n che k'ajene tu'n cycubsane twitz Dios cyi'j cycyakil ocslal. 19Ax icx che na'ne Dios wi'je tu'n ttzaj tk'o'n Dios yol weye, tu'ntzun nyoline minti' nxobile, tu'n t-xi nchic'ba'ne tkanil colbil aju ewantok nej. 20Ma chin ocxe tuj pres tu'n tlaj presentant kine ti'j tkanil colbil ba'n, pero che na'ne Dios wi'je tu'n t-xi npacba'ne tkanil colbil minti' nxobile, ex tu'n nyoline tuj tumelxix. 21Tcyakil cxel tma'n Tíquico cyeye tu'ntzun cybinteye ti in baj weye ex alcye in nbincha'ne. Ate erman lu at kc'u'je ti'j, ex in japunxix tu'n tuj tak'un Kajaw. 22Cyja'tzun ma txi nsama'ne cyuc'ile, tu'ntzun cybinteye tza'n ktene, ex tu'n tk'ukbanjtz cyc'u'je tu'n. 23Awt Kman Dios tuc'ix Kajaw Jesucrist che k'onte cymojbabl cyib erman, ex tu'n tten cyc'ujlalil ex tu'n tten cyocslabl. 24Tenwt t-xtalbil Dios cyuc'il cycyakil keju at cyc'ujlalil ti'j Kajaw Jesucrist ex miwt ch'expet cyc'ujlalil. Icxwitju.

will be added

X\