Efesios 4

1Akine pres tu'n tlaj tbi Kajaw, chin cubsale cywitze tu'n cybete tuj tumelxix, porque ma che txconjtze tu'n Dios. 2Cymansincu cyibe ex che oque mans; ten cypasense ex tzic'xcu cyu'ne cyxolxe, ex cyc'ujlam cyibe. 3Tz'oc tililx cyu'ne cucx tu'n tten cymojbabl cyibe, aju in tk'o'n Xewbaj Xjan, porque cytzuylaj cyibe tu'nju cymojbabl cyibe. 4Nok junx kximlal, ex junx Xewbaj Xjan, ex ma che txconjtze tu'n Dios tu'n toc ke' cyc'u'je o'cx ti'j ju ctzajel tk'o'n cyeye. 5Junx Kajaw, junx kocslabl, junx byabl ke. 6Junx Dios ex Mambaj ke kcyakil; ate Dios kibaj kcyakil, ex in ak'nan kxol kcyakil, ex at tuj kanmi kcyakil. 7Pero teyle junjun ke ma tzaj tk'o'n Dios t-xtalbil tu'n tten koclen ic tza'nxju tzaj tmalo'n Crist. 8Porque in tma'n tuj Tu'jil: Tej tjax tuj cya'j, xi ti'n txkan pres tuc'il ex xi tk'o'n cyoclen xjal, chi tuj Tu'jil. 9Ex aju yol tej tjax, ¿ti in tma'n? Atzun in tma'n, nej otok cu'x aj tjak'xi tx'otx'. 10Aju cu'x aj tjak'xi tx'otx', axtzunju ma jax, max ma japun tibajxi cya'j tu'n tten tuj tcyakil. 11Ex ax Crist oc k'onte cyoclen ocslal tu'n cyoc junjun te apostl, ex junjuntl tu'n cyoc te t-sanjel Dios, ex junjuntl tu'n cyoc te pacbal tkanil colbil, ex junjuntl tu'n cyoc te pastor ex xnak'tzal, 12tu'ntzun cyxnak'tzet-xix ke ocslal tu'n cyajben tuj ak'untl, tu'n tch'iy ju Iglesi aju t-ximlal Crist. 13Cyja'tzun tu'n tmoje' kocslabl junx, ex junx tu'n kojtzkintexix Tc'wa'l Dios, ex tu'n ttz'aket-xix knabl, tu'ntzun ttz'aket-xix ku'n ic tza'n te Crist tz'aklxix. 14Cyja'tzun mi'n ko oc ic tza'n jun c'wa'l in meltz'aje' tnabl, ex mi'n ko jaw sutin tu'nju xnak'tzbil in cyk'o'n xjal ic tten ic tza'n cyk'ik', porque in che sbun ex in cyma'n yol xmeletz' tu'n cyel tzpet xjal. 15Atzun ke, ko lpe'c ti'j ju yol axix toc tuc'il kc'ujlalil, ko ch'iy tuj tcyakil ato'c ti'j Crist, porque atzun kwi'ju. 16Atzun ke t-ximlal Crist ko', ex tu'n Crist in ch'iy t-ximlal ttzuylaj tib ex tmojban tib tu'n tyakmil, ex cycyakil ate'c ti'j Crist in cyonin cyib cyxolx nok alcyex cyak'un, ex in che ch'iy tu'nju in cyc'ujlan cyib. 17Atzun jlu cxel nma'ne ex cxel ncyuwsa'ne cyeye tuj tbi Kajaw: Mi'n che ank'intle ic tza'n ke txkantl xjal mya ocslal ke in che ank'in tuc'il cyximbetz nokx gan. 18Tuj klolj ta' cynabl, ex cypa'n cyib ti'j ju chwinklal in tk'o'n Dios, porque minti' nne'l cynic' ti'j, tu'nju cyuw cyanmi. 19Ex tu'nju minti'tl nne'l cynic' ti'j alcyeju ba'n ex alcyeju mya ba'n, ma txi cyk'on cyib tuj achbil, tu'n cybinchante tcyakil ttz'ilil aju in ponxix cyc'u'j ti'j. 20Atzun cyeye, mya ic tten xnak'tzbil ma cyc'ame ti'j Crist, 21porque ma cybiye tyol ex ma che xnak'tzanjtze tu'n, ic tza'nx ju yol axix toc at tuc'il Jesús. 22Cycotpi'mele cyi'je aju ojtxi cytene, ex cyk'oncje aju ojtxi cychwinklale, porque aju ojtxi cytene niban tnaj tu'nju in pon tc'u'j ti'j nimcu ex in t-sbun tib. 23Cyja'tzun, tz'ocwit cyanmi te ac'aj tuc'ix cynable, 24ex cyk'o'nque cyi'je aju ac'aj cytene, porque o che binchanjtze tu'n cyoque ic tza'n tilbilal Dios, tu'n cyoque tz'aklxix ex xjan tu'nju yol axix toc. 25Cyja'tzun, cyk'oncje aju nic'aj yol; che yoline axix toc cyuc'il mastl, porque junx ato'c ti'j junx kximlal. 26Ka ma tzaj cyk'oje, pero mi'n cybinchaye il; mi'n txi cyc'u'ne k'oj ocxi tex k'ij. 27Ex mi'n txi cyk'o'ne ambil te tajaw il. 28Aju ba'n tz'elk'an nej, mi'n tz'elk'antl, nok o'cx tu'n tak'nan tu'n tk'ab tu'n tbinchante jun ak'untl tuj tumelxix, tu'ntzun tcnet aju in ajben te, ex tu'n t-xi tk'o'n ch'in teju atx taj te. 29Mi'n cymaye jun tc'ayil yol, nok o'cx tu'n cyyoline ti'j ju yol ba'n, tu'ntzun toc cynabl mastl, ex tu'n tajben te jun onbil te cye keju in che bin ti'j. 30Mi'n tzaj tbis Xewbaj Xjan cyu'ne, aju T-xew Dios, porque ma tz'oc k'o'n jun sey cyi'je tu'n Xewbaj Xjan tu'n tke'xix cyc'u'je ti'j ju colpibl cyeye tuj tk'ijlalil tzul. 31Cycolincje k'oj, mi'n che jaw cyakpaje, mi'n tzaj tlo'ch cyc'u'je, mi'n che jaw sch'ine tu'n cyk'oje, mi'n che yasune, mi'n che ximane mya ba'n ti'j juntl. 32Aju mas ba'n, atwit cyc'u'je cyi'je cyxolxe, k'ak'anx cyc'u'je ti'j juntl, cynajsame cyile cyxolxe ic tza'n te Dios cub tnajsa'n cyile nok tu'n Crist.

will be added

X\