1 Akeye cyimni keye nej tuj twitz Dios tu'n tlaj cyile ex cybinchbene mya ba'n, atzun ja'lo ma tzaj tk'o'n Dios cychwinklale. 2 Nej cucx in cybincha'ne mya ba'n, in che oc lpe'ye ti'j cymod xjal, in xi cynimane tajaw il aju nejenel cye keju at cyipumal ate' twitz cya'j, atzun xewbaj jlu aju in ak'nan tuj cyanmi xjal miban che bin. 3 Cyxol keju miban che bin o ko ten kcyakil ojtxi, junx kbinchben cyuc'il, o kbincha tajbil kchibjal, ex o kbincha tajbil kximbetz, ex tu'nju ktzajlenx mya ba'n ko', cyja'tzun at tk'oj Dios ki'j, ic tza'n cyi'j mastl xjal. 4 Pero ate Dios nimxix tk'ak'bil tc'u'j, ex nimxix tc'ujlalil ki'j, 5 cyja'tzun ma tzaj tk'o'n Dios kchwinklal junx tuc'il Crist, masque cyimnitok ko' nej tu'n tlaj kil. Cyja'tzun nok tu'n t-xtalbil Dios ma che clete. 6 Ex ma ko jaw ank'in tu'n Dios junx tuc'il Crist, ax icx ma ko cub tk'ukba'n tuj cya'j junx tuc'il, 7 tu'ntzun ttzaj tyec'un tuj tabk'iyil tzul aju t-xtalbil nimxix ex tc'ujlalil ki'j tu'n Jesucrist. 8 Porque ma che clete tu'n t-xtalbil Dios nok tu'n cyocslable. Mya cyu'nxe ma che clete, jun oyaj jlu ma tzaj tk'o'n Dios. 9 Mya tu'n cyak'unbene ba'n ma che clete, tu'ntzun mi jun tu'n tjaw tniman tib. 10 Porque tak'unben Dios ko', ex ma tzaj tk'o'n Dios kchwinklal ac'aj tu'nju ocslal ko' ti'j Jesucrist, tu'n kbinchante aju ba'n; ojtxi cub t-ximan Dios alcyeju ba'n tu'n kbinchante. 11 Cyja'tzun, cyna'ntze tza'n cytene ojtxi, akeye mya tiyjil xjal judiy keye. Oc k'o'n cybiye mya sircunsidarin keye cyu'n ke xjal judiy, keju toc cybi sircunsidarin ke, tu'n tk'ab xjal in bant ju sircunsisyón ti'j cychibjal. 12 Ojtxi minti' Crist cyuc'ile, te junxitl tnam keye, minti' cyoclene ti'j tnam Israel, ex minti' cyoclene ti'j ju yol cyaj bant ti'j tu'n Dios cyuc'il; minti' jatum tu'n toc ke' cyc'u'je, ex ate'ye twitz tx'otx' minti' Dios cyuc'ile. 13 Ojtxi najchak ate'ye, atzun ja'lo ma che ul lak'ba'ne tu'n cytene nikayin ttxlaj Dios tu'n tchc'el Jesucrist, tu'nju at cymojbabl cyibe tuc'il. 14 Ate Crist mojbalte ke, porque cabe tnam junx ma che oc tu'n, tza'nx ke xjal judiy ax icx ke xjal mya judiy, aju pe'n tcub cyxol cabe tnam tu'n mi'n cymojbante cyib ma cub t-xitun Crist. 15 Tu'n tcyimlen Crist el ju ic'bil cyxol, porque el ti'n Crist aju ley tuc'ix mandamyent junxilchak tten, tu'ntzun cyoc cabe tnam te junx ex tu'n cyoc te ac'aj, tu'ntzun tten cymojbabl cyib. 16 Ex tu'nju cyim Crist twitz crus, junx ma bant cyten cycabil tnam tuc'il Dios, bi'x naj k'oj cyxol tu'n Crist tej tcyim twitz crus. 17 Ultzun Crist, xi tma'n tkanil ba'n cyeye, akeye ate'ye najchak nej, ax icx xi tma'n cye xjal judiy ate' nikayin, tu'ntzun tten cymojbabl cyibe. 18 Porque nok tu'n Crist at koclen tu'n kocx kcabil twitz Kman Dios tu'n junx Xewbaj Xjan, tza'nx ke xjal judiy ax icx ke xjal mya judiy. 19 Cyja'tzun mya stranjer xjal keye ja'lo, ex mya betin xjal keye, nok o'cx ma che oque cytanmil cyibe cyuc'il cycyakil ocslal, ex cyerman cyibe cyuc'il ke tc'wa'l Dios. 20 Ic cytene ic tza'n jun ja, tcub keye tibaj jun simyent cub k'o'n cyu'n apostl ex cyu'n t-sanjel Dios, ax Jesucrist ju xak te scyini te simyent. 21 Ttzuylaj tib ju ja ti'j Crist, ex niban tjaw ch'iy jun ja xjan tu'n toc te tja Dios, nok tu'n Kajaw. 22 Ax icx cyeye, tu'nju ocslal keye ti'j Crist, niban cyjaw bincha'ne junx cyuc'il mastl tu'n cyoque te tnajbil Dios tu'n Xewbaj Xjan.
Copyright ℗ 2000 Hosanna Grabado por Producciones Cristianas Vina