Efesios 1

1Akine Pablo apostl kine te Jesucrist nok tu'n tajbil Dios. In xi ntz'ibane cyeye, akeye ate'ye tuj tnam Efeso, etzan keye tu'n Dios, ocslal keye ti'j Jesucrist ex wa'l ke'xixe. 2Awt Kman Dios tuc'ix Kajaw Jesucrist che tzaj k'onte xtalbil cyeye ex tu'n tke'xix cyc'u'je. 3Nimanxwit tbi Dios, aju Tdios Kajaw Jesucrist ex Tman, porque ma ko cub tcy'iwla'n; tcyakilju cy'iwbil at tuj cya'j ma tzaj tk'o'n Xewbaj Xjan ke tu'nju at kmojbabl kib tuc'il Crist. 4Cyja'tzun o ko jaw t-sc'o'n atxix na'nxtok tbant twitz tx'otx', tu'n kten tuc'il Crist, tu'n kajben o'cx te, ex tu'n kten twitz minti' ch'in tz'il ki'j. 5Tu'n tc'ujlalil Dios cub t-ximan atxix ojtxi tu'n koc te tc'wa'l nok tu'n Jesucrist, cub t-ximan icju porque ba'n ela tuj twitz. 6Cyja'tzun, cucx in xi kk'o'n chjonte te Dios tu'nju t-xtalbil tbanilxix; nok tu'n t-xtalbil ma ko c'met tu'n, tu'nju ocslal ko' ti'j Tc'wa'l aju c'ujla'n tu'n. 7Nok tu'n Crist ma ko colpet tu'nju tchc'el, ex ma najset kil tu'nju t-xtalbil nimxix. 8Nimxix t-xtalbil tzaj tk'o'n ke tu'n ttz'aket-xix knabl ex tu'n telxix knic' ti'j. 9Ma tzaj tyec'un Dios ju tajbil ke, aju ewantok nej, porque ba'n ela tuj twitz icju, ex tu'nx cub t-ximan icju, 10tu'n toc tmojba'n tcyakil tjak' tcawbil Crist oc tjapun baj tk'ijlalil; keju ate' tuj cya'j ex keju ate' twitz tx'otx'. 11Tu'nju ocslal ko' ti'j Crist ma tzaj k'o'n jun ketzbil, ojtxi cub t-ximan Dios jlu tu'n ttzaj tk'o'n ke, porque tcyakil in tbincha'n Dios ic tza'nx tajbil ex ic tza'nx xima'maj tu'n. 12Atzun t-ximbetz Dios, tu'n tjaw knimsa'n tbi ex tu'n t-xi kk'o'n chjonte te, akeko' nej oc ke' kc'u'je ti'j Crist aju at toclen tu'n Dios. 13Ax icx cyeye, tej t-xi cybi'ne ju yol axix toc, aju tkanil colbil cyeye, ex tej t-xi cyocsla'ne Crist, ma che oc mojba'ne tuc'il, ex ma tz'oc k'o'n jun sey cyi'je tu'n Xewbaj Xjan, aju tziyimaj tu'n Dios. 14Ate Xewbaj Xjan ma tzaj k'o'n te jun señ tu'n kc'monte jun ketzbil. Ocxi tjapun baj tk'ijlalil tu'n kcolpet, maxitzun ctzajel k'o'n ju ketzbil tu'ntzun tjaw knimsa'n tbi Dios ex tu'n t-xi kk'o'n chjonte te. 15Cyja'tzun, ic tza'n weye, atxix tej nbinteye ti'j cyocslable at ti'j Kajaw Jesús ex ti'j cyc'ujlalile at cyi'j cycyakil ocslal, 16cucx t-xi nk'o'ne chjonte te Dios cyi'je, ex cucx in che tzaj nna'ne tuj nna'j Diose. 17In chin cubsane twitz Tdios Kajaw Jesucrist, aju Mambaj ma'xix toclen, tu'n ttzaj tk'o'n cynable ex tu'n ttzaj tchic'ba'n cyeye tu'n telxix cynic'e ti'j Dios. 18Ex in xi nkanine te Dios tu'n ttzaj t-spic'ba'n tuj cynable tu'n tel cynic'e ti'j ju ctzajel tk'o'n Dios cyeye tuj cya'j tu'nju ma che txconjtze tu'n, ex waje tu'n tel cynic'e ti'j ju etzbil nimxix ex tbanilxix ctzajel tk'o'n Dios cye ocslal, 19ex tu'n tel cynic'e ti'j tipumal nimxix, aju ma tzaj tk'o'n ke ex tu'n tajben ke, ako' ma ko ocslan. Junx ta' tipumal ma tzaj tk'o'n ke ic tza'n tipumal 20tej tjatz ank'in Crist tu'n cyxol cyimni ex xi tma'n tu'n tcub ke' ttxlaj tuj bank'abaj tuj cya'j, 21ex tu'n tten mas toclen cyibaj cycyakil ke nejenel ex keju at cyoclen ex keju at cyipumal ex keju in che cawin, ex mas at toclen tbi twitz cybi cycyakil, mya nok o'cx tuj tk'ijlalil ja'lo, ax icx tuj tk'ijlalil tzul. 22Ex tcyakil cub tk'o'n Dios tjak' tcawbil Crist, ex xi tk'o'n Dios toclen Crist tu'n toc te nejenel cyibaj cycyakil ocslal. 23Atzun cye cycyakil ocslal ic tza'n t-ximlal Crist ke. Ex tu'n Crist in tz'aket-xix ju Iglesi, porque tu'n Crist tz'aklxix tcyakil aju at.

will be added

X\