1 ¿Alcye jun jacu pon ic tza'n jun xjal at tnabl? ¿Alcye jun jacu tz'el tnic' ti'j t-xilen jun ti'xti? Aju nabl, in tzalaj twitz xjal tu'n ex in ch'expaj que'yin tu'n. 2 Japunx ke tley rey tu'na ic tza'nx o txi ttziyana twitz Dios. 3 Mi'n tz'etz ojkelina twitz. Mi'n tz'oc tk'on tiba ti'j jun ti'xti mya ba'n, porque jacu tbincha rey ti'ja nok alcye tajbil tu'n tbant. 4 Ma'xix toclen tyol rey ex alcye jun jacu k'mante te: ¿Ti in bant tu'na, chiwt? 5 Aju xjal in japun ley tu'n, mlay tzaj jun mya ba'n ti'j, ex aju xjal at tnabl, nne'l tnic' ti'j jtoj tu'n tbant aju in tma'n rey ex tza'n tten tu'n tjapun tu'n. 6 Ax toc at jun k'ij ex jun tmodiyil tu'n tbinchet tcyakil aju in binchanjtz, pero aju mas cyuw teju xjal atzun jlu: 7 Minti'x ba'n tu'n aju ctzajel te tibajxi, ex mi a'l jun jacu tzaj k'mante te jtoj tu'n ttzaj. 8 Mi a'l jun jacu ten tipumal ti'j tchwinklal tu'n mi'n tcyim, ax icx mi a'l jun jacu k'mante alcye k'ij tu'n tcyim. Mi a'l jun jacu tzokpaj tu'n mi'n tten tuj k'oj lu. Aju xjal mya ba'n mlay colin tbinchben mya ba'n ti'j tu'n tclet. 9 Tcyakil jlu ma wile tej t-xi nk'onxix wibe tu'n tel nnic'e ti'j aju in bant tzalu twitz tx'otx', ex aju tipumal xjal at tu'n tbinchante mya ba'n ti'j juntl. 10 Ax icx o wile ke xjal mya ba'n in che cu'x maku'n tuc'il nimbil cye. Atzun ke xjal nim cygan tu'n cyten tuj Lugar Xjan, jurat nnic' cyna'njtz cyu'n ke xjal tuj tnam jatum otok cybincha ju tz'aklxix. Ax icx nokx gan jlu, 11 porque tu'nju minti' in cub k'o'n naj tcastiw xjal ti'j tbinchben mya ba'n, tu'ntzun jlu o'cx in che ximan xjal ti'j tu'n cybinchante mya ba'n. 12 Masque binchan xjal il nimcu maj ex masque nim abk'i ten tzalu twitz tx'otx', pero aju weye ba'n wu'n akeju xjal in che niman te Dios ex in che xob twitz, ba'n c'elel tcyakil te cye; 13 atzun cye ke xjal binchal mya ba'n, mya ba'n c'elel te cye ex mya nim k'ij che tel twitz tx'otx'; ic che oquel ic tza'n jun xlecun jurat in cub naj, porque minti' in che xob twitz Dios. 14 Cyja'tzun, nimcu aju mya tuj ttxolil in binchanjtz tzalu twitz tx'otx': Ke xjal ba'n cymod, in tzaj mya ba'n cyibaj, mer ic tza'n mya ba'n ke, ex atzun ke xjal binchal mya ba'n in che tzalaj, mer ic tza'n puro ba'n ke. Tuj weye nwitz ax icx nokx gan te jlu. 15 Cyja'tzun in xi nma'ne, mas ba'n tu'n ktzalaj. Aju mas ba'n tu'n cybinchante xjal tzalu twitz tx'otx', ba'n tu'n cywa'n ex tu'n cyc'an ex ba'n tu'n cytzalaj, porque o'cxtzun jlu jacu bant cyu'n ti'j cyak'unben cyuj ke k'ij te cyank'ibl ctzajel tk'o'n Dios tzalu twitz tx'otx'. 16 Xi nk'on mastl wibe tu'n nxnak'tzane ex tu'n tel nnic'e ti'j ex tu'n tic' nwitze ti'j tcyakil aju in bant tzalu twitz tx'otx', (porque at junjun xjal mi konic'an ex mi k'ijtl minti' in che tan,) 17 ex ma tz'el nnic'e ti'j, ate xjal mlay tz'el tnic' ti'j ju in tbincha'n Dios ex mi aju in baj tzalu twitz tx'otx'. Masque tz'oc tk'o'n tilil tu'n tel tnic' ti'j aju in bant tu'n Dios, pero mlayx tz'el tnic' ti'j; ex masque tma jun xjal at tnabl ka ojtzki'n tu'n, pero minti' nne'l tnic' ti'j.
