ECLESIASTES 5

1Oc t-xi'ya tuj tja Dios, ten tcwenta ti'ja, tu'ntzun tbinteya tyol; a jlu mas ma' toclen twitzju chojbil in xi cyk'o'n xjal minti' cynabl, porque minti' nne'l cynic' ti'j ka in cybincha'n mya ba'n. 2Mi'n jaw tlajon tiba, mi tu'n ttzi'ya ex mi cyu'n ke t-ximbetza, tu'n t-xi ttziyana jun yol te Dios; ate Dios at tuj cya'j ex atzun teya twitz tx'otx' ta'ya. Cyja'tzun mi'n yolina ti'j nim yol, 3porque tu'nju nim in che ximan xjal in che cub xk'umsa'n, ex tu'nju nim yol in che yolin ti'j jacu cyma yol minti' tajben. 4Oc t-xi ttziyana jun yol te Dios japunx naj tu'na, porque ate Dios minti' in tzalaj cyi'j ke xjal minti' cynabl. Japunx tu'na aju in xi ttziyana; 5mas ba'n tu'n mi'n t-xi ttziyana twitzju tu'n t-xi ttziyana ex mi'n japun tu'na. 6Mi'n tak'a ambil tu'n tbinchanteya il tu'n ttzi'ya, ex mi'n txi tma'na teju xjal sama'n tu'n Dios ka nok xtzpeta ti'j. ¿Tiku'n taja tu'n ttzaj tk'oj Dios ti'j ju in tma'na, ex te tibajxi tu'n tcub xitun tak'unbena tu'n? 7Cyja'tzun, ka nim in witzcy'an xjal ex ka nim in yolin, minti' tajben jlu, atzun teya xoba twitz Dios. 8Mi'n jaw labina ti'j ka ma tila tuj jun tnam in che yajlanjtz ke xjal meba ex minti' in xi bincha'n cyi'j tuj tumelxix, porque jun xjal ma' toclen in cyaj tjak' tcawbil juntl xjal mas ma' toclen twitz, ex cycabil ke jlu in che cyaj tjak' tcawbil juntl mas ma' toclen cywitz. 9Masque icju, aju in tzaj tuj cojbil jacu tz'ajben cye cycyakil ka ma tak' tib jun rey tu'n tonin. 10Aju xjal toc tc'u'j ti'j pwak cucx taj mastl; aju xjal toc tc'u'j ti'j k'inumabl, tuj twitz ka nim at tuc'il. Ax icx nokx gan te jlu, 11porque ka nim at tuc'il xjal, ax icx nim in baj tnajsa'n. ¿Ex ti tganar ti'j tu'n tten nim tk'inumabl? O'cx ch'in tganar ti'j tu'n toc tque'yin. 12Aju xjal in ak'nan, ka nim twa in baj ex ka mi'n, pero txubtxaj in tan; atzunju xjal k'inun, tu'n tk'inumabl minti' nno'cx watl tuj twitz. 13At jun mya ba'n bisbajilxix wen ma wile twitz tx'otx'; aju tk'inumabl xjal in baj tchmo'n nno'c te jun mya ba'n te te, 14porque ka at jun trat mya ba'n ma tz'el, jacu bant txi baj tcyakil tk'inumabl ti'j; ex ka at jun tcy'ajal, ya te tibajxi misicyer ch'in cyjel tk'o'n te. 15Ex ic tza'nx tej tul itz'j tzalu twitz tx'otx', ax icxtzun c'ajel juntl maj: ski't ti'j tej tul itz'j, ex oc tcyim misicyer ch'in cxel ti'n ti'j tak'unben. 16Ax toc bisbajilxix te jlu: Ic tza'nx tej tul itz'j te xjal twitz tx'otx', ax icxtzun c'ajel juntl maj. ¿Titzun ma tcamba tu'nju ma tz'ak'nan wen ex nokx gan tak'unben? 17Mya o'cx jlu, ax icx, nok jte' k'ij oc ctel tzalu twitz tx'otx' ctel tuj bis ex tuj yajbil, tuc'il c'ixc'oj ex k'oj. 18Ma tz'el nnic'e ti'j: Aju mas ba'n tu'n tbinchante xjal, ba'n tu'n twa'n ex tu'n tc'an, ex tu'n tachin ti'j tak'unben, aju nim otok tzaj tk'o'n Dios, atzunte jlu aju at toclen xjal ti'j. 19Ax icxtzun ke xjal in tzaj tk'o'n Dios cyk'inumabl, ax icx in xi tk'o'n cyoclen tu'n cywa'n ti'j, ex tu'n t-xi cyc'mo'n aju at cyoclen ti'j, porque aju tu'n cytzalaj ti'j cyak'unben, a jlu jun oyaj tu'n Dios. 20Ate Dios cnojsalte tanmi xjal tu'n tzalajbil, cyja'tzun mlay tzaj baj tc'u'j ti'j tchwinklal oc tten tzalu twitz tx'otx'.

will be added

X\